2 Kiŋ 2 - Krio Fɔs Oli Baybul

Ilayja Go Ɔp Na Ɛvin

¹ Di tɛm we PAPA GƆD bin rɛdi fɔ tek Ilayja go ɔp na ɛvin wit wan big briz we de tɔn rawnd ɛn rawnd, Ilayja ɛn Ilaɛlsha bin de waka de kɔmɔt na Gilgal.

² Ilayja tɛl Ilaɛlsha se lɛ i wet am na da ples de bikɔs PAPA GƆD sɛn am na Bɛthɛl. Bɔt Ilaɛlsha nɔ gri, i se wans PAPA GƆD de alayv ɛn in di Ilayja insɛf nɔ day yet, i nɔ go lɛf am.

³ So dɛn ɔltu go dɔŋ na Bɛthɛl. Sɔm prɔfɛt dɛn we bin de na Bɛthɛl aks Ilaɛlsha if in nɔ no se PAPA GƆD de tek in masta nain an da de de. Ilaɛlsha ansa dɛn se in no, so lɛ dɛn sɛt dɛn mɔt.

⁴ Ilayja tɛl Ilaɛlsha se lɛ i wet am na Bɛthɛl bikɔs PAPA GƆD sɛn am na Jɛriko. Ilaɛlsha tɛl am se wans PAPA GƆD de alayv ɛn in di Ilayja insɛf nɔ day yet, in nɔ go lɛf am. So dɛn ɔltu go na Jɛriko.

⁵ Di prɔfɛt dɛn we de na Jɛriko dɛnsɛf go mit Ilaɛlsha ɛn aks am if i nɔ no se PAPA GƆD de tek in masta nain an da de de. Ilaɛlsha ansa dɛn se in no, so lɛ dɛn sɛt dɛn mɔt.

⁶ Ilayja tɛl Ilaɛlsha se lɛ i wet am na Jɛriko bikɔs PAPA GƆD sɛn am na Jɔdan. Ilaɛlsha tɛl am se wans PAPA GƆD de alayv ɛn in di Ilayja insɛf nɔ day yet, in nɔ go lɛf am. So dɛn ɔltu go na Jɔdan.

⁷ Wɛn dɛn rich nia di riva, fifti pan di prɔfɛt dɛn go tinap fawe lilibit de wach dɛn usay dɛn tinap nia Riva Jɔdan.

⁸ Ilayja tek di matirial we i wɛr rawnd in sholda, fol am ɛn nak di wata wit am. Di wata plit tu: af na lɛft, af na rayt, dɔn dɛn tu pas midul go na di ɔda say.

⁹ Wɛn dɛn rich oba say, Ilayja tɛl Ilaɛlsha se lɛ i aks am wetin in want am fɔ du fɔ am bifo i lɛf am. Ilaɛlsha tɛl am se in want dɔbul di spirit we i gɛt.

¹⁰ Nain Ilayja tɛl am se na at at tin i dɔn aks am fɔ so; bɔt if i si am, we i de go, i go gɛt am, if i nɔ si am i nɔ go gɛt am.

¹¹ As dɛn de waka de tɔk de go, na de wantɛm wan karej we gɛt faya kam midul dɛn tu, dɔn Ilayja go ɔp na ɛvin wit big briz we de tɔn rawnd ɛn rawnd.

¹² We Ilaɛlsha si di ɔs ɛn karej, i ala se “Mi Papa! Mi Papa! A si di Izrɛlayt dɛn ɔs ɛn karej.” Ilayja lɔs nain yay i nɔ si am igen Ilaɛlsha chɛr in klos tu.

¹³ I tek di matirial we fɔdɔm na Ilayja in an ɛn tɔn bak go na Riva Jɔdan.

¹⁴ I tek di matirial nak di wata ɛn se, “We PAPA GƆD, Ilayja in PAPA GƆD?” Wɛn i nak di wata i plit midul, af go lɛft, af go rayt; dɔn Ilaɛlsha krɔs go oba bak.

¹⁵ Di prɔfɛt dɛn we kɔmɔt Jɛriko bin de wach; wɛn dɛn si Ilaɛlsha, dɛn ɔl bigin tɔk se na Ilayja in spirit dɔn kam pan Ilaɛlsha; dɔn dɛn ɔl go mit am baw to am,

¹⁶ ɛn tɛl am se, na fifti pan dɛn de de, so lɛ i gi dɛn pamishɔn fɔ go fɛn in masta; dɛn se sɔntɛm na PAPA GƆD in spirit dɔn kech am kɛr am go pantap wan mawnten ɔ dɔn ib am na wan vali. Bɔt Ilaɛlsha se nɔ.

¹⁷ Bɔt dɛn mɔna am te i shem, so insɛf gri lɛ dɛn kɛri ɔn. Dɛn sɛn fifti man dɛn fɔ go fɛn Ilayja; dɛn tek tri de de luk fɔ am bɔt dɛn nɔ si am.

¹⁸ Ilaɛlsha bin de na Jɛriko ɛn wet dɛn te dɛn kam. Nain i tɛl dɛn se if i nɔ bin tɛl dɛn nɔ fɔ go.

Ilaɛlsha Ple Wɔnda

¹⁹ Di man dɛn na Jɛriko tɛl Ilaɛlsha se di siti na fayn ples fɔ tap bɔt nɔmɔ di wata nɔ fayn ɛn dat mek natin nɔ de bɔs na di grɔn.

²⁰ Ilaɛlsha tɛl dɛn se lɛ dɛn put sɔl insay nyu bol gi am. Dɛn put di sɔl na di bol ɛn gi am.

²¹ I go dɔŋ di watasay ɛn trowe di sɔl na di wata ɛn se, “Dis na wetin PAPA GƆD tɔk, a dɔn mek dis wata piɔ; no mɔ pɔsin nɔ go drink am ɛn day ɔ mek plant nɔ bɔs na di grɔn.”

²² Ɛn frɔm da de de di wata piɔ jɛs lɛkɛ aw Ilaɛlsha tɔk nɔmɔ.

²³ Ilaɛlsha lɛf da siti de go na Bɛthɛl. As i de na rod de go, sɔm bɔbɔ dɛn we bin de na di siti bigin provok am se, “Bɔl ed! Bɔl ed! Go nɔ, go nɔ! Bɔl ed, bɔl ed! Go nɔ, go nɔ!”

²⁴ Ilaɛlsha tɔn wach dɛn ɛn yuz PAPA GƆD in nem swɛ dɛn. Na de tu wayl animal kɔmɔt na bush kil fɔti-tu pan dɛn.

²⁵ Ilaɛlsha kɔmɔt de go Mawnt Kamɛl, dɔn i tɔn bak go Sameria.