2 Kiŋ 16 - Krio Fɔs Oli Baybul

Eaz Bi Kiŋ Na Juda

¹ Di ia we mek Rɛmalaya in bɔypikin we na Peka sɛvintin ia as kiŋ na Izrɛl, na da ia de Jotham in bɔypikin we na Eaz bi kiŋ na Juda.

² Eaz bin ol twɛnti ia we i bi kiŋ ɛn i rul na Jerusɛlɛm fɔ sikstin ia. Lɛkɛ aw Devid bin de rul, in nɔ rul so; bifo dat i du wetin nɔ rayt na PAPA GƆD in yay;

³ Eaz fala dɛn ɔda kiŋ dɛn na Izrɛl dɛn bad trik ɛn ivin tek in bɔypikin mek sara na faya; dɔn na soso dɛn bad bad tin we dɛn ɔda neshɔn dɛn bin de du we mek PAPA GƆD drɛb dɛn kɔmɔt bifo di Izrɛlayt dɛn, insɛf du.

⁴ I bɔn insɛns ɛn mek sakrifays na dɛn ay ples we dɛn mek fɔ wɔship lay lay gɔd, i mek sakrifays pantap dɛn il ɛn ɔnda dɛn tik.

⁵ Kiŋ Rizin na Siria ɛn Kiŋ Peka na Izrɛl we na Rɛmalaya in bɔypikin tay bagin ɛn atak Jerusɛlɛm. Dɛn le ambush fɔ Eaz bɔt dɛn nɔ ebul am.

⁶ So Kiŋ Rizin kapchɔ Ilath ɛn drɛb di man dɛn na Juda kɔmɔt de; na de di Idɔmayt dɛn muf go tap na Ilath ɛn na dɛn de de te tide.

⁷ Eaz sɛn mɛsej to Kiŋ Tiglat Pilɛsa na Asiria se in nain bɔbɔ ɛn i no se i de fɔ am, so in de beg am lɛ i kam ɛp am fɔ fɛt di kiŋ dɛn na Siria ɛn Izrɛl we dɔn atak am.

⁸ Eaz tek di gold ɛn silva we de na PAPA GƆD in os ɛn in yon os ɛn sɛn ɔl as prɛzɛnt fɔ di kiŋ na Asiria.

⁹ Di kiŋ na Asiria insɛf gri fɔ bato am; i atak Damaskɔs ɛn kapchɔ di siti. I mek ɔlman go bak na Kir, dɔn i kil Kiŋ Rizin.

¹⁰ Kiŋ Eaz go na Damaskɔs go mit Kiŋ Tiglat Pilɛsa. I si wan ɔlta de we i lɛk, so i drɔ di plan ɛn sɛn am to Yuraya we de mek sakrifays fɔ pipul sin fɔ bil di sem kayn ɔlta.

¹¹ Yuraya insɛf bil di ɔlta we Kiŋ Eaz se fɔ bil. I bil am dɔn bifo di kiŋ tɔn bak na Juda.

¹² Wɛn di kiŋ kɔmɔt Damaskɔs ɛn si di ɔlta, i go mek sakrifays de wantɛm.

¹³ I bɔn animal sakrifays de, dɔn i mek dɛn ɔda sakrifays wit it, wayn, ɛn blɔd.

¹⁴ I pul di bras ɔlta we dɛn bin dɔn dɛdiket to PAPA GƆD kɔmɔt frɔnt di os usay i bin de midul di nyu ɔlta ɛn PAPA GƆD in os ɛn put am na di nɔth pat to di nyu ɔlta.

¹⁵ Kiŋ Eaz gi ɔda to Yuraya we de mek sakrifays fɔ pipul sin se na pan di nyu big ɔlta i fɔ de ɔfa di mɔnin animal sakrifays ɛn di ivin it sakrifays, wit di kiŋ in yon animal ɛn it sakrifays, ɛn ɔl di pipul dɛn na di kɔntri dɛn yon animal, it ɛn wayn sakrifays. Di kiŋ se i fɔ tɔn ɔl di blɔd fɔ sakrifays pan di ɔlta bɔt in go yuz di bras ɔlta fɔ de aks fɔ advays.

¹⁶ Yuraya we de mek sakrifays fɔ pipul sin du ɔl wetin di kiŋ tɛl am fɔ du.

¹⁷ Kiŋ Eaz pul di bras ɔmɔlanke dɛn we bin de na PAPA GƆD in os wit di bol dɛn we bin de pan dɛn; i put di bras tank we bin de pantap di bras kaw dɛn ɛn put am pantap ston.

¹⁸ Dɔn igen fɔ pliz di kiŋ we kɔmɔt Asiria, i pul di stand kɔmɔt insay PAPA GƆD in os usay kiŋ in chia bin de tinap ɛn batin di domɔt we na de di kiŋ fɔ pas go insay PAPA GƆD in os.

¹⁹ As fɔ di ɔda tin dɛn we Eaz du we i bin de rul, dɛn ɔl rayt na di istri buk bɔt dɛn kiŋ na Juda.

²⁰ Eaz day dɔn dɛn bɛr am usay dɛn bɛr in fɔstɛm-papa dɛn na Devid in siti; dɔn in bɔypikin Ɛzikaya bi di kiŋ.