2 Kiŋ 14 - Krio Fɔs Oli Baybul

Kiŋ Amazaya Na Juda

¹ Di ia we mek Jɛoaaz in bɔypikin we nem Jɛoash tu ia as kiŋ na Izrɛl, na da sem ia de Joash in bɔypikin we nem Amazaya bigin fɔ rul na Juda.

² Na twɛnti-fayv ia i bin ol we i bi kiŋ, ɛn i rul fɔ twɛnti-nayn ia na Jerusɛlɛm. In mama nem Jɛoadin ɛn na Jerusɛlɛm i kɔmɔt.

³ In bin du wetin PAPA GƆD want bɔt nɔmɔ in nɔ bin rich Kiŋ Devid. Na wetin in papa Joash bin de du insɛf du.

⁴ I nɔ brok dɛn ay ples we dɛn bin de wɔship lay lay gɔd, ɛn lɛf di pipul dɛn fɔ de mek sakrifays ɛn bɔn insɛns de.

⁵ Wɛn i dɔn sidɔm fayn na pawa, i kil ɔl dɛn ɔfisa dɛn we bin kil in papa di tɛm we i bin bi kiŋ,

⁶ bɔt i nɔ kil dɛn pikin dɛn bikɔs i bin de go akɔdin to di Lɔ we PAPA GƆD gi Mozis se, “Papa nɔ fɔ day fɔ pikin, ɛn pikin nɔ fɔ day fɔ papa; ɔlman fɔ day fɔ in yon sin.”

⁷ Na Amazaya bin kil tɛn tawzin Idɔmayt dɛn na Sɔl Vali, ɛn kapchɔ wan siti we nem Sila, ɛn gi am nem Jokthil, we na dis nem ya di ples gɛt te tide.

⁸ Dɔn Amazaya sɛn mɛsej to Jɛoash we na Jɛoaaz in bɔypikin ɛn grampikin to Jeu se in de chalenj am fes to fes fɔ fɛt. Jɛoash na bin di kiŋ na Izrɛl.

⁹ Bɔt Kiŋ Jɛoash na Izrɛl sɛn riplay to Kiŋ Amazaya na Juda se, “Wande, wan smɔl winji winji plant na Libanɔn sɛn mɛsej to wan big sida tik insay di vɛri Libanɔn se i fɔ gi in gyal pikin to in bɔypikin fɔ mared. Na de wan wayl animal kɔmɔt na bush kam mas, mas di lili plant.

¹⁰ Na tru se yu dɔn dɔnawe wit Idɔm bɔt dat nɔ min se yu fɔ de mek prawd ɛn mek rudnɛs. If yu dɔn win, sidɔm saful, bɔt nɔ fɛn plaba ɛn mek yu ɛn Juda sɔri.”

¹¹ Bɔt Amazaya nɔ yɛri wɔd, i stil mek traŋayes, so Kiŋ Jɛoash na Izrɛl atak am. Dɛn mitɔp fes to fes na Bɛth Shemɛsh na Juda.

¹² Jɛoash in sojaman dɛn dɔnawe wit Amazaya in yon dɛn kpatakpata te ɔlman rɔnawe go om.

¹³ Kiŋ Jɛoash kapchɔ Kiŋ Amazaya we na Joash in bɔypikin we semweso na Aazaya in grampikin na Bɛth Shemɛsh. Dɔn Jɛoash go dɔŋ na Jerusɛlɛm ɛn brok di wɔl fɛnch frɔm Ifrem Get te rich to di Kɔna Get, di distans na bin lɛk siks ɔndrɛd fut lɔŋ.

¹⁴ I tek ɔl di gold ɛn silva tiŋs dɛn we de na PAPA GƆD os, wit ɔl di ɔda dia tiŋs dɛn na di kiŋ in os. Dɔn pantap dat i kech pipul dɛn kɛr dɛn go Sameria.

¹⁵ As fɔ di ɔda tin dɛn we Jɛoash du, ɛn ɔl wetin ɛn wetin i gɛt wit di wa we i fɛt wit Kiŋ Amazaya na Juda, dɛn ɔl rayt na di istri buk bɔt dɛn kiŋ na Izrɛl.

¹⁶ Wɛn Jɛoash day dɛn bɛr am na Sameria usay dɛn bɛr in grampapa dɛn na Izrɛl; dɔn in bɔypikin Jɛroboam tek in ples as Kiŋ.

Kiŋ Amazaya Na Juda Day

¹⁷ Kiŋ Amazaya na Juda we na Joash in bɔypikin liv fɔ fiftin ia afta we Kiŋ Jɛoash na Izrɛl we na Jɛoaaz in bɔypikin day.

¹⁸ As fɔ di ɔda tin dɛn we Amazaya du we i bin de rul, dɛn ɔl rayt na di istri buk bɔt dɛn kiŋ dɛn na Juda.

¹⁹ Dɛn mek ku pan Amazaya na Jerusɛlɛm, nain i rɔnawe go Lakish; bɔt de sɛf dɛn fala am go de ɛn kil am de.

²⁰ Na ɔs dɛn tek go pul in dedebɔdi kɔmɔt de. Dɛn bɛr am usay dɛn bɛr in grampapa dɛn na Jerusɛlɛm na Devid in siti.

²¹ Ɔl di pipul dɛn na Juda tek Amazaya in bɔypikin we nem Azaraya we ol sikstin ia ɛn mek am kiŋ.

²² Na dis Azaraya kam bil Ilath bak ɛn mek i bi pat ɔf Juda.

Kiŋ Jɛroboam II Na Izrɛl

²³ Di ia we mek Amazaya we na Joash in bɔypikin fiftin ia as kiŋ na Juda, na da ia de Joash in bɔypikin we nem Jɛroboam bi kiŋ na Izrɛl, ɛn i rul fɔ fɔti-wan ia.

²⁴ Insɛf nɔ du wetin rayt bifo PAPA GƆD in yay, na soso Nebat in bɔypikin we na Jɛroboam in bad abit i falamakata we i bin mek Izrɛl kɔmit sin.

²⁵ Jɛroboam tek ɔl dɛn land we dɛn bin dɔn kapchɔ na di Izrɛlayt dɛn an. I tek frɔm Lɛbo Amath te rich to di Arab Si. Dis bi fɔ lɛ wetin PAPA GƆD in Prɔfɛt we nem Jona we kɔmɔt na Gath Ifɛr we na Amitay in bɔypikin bin dɔn tɔk, bi.

²⁶ PAPA GƆD bin dɔn si se di pipul dɛn na Izrɛl wɛda na fribɔn ɔ slev bin de sɔfa bad bad wan ɛn nɔbɔdi nɔ bin de fɔ ɛp dɛn;

²⁷ ɛn bikɔs i nɔ bin dɔn tɔk se in go wep Izrɛl kɔmɔt na di wɔl kpatakpata, dat mek i yuz Jɛoash in bɔypikin Jɛroboam fɔ sev dɛn.

²⁸ As fɔ di ɔda tin dɛn we Jɛroboam du, lɛkɛ di we we i win batul, we i tek Damaskɔs ɛn Amath bak we bin de insay Juda bawndri, dɛn ɔl rayt na di istri buk bɔt dɛn kiŋ dɛn na Izrɛl.

²⁹ Jɛroboam day ɛn dɛn bɛr am usay dɛn bɛr dɛn kiŋ dɛn na Izrɛl, dɔn in bɔypikin Zɛkaraya tek in ples.