2 Kiŋ 13 - Krio Fɔs Oli Baybul

Kiŋ Jɛoaaz Na Izrɛl

¹ Di ia we mek Kiŋ Joash na Juda we na Aazaya in bɔypikin twɛnti-tri ia as kiŋ, na da ia de Jɛoaaz we na Jeu in bɔypikin bi kiŋ na Izrɛl. Na Sameria i bin tap, ɛn i rul fɔ sɛvintin ia.

² Insɛf nɔ du wetin rayt na PAPA GƆD in yay; i falamakata Nebat in bɔypikin we nem Jɛroboam in bad trik we mek Izrɛl kɔmit sin.

³ Dat mek PAPA GƆD vɛks bad wan pan Izrɛl ɛn an dɛn ova to Kiŋ Azaɛl na Siria, ɛn in bɔypikin Bɛnadad fɔ pas am pan dɛn.

⁴ Jɛoaaz pre to PAPA GƆD ɛn i ansa am. PAPA GƆD si se di kiŋ na Siria bin de mɔna Izrɛl tumɔs,

⁵ so i mek sɔmbɔdi pul Izrɛl kɔmɔt na Siria in an, dɔn Izrɛl rɔnawe. Di Izrɛlayt dɛn go tap bak usay dɛn bin de ɛn liv dɛn layf.

⁶ Bɔt pan ɔl dat dɛn nɔ tap fɔ de du di bad tin we Jɛroboam bin de du we i mek Izrɛl kɔmit sin; dɔn igen da gɔd we nem Ashɛra in lay lay gɔd bin stil de na Sameria.

⁷ Di wan dɛn nɔmɔ we bin lɛf pan Kiŋ Jɛoaaz in ami man dɛn na fifti man dɛn we de rayd ɔs, tɛn karej wit tɛn tawzin sojaman dɛn, bikɔs di kiŋ na Siria bin dɔn nyamanyama dɛn lɛk dɔti na grɔn.

⁸ As fɔ di ɔda tin dɛn we Jɛoaaz du we i bin de rul, dɛn ɔl rayt na di Istri buk bɔt dɛn kiŋ na Izrɛl.

⁹ Jɛoaaz day, ɛn dɛn bɛr am usay dɛn bɛr in grampapa dɛn na Sameria. In bɔypikin Jɛoash tek in ples as kiŋ.

Kiŋ Jɛoash Na Izrɛl

¹⁰ Di ia we mek Joash tati-sɛvin ia as kiŋ na Juda, na da ia de Jɛoash we na Jɛoaaz in bɔypikin bi kiŋ na Izrɛl ɛn na Sameria i bin de rul. I rul fɔ sikstin ia.

¹¹ Insɛf nɔ du wetin rayt na PAPA GƆD in yay ɛn falamakata Nebat in bɔypikin we na Jɛroboam we mek Izrɛl kɔmit sin.

¹² As fɔ di ɔda tin dɛn we Jɛoash du, wetin ɛn wetin i du ɛn di wa we i fɛt wit Kiŋ Amazaya na Juda, dɛn ɔl rayt na di istri buk bɔt dɛn kiŋ na Izrɛl.

¹³ Jɛoash day ɛn dɛn bɛr am na Sameria usay dɛn bɛr dɛn ɔda kiŋ dɛn na Izrɛl. Na Jɛroboam tek in ples fɔ de rul as kiŋ.

Prɔfɛt Ilaɛlsha Day

¹⁴ Prɔfɛt Ilaɛlsha kam sik bad wan ɛn bin wan fɔ day; so Kiŋ Joash na Izrɛl go mit am ɛn kray pan am se “E mi papa! E mi papa! Na yu bin de kɔba Izrɛl!”

¹⁵ Ilaɛlsha tɛl am lɛ i go fɛn bo ɛn aro ɛn kam bak to am, so insɛf go fɛn dɛn kam.

¹⁶ Ilaɛlsha tɛl am lɛ i fiks di aro pan di bo, wɛn di kiŋ dɔn du dat, Ilaɛlsha put in an pan di kiŋ in yon an,

¹⁷ ɛn tɛl am se lɛ i opin di winda we tɔn to Siria ɛn shut; insɛf opin di winda ɛn shut. Na de Ilaɛlsha tɛl am se PAPA GƆD go mek i win ɛn kɔnka Siria, ɛn i go dɔnawe wit dɛn na Efɛk.

¹⁸ Ilaɛlsha tɛl am bak se lɛ i tek di aro dɛn ɛn shut di grɔn. I shut di grɔn tri tɛm nɔmɔ,

¹⁹ nain Ilaɛlsha vɛks pan am se i bin fɔ dɔn shut fayv ɔ siks tɛm, ɛn if i bin du dat, i bin fɔ ebul nyakanyaka di Sirian dɛn kpatakpata; bɔt na tri tɛm nɔmɔ i go ebul dil wit dɛn.

²⁰ Ilaɛlsha day dɛn bɛr am. Ɛnitɛm we nyu ia de bigin na da tɛm de dɛn Moabayt dɛn kin go red di Izrɛlayt dɛn.

²¹ Wan de di Izrɛlayt dɛn go bɛr wan man, na de dɛn si sɔm man dɛn we kam red dɛn eria so dɛnsɛf fliŋ di dedebɔdi insay di grev we dɛn bɛr Ilaɛlsha. Wɛn di dedebɔdi tɔch Ilaɛlsha in bon dɛn, di day man wek ɛn tinap deŋ.

Izrɛl Ɛn Siria Fɛt Wa

²² Kiŋ Azaɛl na Siria bin de mɔna Izrɛl ɔl di tɛm we Jɛoaaz bin de rul de.

²³ Bɔt PAPA GƆD bin de sɔri fɔ Izrɛl ɛn bin de ɛp dɛn bikɔs ɔf di Kɔvinant we i bin dɔn sayn wit Ebraam, Ayzak ɛn Jekɔb. Ɔp to da tɛm de, i nɔ bin mekɔp fɔ dɔnawe wit di Izrɛlayt dɛn.

²⁴ We Kiŋ Azaɛl na Siria day, in bɔypikin Bɛnadad tek in ples ɛn bigin rul as kiŋ.

²⁵ Dɔn Jɛodaaz in bɔypikin we na Jɛoash go kapchɔ bak dɛn siti dɛn we Bɛnadad in papa Azaɛl bin tek na Jɛoaaz in an we dɛn bin de fɛt wa. Na tri tɛm Jɛoash bit Bɛnadad pan wa we i tek ɔl di Izrɛl siti dɛn bak nain an.