Sɛkɛn Lɛta Fɔ Tɛsalonayka 2 - Krio Fɔs Oli Baybul

Di Wan we de Fɛt Gɔd

¹ Mi Kristiɛn pipul dɛn, sɔm pipul de tɔk se di De we di Masta go kam ɛn gɛda wi ɔl rawnd insɛf, dɔn kam, bɔt a de beg una, mek una

² nɔ mek dɛn kɔnfyus una ɔ mek una wɔri if wetin una de tink nɔ rayt. Sɔntɛm pipul min se na wɛn wi de tɔk di wɔd we Gɔd tɛl wi fɔ tɔk nain wi tɔk se di de we di Masta fɔ kam dɔn kam, ɔ na wɛn wi de lan pipul bɔt Gɔd nain wi tɔk so, ɔ na lɛta a rayt dat.

³ Mek nɔbɔdi nɔ mek una ful. Di de we di Masta go kam bak nɔ go kam sote di tɛm we plɛnti pipul go tɔn dɛn bak pan Gɔd ɛn sote di wan we de fɛt Gɔd sho insɛf, in we Gɔd go pwɛl ɔltogɛda na ɛl.

⁴ Di wan we de fɛt Gɔd nɔ go tek dɛn tin ɛn dɛn spirit we pipul de pre to mek natin. I go fil se in gɛt pawa pas ɔl dɛn tin de ɛn i go sidɔm na Gɔd in Os ɛn se in na Gɔd.

⁵ Una nɔ mɛmba? A bin tɛl una bɔt ɔl dat di tɛm we a bin de wit una.

⁶ Unasɛf no di pawa we tap di wan we de fɛt Gɔd mek i nɔ kam yet, te in yon tɛm rich fɔ sho insɛf.

⁷ Bɔt naw naw plɛnti pipul de du dɛn tin we Gɔd se wi nɔ fɔ du, ɛn na wetin Gɔd dɔn sho wi mek wi ebul ɔndastand dis. Bɔt ɔl dɛn tin we go bi na wɔl, nɔ go apin sote Gɔd pul di wan we de mek dɛn nɔ bi, kɔmɔt na rod.

⁸ Na da tɛm de di wan we de fɛt Gɔd go sho insɛf. Bɔt wɛn Masta Jizɔs go kam, i go kil am wit di briz we de kɔmɔt nain mɔt ɛn wit di brayt layt we de rawnd am.

⁹ Di wan we de fɛt Gɔd go kam wit Setan in pawa ɛn i go kam sho se in gɛt ɔl kayn pawa we i du plɛnti big wok we go mek pipul ful,

¹⁰ ɛn i go du ɔl kayn bad tin we go mek dɛn pipul we go go ɛl, ful. Dɛn go go ɛl, bikɔs dɛn nɔ bin gri fɔ yɛri di tru wɔd ɛn dɛn nɔ bin lɛk di tru wɔd bɔt wi Masta Jizɔs we bin go mek Gɔd sev dɛn.

¹¹ Na dat mek Gɔd nɔ alaw dɛn fɔ tink rayt so dat dɛn go biliv tin we na lay.

¹² Ɛn na dat mek Gɔd go kɔndɛm dɛn pipul we gladi fɔ de sin ɛn we nɔ biliv di tru wɔd bɔt wi Masta Jizɔs.

Gɔd Dɔn Pik Una fɔ Sev Una

¹³ Mi Kristiɛn pipul dɛn we di Masta lɛk, wi fɔ tɛl Gɔd tɛnki fɔ una ɔltɛm, bikɔs frɔm we di wɔl bigin, Gɔd bin dɔn pik una fɔ sev una bay we i mek in Spirit mek una bi in yon pipul dɛn ɛn bay we una put ɔl una at pan di Gud Nyuz bɔt Krays.

¹⁴ Gɔd kɔl una fɔ bi in yon pipul dɛn tru di Gud Nyuz we wi tɛl una; i kɔl una fɔ gɛt pan di wɔndaful pawa ɛn ɔna we Masta Jizɔs Krays gɛt.

¹⁵ Wi Kristiɛn pipul dɛn, una nɔ fɔ chenj wetin una biliv, ɛn ɔltɛm una at fɔ de pan ɔl wetin wi pipul dɛn bin lan wi, ɛn we wisɛf bin lan una, wɛn wi bin de tɔk to una ɛn wɛn wi rayt una di fɔs lɛta.

¹⁶ Wi de pre mek wi Masta Jizɔs Krays insɛf, ɛn Gɔd we na wi Papa, we lɛk wi ɛn mek wi gɛt kɔrej ɔltɛm bikɔs i gud ɛn mek wi ebul bia wet fɔ wetin gud,

¹⁷ kɔrej una ɛn ɛp una fɔ du ɛn tɔk ɔl wetin gud.