Jɔn In Sɛkɛn Lɛta 1 - Krio Fɔs Oli Baybul

¹ Mi, Jɔn we na una bigman na di chɔch, de rayt to di uman we Gɔd dɔn pik ɛn in pikin dɛn we a lɛk fɔ tru. Nɔto mi wangren, bɔt ɔlman we no wetin tru, lɛk una,

² bikɔs wetin tru de na wi at ɛn i go de wit wi sote go.

³ Mek Gɔd wi Papa, ɛn in Pikin, Jizɔs Krays, blɛs wi, sɔri fɔ wi, ɛn gi wi kol at; mek ɔl dɛn tin ya bi to wi we no ɛn biliv wetin tru ɛn lɛk wi kɔmpin mɔtalman.

Aw fɔ Lɛk

⁴ A bin gladi bad we a yɛri se sɔm pan yu pikin dɛn de fala wetin tru, lɛkɛ aw wi Papa tɛl wi fɔ du.

⁵ So, uman we a lɛk fɔ tru, a de beg yu: lɛ wi lɛk wi kɔmpin. Dis tin we a de rayt tɛl yu fɔ du, nɔto nyu tin; na tin we wi bin dɔn no frɔm we yu bi Kristiɛn.

⁶ Di kayn lɛk we a min nain dis: Wi fɔ lɛk wi kɔmpin lɛkɛ aw Gɔd tɛl wi fɔ du. Wetin una bin dɔn yɛri frɔm we una bi Kristiɛn nain dis: Una ɔl fɔ lɛk una kɔmpin.

⁷ Plɛnti pipul we de mek dɛn kɔmpin ful de ɔlɔbɔt na wɔl, dɛn nɔ de tɔk se Jizɔs Krays kam na wɔl lɛkɛ mɔtalman; dɛn de lay ɛn dɛn nɔ lɛk Krays.

⁸ Una tek tɛm, mek una nɔ lɔs wetin una dɔn wok fɔ, so una go gɛt ɔl wetin Gɔd dɔn prɔmis una.

⁹ Ɛnibɔdi we nɔ jɛs de lan pipul wetin Krays lan am nɔmɔ, bɔt i de lan dɛn ɔda tin miks, da pɔsin de nɔ gɛt Gɔd nain at. Ɛnibɔdi we de lan pipul wetin Krays lan am, di Papa ɛn in Pikin de nain at.

¹⁰ If ɛnibɔdi we nɔ biliv wetin Krays dɔn lan wi, kam to una fɔ lan una ɛnitin, una nɔ fɔ kip am na una os; una nɔ fɔ tɛl am adu sɛf.

¹¹ Bikɔs ɛnibɔdi we tɛl am adu dɔn jɔyn an wit am fɔ du di bad wok we i de pan.

Di Las Wɔd dɛn na dis Lɛta

¹² A gɛt plɛnti tin fɔ tɛl una, bɔt a nɔ want rayt ɔltin wit pɛn ɛn pepa; misɛf abop fɔ kam luk una ɛn tɔk to una fes to fes, so dat wi go gladi gud gud.

¹³ Yu sista, we Gɔd dɔn pik, in pikin dɛn de tɛl yu adu.