2 Kɔrint 9 - Krio Fɔs Oli Baybul

Kristiɛn dɛn fɔ Ɛp dɛn Kɔmpin Kristiɛn

¹ A nɔ gɛt fɔ rayt tɛl una bɔt wetin di Kristiɛn dɛn fɔ sɛn go Judia fɔ ɛp dɛn kɔmpin Kristiɛn.

² Bikɔs a no se una want ɛp, ɛn a dɔn tɔk to di pipul dɛn na Masidonia, se, “Di Kristiɛn brɔda dɛn na Gris dɔn rɛdi fɔ ɛp una sins las ia.” Plɛnti pan dɛn dɔn bigin ɛp we dɛn yɛri aw una want ɛp bad bad.

³ A de sɛn dɛn brɔda ya go to una naw so dat di gud we wi dɔn tɔk bɔt una fɔ di ɛp we una de ɛp nɔ go bi ɛmti tɔk. Bɔt una go rɛdi wit wetin una want gi fɔ ɛp di wok, lɛkɛ aw a bin se.

⁴ If una nɔ rɛdi ɛn di pipul dɛn we kɔmɔt Masidonia kam wit mi si se una nɔ gɛt natin yet, wi go shem bad bad ɛn una go shem pas wi bikɔs wi bin dɔn shɔ se una go ɛp.

⁵ Na dat mek a bin fil se a mɔs tɛl dɛn brɔda ya fɔ tray go to una bifo misɛf kam, ɛn ɛp una rɛdi wetin una dɔn prɔmis fɔ gi bifo a de rich to una, so di tin we una prɔmis go dɔn rɛdi wɛn a kam ɛn dat go sho se una de gi bikɔs una want fɔ gi, nɔto bikɔs dɛn de fos una fɔ gi.

⁶ Una fɔ mɛmba se pɔsin we nɔ plant plɛnti sid nɔ go gɛt plɛnti tin fɔ pik, bɔt pɔsin we plant plɛnti sid go gɛt plɛnti plɛnti tin fɔ pik.

⁷ So ɔlman fɔ gi wetin i mekɔp fɔ gi, i nɔ fɔ sɔri ɛn i nɔ fɔ jɛs gi nɔmɔ bikɔs dɛn fos am fɔ gi; Gɔd lɛk pɔsin we gladi fɔ gi wetin i de gi.

⁸ Ɛn Gɔd ebul gi una ɔl wetin una nid fɔ gɛt, ɛn mɔ, so dat una go gɛt ɔl wetin una nid fɔ gɛt fɔ unasɛf, ɛn plɛnti mɔ we una go tek ɛp ɔda pipul.

⁹ Lɛkɛ aw dɛn rayt na Gɔd in Buk we dɛn se, “I de gi dɛn wan we nɔ gɛt, plɛnti tin; di gud we i de du go de sote go.”

¹⁰ Gɔd, we de gi fama sid fɔ plant, ɛn we de gi wi bred fɔ it, go gi una ɔl di sid we una fɔ gɛt, ɛn mek dɛn gro, so aw una gi plɛnti, na so i go mek una gɛt plɛnti ɛn mek una ebul du plɛnti gud mɔ ɛn mɔ.

¹¹ So aw Gɔd go de gi una mɔ ɛn mɔ, na so unasɛf go ebul gi mɔ ɛn mɔ, ɛn di pipul dɛn go tɛl Gɔd tɛnki fɔ di tin dɛn we una gi wi fɔ gi dɛn.

¹² Dis wok we wi de du so nɔ jɛs de mek Gɔd in pipul dɛn gɛt ɔl wetin dɛn fɔ gɛt, i de mek dɛn tɛl Gɔd plɛnti tɛnki.

¹³ Dis wok we una de du, de sho se una biliv Gɔd fɔ tru. Dat go mek di pipul dɛn we wi de gi dɛn tin ya, prez Gɔd, bikɔs una de fala di Gud Nyuz we una de tɛl pipul bɔt, ɛn bikɔs una de gi dɛn ɛn ɔda pipul dɛn plɛnti tin.

¹⁴ Ɛn dɛn go pre fɔ una wit ɔl dɛn at fɔseka dɛn wɔndaful tin dɛn ya we Gɔd dɔn du fɔ una, we i mek una ebul gi dɛn plɛnti tin.

¹⁵ Lɛ wi tɛl Gɔd tɛnki fɔ in Pikin we i dɔn gi wi fɔ natin, we wɔndaful pas ɔl.