2 Kɔrint 8 - Krio Fɔs Oli Baybul

Aw Kristiɛn dɛn fɔ Gi fɔ Ɛp dɛn Kɔmpin

¹ Mi kɔmpin Kristiɛn dɛn, wi want fɔ mek una no di gud we Gɔd dɔn du na di chɔch dɛn na Masidonia.

² Pan ɔl we big big waala bin mit di Kristiɛn dɛn ɛn dɛn na bin po po pipul, dɛn bin gladi fɔ ɛp ɔda pipul ɛn giwe plɛnti plɛnti tin.

³ A de tɛl una fɔ tru se, dɛn gi ɔmɔs dɛn ebul, ɛn pas dat sɛf.

⁴ Na dɛnsɛf sɛf beg wi fɔ mek dɛn gi Gɔd in pipul dɛn na Judia plɛnti tiŋs, dɛn se paopa dɛnsɛf fɔ gɛt di chans fɔ ɛp fɔ gi dɛn sɔntin.

⁵ Wi nɔ bin de abop sɛf se dɛn go du so; dɛn gi Gɔd dɛn layf fɔs, dɔn dɛn lɛf dɛnsɛf na wi an lɛkɛ aw Gɔd want dɛn fɔ du.

⁶ So wi tɔk to Taytɔs, we bigin dis wok mek i tray nɔ fɔ lɛf am ɛn mek i ɛp una fɔ dɔn dis spɛshal wok we una de du we una de gi plɛnti tin, bikɔs una lɛk una kɔmpin wit ɔl una at.

⁷ Ɔltin we una gɛt, plɛnti; ɔl wetin una de du, una de du dɛn gud: una biliv Gɔd gud gud, una ebul tɔk fayn, una sabi plɛnti tin, una want ɛp una kɔmpin bad bad, ɛn una lɛk wi bad. So una fɔ du dis wok ya we una de du wit ɔl una at.

⁸ A nɔ de gi una lɔ. Bɔt we a de tɛl una aw ɔda pipul want ɛp fɔ du dis wok bad bad, a de tray fɔ si if di lɛk we una lɛk fɔ gi, kɔmɔt na una at.

⁹ Unasɛf no aw Masta Jizɔs gud; pan ɔl di jɛntri we i bin jɛntri na ɛvin, i kam tɔn po man fɔseka una, so dat bay di po we i po i go mek una jɛntri na ɛvin.

¹⁰ Una lisin mek a tɛl una wetin a tink bɔt dis tin: i bɛtɛ fɔ mek una dɔn wetin una bin dɔn bigin du las ia, wantɛm. Na una fɔs bin bigin gi Gɔd in pipul dɛn, ɛn na una fɔs bin want fɔ gi sɔntin.

¹¹ Una fɔ kɛriɔn wit di wok ɛn dɔn am! Jɛs lɛkɛ aw una bin want plan di wok bad bad, na so una fɔ want dɔn am naw, ɛn una fɔ gi bay aw una mitɔp fɔ gi.

¹² If una gɛt tin we una want gi bad bad, Gɔd go gri fɔ wetin una gi bay wetin una gɛt, nɔto bay wetin una nɔ gɛt.

¹³ A nɔ de tray fɔ pul ɔda pipul yon lod kɔmɔt pan dɛn ɛn put am pan una;

¹⁴ we una jɛntri naw, na una fɔ ɛp dɛn wan we nɔ gɛt. So di tɛm we una nɔ gɛt, dɛn wan we jɛntri go ɛp una. Da we de, nɔbɔdi nɔ go gɛt pas in kɔmpin.

¹⁵ Lɛkɛ aw dɛn rayt na Gɔd in Buk se, “Di man we gɛda plɛnti nɔ go gɛt pasmak, ɛn di man we nɔ bin gɛda bɛtɛ bin gɛt wetindu fɔ am.”

Taytɔs ɛn In Wokmet dɛn

¹⁶ Wi tɛl Gɔd tɛnki, tɛnki we i mek Taytɔs in at opin fɔ ɛp una!

¹⁷ Nɔto fɔ se i gladi nɔmɔ fɔ go to una wɛn wi aks am fɔ go fɛn una; bɔt i bin so gladi fɔ go ɛp una dat insɛf mekɔp se in go go to una.

¹⁸ Da wi brɔda we ɔlman rɛspɛkt na ɔl dɛn chɔch fɔseka aw i de tɛl pipul di Gud Nyuz, nain wi de sɛn wit Taytɔs to una.

¹⁹ Ɛn igen, na di chɔch dɛnsɛf pik am fɔ go wit wi wɛn wi de kɛr mɔni go gi di Kristiɛn dɛn na Judia, so dat Gɔd go gɛt di prez, ɛn dɛn go si se wi want fɔ ɛp dɛn.

²⁰ Wi nɔ want mek pipul kɔmplen bɔt aw wi de yus dɛn plɛnti tin ya we una gi wi fɔ gi dɛn pipul na Judia.

²¹ Wi mekɔp fɔ du wetin rayt, bifo Gɔd ɛn bifo man.

²² So wi de sɛn wi brɔda fɔ go wit dɛn; wi dɔn tray am plɛnti tɛm ɛn wi dɔn si se i want fɔ ɛp bad bad ɔltɛm. Ɛn naw we i trɔs una gud fashin, i want fɔ ɛp una mɔ.

²³ Na mi ɛn Taytɔs de wok, i de wok wit mi fɔ ɛp una; dɛn ɔda brɔda dɛn we de go wit am kɔmɔt na dɛn difrɛn difrɛn chɔch we sɛn dɛn fɔ kam ɛp una. Dɛn de sho aw Krays wɔndaful, bay dis wok we dɛn de du.

²⁴ Una fɔ sho dɛn se una lɛk dɛn, so ɔl di chɔch dɛn go no fɔ tru se una lɛk dɛn, ɛn dɛn go no se wi rayt we wi de bost bɔt una.