2 Kɔrint 5 - Krio Fɔs Oli Baybul

¹ Wi no se if dis os, we wi tap insay na dis wɔl, we na wi bɔdi, dɔn pwɛl, Gɔd go gɛt os fɔ wi na ɛvin we insɛf mek, ɛn da os de go de sote go.

² Wi de pini naw bikɔs wi want wɛr wi nyu klos, dat is, wi want go na di os we Gɔd mek fɔ wi na ɛvin,

³ bikɔs wɛn wi de insay wi os we de na ɛvin, wi nɔ go de nekɛd.

⁴ Wɛn wi de insay wi os we de na dis wɔl, dat na wi bɔdi, wi de pini lɛkɛ se na ebi ebi lod wi tot; nɔto fɔ se wi want kɔmɔt insay di bɔdi we wi gɛt na dis wɔl, bɔt wi want mek Gɔd put di bɔdi we kɔmɔt ɛvin pan wi, so dat dis bɔdi ya we de day go gɛt layf we go de sote go.

⁵ Na Gɔd dɔn rɛdi dis nyu os fɔ wi ɛn i dɔn gi wi in Spirit fɔ mek wi no fɔ tru se i dɔn gɛt ɔl dɛn tin ya fɔ wi.

⁶ So we wi no dɛn tin ya, wi at nɔ pwɛl. Wi no se ɔl di tɛm we dis wi bɔdi ya na wi os, wi nɔ go na di os we Gɔd kip fɔ wi, yet.

⁷ Na so i bi, bikɔs wi liv bay wetin wi biliv, wi nɔ liv bay wetin wi de si.

⁸ Wi at nɔ de pwɛl ɛn wi bin ivin want kɔmɔt insay dis bɔdi we na wi os go de na wi ɔda os wit di Masta.

⁹ Bɔt, wɛda na dis os wi de ɔ na di os na ɛvin, di tin we wi want pas ɔl na fɔ du dɛn tin we go mek di Masta satisfay wit wi.

¹⁰ Wi ɔl gɛt fɔ tinap bifo Krays fɔ mek i jɔj wi. Ɔlman go gɛt wetin i wok fɔ wɛn i bin de na dis layf, if na gud i wok fɔ, i go gɛt gud; if na bad igen, i go gɛt bad.

Krays Dɔn Mek Wi Bi Gɔd In Padi dɛn

¹¹ Wi no wetin i min fɔ fred Gɔd, so wi de tray fɔ tɔk to ɔda pipul mek dɛnsɛf go fred Gɔd. Gɔd no wi gud wan, ɛn a op se unasɛf ɔndastand wi gud.

¹² Wi nɔ de tray fɔ tɛl una igen se wi gud; wi de tray fɔ mek una gɛt rizin fɔ gladi fɔ wi, so dat una go ebul ansa dɛn wan we de mek prawd bɔt wetin dɛn de du ɛn wetin ɔda pɔsin kin si, bɔt wetin de insay dɛn at nɔ gud.

¹³ We wi de tɔk so bɔt wisɛf, nɔto fɔ se wi ed nɔ de, bɔt na fɔ lɛ Gɔd gɛt di prez. If una biliv se wi gɛt sɛns we wi de tɔk so, na fɔ ɛp una mek wi de tɔk so.

¹⁴ Na di lɛk we Krays lɛk wi de rul wi, bikɔs naw wi si se wan man dɔn day fɔ ɔlman, so dat min se ɔlman dɔn day wit am.

¹⁵ I day fɔ ɔlman so dat dɛn wan we gɛt layf nɔ go liv fɔ dɛnsɛf nɔmɔ, bɔt dɛn go jɛs liv nɔmɔ fɔ di wan we dɔn day, we Gɔd mek rayz frɔm di grev fɔseka dɛn.

¹⁶ So wi nɔ fɔ luk ɛnibɔdi igen lɛkɛ aw mɔtalman de luk dɛn. If wi bin de luk Krays fɔstɛm lɛkɛ aw mɔtalman de luk pɔsin, wi nɔ fɔ du so igen.

¹⁷ Ɛnibɔdi we gɛt wanwɔd wit Krays, dɔn bi nyu pɔsin, di layf we i bin liv fɔstɛm dɔn dɔn, na nyu layf i liv naw.

¹⁸ Na Gɔd du ɔl dis, nain mek Krays mek wi bi in padi dɛn, so dat wi go tap fɔ bi pipul we nɔ lɛk am, ɛn di wok we Krays gi wi na fɔ mek wi go mek ɔda padi dɛn fɔ Gɔd.

¹⁹ Wi de tɛl pipul se Gɔd de mek mɔtalman bi Gɔd in padi dɛn tru Krays. Gɔd nɔ de mak mɔtalman in sin igen fɔ pɔnish am bambay, ɛn i dɔn tɛl wi fɔ tɛl dɛn aw dɛn go bi in padi dɛn.

²⁰ So na di mɛsej dis we Krays gi wi fɔ una, lɛkɛ se Gɔd insɛf de tɔk to una; na fɔseka Krays, wi de beg una: una alaw Gɔd mek i mek una tap fɔ bi pipul we nɔ lɛk am, ɛn bi in padi dɛn.

²¹ Krays nɔ bin gɛt sin, bɔt fɔ sev wi, Gɔd put wi sin dɛn pan am, so dat we wi gɛt wanwɔd wit am, ɔltin go rayt bitwin wi ɛn Gɔd.