2 Kɔrint 4 - Krio Fɔs Oli Baybul

Tin we Mɔni Nɔ Ebul Bay de insay Kɔntri Pɔt

¹ We Gɔd dɔn sɔri fɔ wi ɛn gi wi dis wok ya fɔ du, wi nɔ go gri mek ɛnitin mek wi at pwɛl.

² Wi dɔn lɛf fɔ du dɛn tin we wi bin de ayd fɔ du we bin de mek wi shem; wi de waka tret wit pipul, wi nɔ de twis Gɔd in wɔd; wi no se Gɔd de luk wi, so wi de tɔk ɔl wetin tru bɔt Gɔd, so dat ɔlman go satisfay se wetin wi de tɔk na di rayt tin.

³ If sɔm pan dɛn pipul we de yɛri di Gud Nyuz we wi de tɛl dɛn, nɔ ɔndastand am, na dɛn wan nɔmɔ we de go ɛl.

⁴ Dɛn nɔ biliv wetin wi de tɔk bikɔs Setan dɔn blɛn dɛn yay. I mek dɛn nɔ ebul si di layt we de shayn pan dɛn; da layt de na di Gud Nyuz bɔt aw Krays, we na Gɔd in tru pikchɔ, wɔndaful.

⁵ Nɔto wisɛf wi de tɛl una bɔt; wi de tɛl una se Jizɔs Krays na wi Masta ɛn wi na una savant fɔseka am.

⁶ Gɔd we se, “Layt go kɔmɔt na da say we dak!” Na di sem Gɔd mek in layt shayn insay wi at ɛn da layt de we de shayn na Krays in fes, nain de mek wi no aw Gɔd wɔndaful.

⁷ Dis wɔndaful layt ɛn pawa we di Spirit de gi, ɛn we mɔni nɔ ebul bay, de insay wi we jɛs tan lɛkɛ kɔntri pɔt. Dat sho se di pawa fɔ kɔntrol ɔltin de na Gɔd in an, i nɔ de na wi an.

⁸ Plɛnti tɛm waala kin mit wi, bɔt i nɔ de sink wi go dɔŋ; plɛnti tɛm wi kin dawt, bɔt wi at nɔ kin pwɛl.

⁹ Plɛnti pipul nɔ lɛk wi, bɔt ɔltɛm Gɔd de wit wi; tɛm kin kam we pipul kin ib wi dɔŋ, bɔt dɛn nɔba ebul kil wi.

¹⁰ Di day we Jizɔs day de na wi bɔdi ɔltɛm, so dat pipul go si in layf na wi bɔdi ɔltɛm.

¹¹ Ɔl di tɛm we wi liv na dis layf fɔseka Jizɔs, ɔltɛm wi de na day rod, so dat pipul go si in layf pan wi we na mɔtalman.

¹² Ɔltɛm wi de na day rod so dat una go gɛt da layf we go de sote go.

¹³ Dɛn rayt na Gɔd in Buk se, “A bin biliv wetin Gɔd tɛl mi, na dat mek a tɔk am.” Wi biliv, so wisɛf de tɔk wetin wi biliv.

¹⁴ Wi no se Gɔd we mek Masta Jizɔs rayz frɔm di grev go mek wisɛf rayz frɔm wi grev go jɔyn Masta Jizɔs ɛn briŋ wi, ɛn unasɛf, kam na di ples we i de.

¹⁵ Ɔl dis na fɔseka una; ɛn as Gɔd de sho mɔ ɛn mɔ pipul aw i gud, dɛn go de tɛl Gɔd tɛnki mɔ ɛn mɔ ɛn sho aw i wɔndaful.

Wi fɔ Put Wi At pan dɛn Tin we Pɔsin Nɔ de Si

¹⁶ Na di rizin dis we mek wi nɔ de gri mek wi at pwɛl ɛn tap fɔ wok. Pan ɔl we wi bɔdi de wes, nyu layf de kam insay wi ɛvri de.

¹⁷ Di lili sɔfa we wi de sɔfa fɔ dis shɔt tɛm go mek wi gɛt blɛsin ɛn ɔna sote go, ɛn di blɛsin ɛn ɔna go pas di sɔfa we wi de sɔfa naw, fawe.

¹⁸ Dat bi bikɔs wi dɔn put wi at pan dɛn tin we wi nɔ de si, wi nɔ put am pan dɛn tin we wi de si. Dɛn tin we wi de si nɔ de las, bɔt dɛn tin we wi nɔ de si go de sote go.