2 Kɔrint 3 - Krio Fɔs Oli Baybul

Di Nyu Bagin we Gɔd Mek

¹ Wi dɔn bigin bost se wi na gud pipul? Ɔ wisɛf fɔ bigin du lɛkɛ aw sɔm ɔda pipul de du, wi fɔ kɛr lɛta to una fɔ mek una no if wi gud? Ɔ na una fɔ sɛn lɛta bɔt wi to ɔda pipul?

² Na una na wi lɛta we rayt insay wi at, ɔlman go no am, ɔlman go rid am.

³ Una dɔn sho plen wan se na una na di lɛta we Krays rayt, we wi dɔn briŋ. Nɔto ink wi tek rayt am pan ston slab, na Gɔd we gɛt layf sote go, in Spirit rayt am na wi at.

⁴ Wi de tɔk dɛn tin ya bikɔs wi abop pan Gɔd tru Krays.

⁵ Wi nɔ ebul du ɛnitin bay wisɛf, so wi nɔ go tɔk se wi ebul, na Gɔd de mek wi ebul du ɛnitin we wi de du.

⁶ Semwe, i dɔn mek wi ebul tɔk bɔt di nyu agrimɛnt we i mek wit wi; nɔto tin we rayt na buk Gɔd tek mek di agrimɛnt, na Gɔd in Spirit mek am; bikɔs dɛn tin we rayt de kil, bɔt Gɔd in Spirit de gi layf.

⁷ Bɔt if di Lɔ we rayt pan ston we briŋ day so wɔndaful, dat di Izrɛl pipul dɛn nɔ bin ebul luk Mozis in fes we bin de shayn brayt brayt wan, pan ɔl we da layt de bin de fed,

⁸ di wok we wi de du fɔ di Spirit go wɔndaful fawe pas dat!

⁹ If di tin we Mozis du we kɔndɛm mɔtalman, wɔndaful, di tin we Gɔd du we mek ɔltin rayt bitwin in ɛn mɔtalman, wɔndaful fawe pas dat.

¹⁰ Wi go se di tin we bin wɔndaful nɔ wɔndaful igen, bikɔs tin we wɔndaful fawe pas dat dɔn kam.

¹¹ If tin we nɔ las lɔŋ bin wɔndaful, tin we go de sote go, go wɔndaful fawe pas am.

¹² We wi no se di wɔndaful tin we Gɔd dɔn du go de sote go, wi nɔ fred fɔ du wi wok.

¹³ Wi nɔ tan lɛkɛ Mozis we bin gɛt fɔ kɔba in fes, so dat di Ju pipul dɛn nɔ go si di wɔndaful layt we bin de fed.

¹⁴ Sɔntin bin mek dɛn nɔ ebul ɔndastand, fɔ tru; te tide sɛf di sem tin nɔ de mek dɛn ebul ɔndastand wɛn dɛn de rid dɛn buk we tɔk bɔt di ol agrimɛnt. Na wɛn pɔsin gɛt wanwɔd wit Krays nɔmɔ, nain da tin de de kɔmɔt nain ed.

¹⁵ Te tide, ɛnitɛm we dɛn de rid di Lɔ we Gɔd gi Mozis, di tin stil nɔ de mek dɛn ebul ɔndastand.

¹⁶ Bɔt Gɔd dɔn pul am kɔmɔt pan dɛn; dɛn rayt na Gɔd in Buk se, “Gɔd pul di tin we kɔba Mozis in fes wɛn i kam to di Masta.”

¹⁷ Di “Masta” we dɛn de tɔk bɔt na ya, na di Spirit; ɛni say we di Masta in Spirit de, pipul fri.

¹⁸ So wɛn Gɔd dɔn pul di tin we nɔ de mek dɛn ebul ɔndastand, wi ɔl go tan lɛkɛ glas; ɛnibɔdi we luk wi go si aw di Masta wɔndaful, ɛn Gɔd in Spirit go de mek wisɛf wɔndaful mɔ ɛn mɔ, lɛkɛ aw di Masta, we pipul de si pan wi, wɔndaful.