2 Kɔrint 12 - Krio Fɔs Oli Baybul

Dɛn Tin we Gɔd Sho Pipul

¹ A go bost pan ɔl we a nɔ gɛt ɛnitin fɔ gen pan dat. Bɔt naw a de kam tɔk bɔt dɛn tin we Gɔd sho mi ɛn mek a no.

² A no wan Kristiɛn man we bin fɛn insɛf ɔp ɔp insay ɛvin kwik wan so wande, fotin ia dɔn pas naw frɔm we dat bi (a nɔ no if nain bɔdi i go wit na ɛvin ɔ nain spirit nɔmɔ; na Gɔd wangren no).

³ A de tɔk wetin a se bak (a nɔ no if nain bɔdi i go wit na ɛvin ɔ nain spirit nɔmɔ; na Gɔd wangren no). A no se dis man ya fɛn insɛf na di say we dɛn kɔl Paredays kwik kwik wan, wande.

⁴ Na de i yɛri dɛn tin we mɔtalman nɔ ebul tɔk na dɛn yon laŋwej ɛn we dɛn nɔ fɔ tɔk bɔt.

⁵ Na dis man ya a go bost bɔt, a nɔ go bost bɔt misɛf, pas nɔmɔ a bost bɔt dɛn tin we sho se a nɔ gɛt pawa.

⁶ If a bin want bost bɔt misɛf, a nɔ bin go de tɔk lɛkɛ fulman, bikɔs na tru a bin go de tɔk. Bɔt a nɔ go bost bɔt misɛf bikɔs a nɔ want mek pipul tink se mi na bɛtɛ pɔsin pas di kayn pɔsin we di wɔd dɛn we a de tɔk ɛn di tin dɛn we a de du, sho se a bi.

⁷ Bɔt fɔ mek dɛn plɛnti wɔndaful tin we a si nɔ mek a prawd, Gɔd put sik pan mi we de mek mi bɔdi at mi bad; da sik de tan lɛkɛ sik we Setan sɛn pan mi fɔ ambɔg mi, mek a nɔ go prawd.

⁸ Tri tɛm a dɔn pre ɛn aks Gɔd mek i pul dis tin ya pan mi.

⁹ Gɔd ansa se, “Di gud we a de du fɔ yu, du fɔ yu, bikɔs wɛn pɔsin nɔ ebul du ɛnitin fɔ insɛf, na da tɛm de mi pawa big pas ɔl nain layf.” So a gladi we a de fil prawd bɔt di sik we a sik, so dat a kin no se Krays in pawa de wit mi.

¹⁰ Fɔseka Krays, a satisfay wit di sik we de pan mi, dɛn kɔs we pipul kɔs mi, waala, di fɛt we pipul fɛt mi, ɛn traŋa layf, bikɔs di tɛm we a nɔ ebul fɔ ɛp misɛf, na da tɛm de a gɛt Gɔd in pawa.

Pɔl Want Ɛp di Kristiɛn dɛn na Kɔrint

¹¹ A de du lɛkɛ se mi na ful; bɔt na una mek a de du so. Na una bin fɔ tɔk gud bɔt mi, nɔto misɛf fɔ tɔk bɔt misɛf. Bikɔs dɛn una “apɔsul” dɛn nɔ bɛtɛ pas mi, pan ɔl we mi nɔto ɛnibɔdi.

¹² Dɛn tin we sho se mi na apɔsul na ɔl wetin a du wɛn a de wit una, pan ɔl we pipul nɔ want biliv dɛn; dat na dɛn wɔndaful wok we sho Gɔd in pawa ɛn dɛn wɔndaful sayn we sho wetin gɛt fɔ bi.

¹³ Aw a nɔ trit una di sem we lɛkɛ aw a de trit dɛn ɔda chɔch pipul, pas nɔmɔ we a nɔ wɔri una fɔ ɛp mi? Una padin mi, wetin a du so nɔ fayn.

¹⁴ Na di tɔd tɛm dis we a rɛdi fɔ kam fɛn una, ɛn a nɔ go aks una fɔ ɛnitin. Na una a kam fɔ ɛp, a nɔ want una mɔni. Na mama ɛn papa de gi pikin wetin dɛn want, nɔto pikin de gi dɛn mama ɛn papa wetin dɛn want.

¹⁵ A go gladi fɔ gi ɔl wetin a gɛt, ɛn misɛf, fɔ ɛp una. Di mɔ we a lɛk una, nain i tan lɛkɛ se una nɔ lɛk mi bɛtɛ.

¹⁶ Una go gri se a nɔ put lod pan una. Bɔt sɔm pan una go tɔk se, a ple trik pan una, a tek lay kech una.

¹⁷ A tek advantej pan una wɛn a sɛn pɔsin go to una?

¹⁸ Na Taytɔs a koks fɔ go to una ɛn a sɛn di ɔda Kristiɛn brɔda fɔ fala am. Una want tɛl mi se Taytɔs tek advantej pan una? Nɔto Gɔd in Spirit de mek wi tu du dis wok? Nɔto di sem we wi tu de wok?

¹⁹ Sɔntɛm una dɔn de tink ɔl dis tɛm se wi de tray fɔ tɔk mek una go gladi fɔ wi. Nɔto dat wi want du, wi de tɔk bifo Gɔd wetin Krays want mek wi tɔk. Mi padi dɛn, ɔl wetin wi de du na fɔ ɛp una.

²⁰ A de fred se wɛn a rich de a go si se una difrɛn frɔm aw a go lɛk fɔ mek una tan ɛn unasɛf go si se misɛf difrɛn frɔm aw una want mi fɔ tan. A de fred se a go kam mit plaba, wam at, kɔs, kɔnfyushɔn, pipul we de jɛlɔs dɛn kɔmpin, dɛn wan we de koŋosa dɛn kɔmpin, dɛn wan we want ɔltin fɔ dɛnsɛf, ɛn pipul we prawd.

²¹ A de fred se wɛn a kam di sɛkɛn tɛm, Gɔd go mek a fil smɔl bifo una, ɛn a go kray fɔ plɛnti pipul we bin dɔn sin, bɔt dɛn nɔ sɔri fɔ di bad bad tin dɛn we dɛn dɔn du pan man ɛn uman biznɛs.