2 Kɔrint 11 - Krio Fɔs Oli Baybul

Dɛn Apɔsul we de Lay Se dɛn na Apɔsul

¹ A de beg una mek una bia wit mi wɛn i tan lɛkɛ se a nɔ siriɔs.

² A de jɛlɔs fɔ una lɛkɛ aw Gɔd insɛf de jɛlɔs fɔ wi; una na lɛkɛ uman we nɔ no man we a dɔn prɔmis to wangren man, dat na Krays.

³ A de fred mek sɔm ɔda tin dɛn nɔ go na una ed we go mek una nɔ de fɔ Krays in wangren, jɛs lɛkɛ aw di snek bin tek kɔni sɛns mek Iv ful.

⁴ Wetin mek a se so, na bikɔs una de lisin to ɛnibɔdi we kam tɛl una bɔt ɔda Jizɔs we wi nɔ tɛl una bɔt, ɔ ɔda spirit we difrɛn frɔm di Spirit we wi tɛl una bɔt, ɛn una de lisin to ɛnibɔdi we kam tɛl una gud nyuz we difrɛn frɔm di Gud Nyuz we wi tɛl una.

⁵ A nɔ tink se dɛn una spɛshal “apɔsul” ya du bɛtɛ wok pas mi atɔl!

⁶ Sɔntɛm mi na pɔsin we jɛs bigin tɛl pipul bɔt Gɔd, so a nɔ sabi du dat gud yet, bɔt wetin a sabi, a sabi am gud. Wi dɔn sho una dat plen wan, ɛnitɛm we wi de tɔk to una.

⁷ A nɔ bin de aks una fɔ pe mi wɛn a bin de tɛl una di Gud Nyuz bɔt Gɔd; a bin put misɛf dɔŋ mek una go kam ɔp. Na bad a bin du?

⁸ Wɛn a bin de wok fɔ una, na ɔda chɔch dɛn bin de pe mi. So i bin tan lɛkɛ se a de tek di mɔni we dɛn ɔda chɔch bin de pe mi, fɔ di mɔni we una bin fɔ de pe mi, lɛkɛ se na tif a de tif.

⁹ Ɛn di tɛm we a bin de wit una, ɛnitɛm we a kin want mɔni, a nɔba aks una fɔ ɛnitin; dɛn brɔda we kɔmɔt Masidonia kin briŋ ɔl wetin a want. Aw tin bin dɔn de bi so, na so i go de bi ɔltɛm! A nɔ go gi una kɔz fɔ wɔri bɔt mi!

¹⁰ A prɔmis una se, ɛni say we a go na Gris, a go de bost se a nɔ tek pe na una an, ɛn na tru wɔd we Krays insɛf put na mi at a de tɔk.

¹¹ Una tink se a de tɔk dɛn tin ya bikɔs a nɔ lɛk una? Nɔto so i bi. Gɔd insɛf no se a lɛk una!

¹² A go stil de du wetin a de du naw, so dat dɛn ɔda apɔsul nɔ go gɛt rizin fɔ bost se dɛnsɛf de du di sem wok we wi de du.

¹³ Dɛn apɔsul de nɔto tru apɔsul; na lay dɛn de lay bɔt dɛn wok, dɛn jɛs de mek lɛkɛ se dɛn na Krays in tru apɔsul dɛn.

¹⁴ Una nɔ fɔ wɔnda, bikɔs Setan insɛf kin chenj, mek insɛf lɛkɛ enjɛl we de briŋ layt.

¹⁵ So una nɔ fɔ wɔnda if Setan in savant dɛn de mek lɛkɛ se dɛn na Gɔd in tru savant dɛn. Wɛn dɛn yon tɛm dɔn na dis wɔl, dɛn go gɛt di pe fɔ di tin dɛn we dɛn de du.

Pɔl Sɔfa Plɛnti Tin

¹⁶ A bin dɔn tɔk sɔntin, a de tɔk am bak naw: nɔbɔdi nɔ fɔ tink se mi na ful. Bɔt if na so una tink, una fɔ lisin to mi lɛkɛ se na fulman de tɔk to una, ɛn if na so i bi sɛf, a go stil gɛt lili tin fɔ bost pan.

¹⁷ If a want bost naw, a nɔ de tɔk wetin di Masta tɛl mi fɔ tɔk, a de tɔk lɛkɛ fulman.

¹⁸ Plɛnti pipul de bost bɔt dɛn biznɛs we gɛt fɔ du wit mɔtalman nɔmɔ, so misɛf go bost.

¹⁹ Unasɛf gɛt sɛns, na dat mek una de lisin fulman!

²⁰ Una de bia wit ɛni pɔsin we de mek lɛkɛ se in na una bɔs, we de tek advantej pan una, we de sɛt trap fɔ una, we nɔ gɛt rɛspɛkt fɔ una, ɛn we kin slap una sɛf.

²¹ A de shem fɔ tɛl una se wi nɔ ebul du dat, wi nɔ drayay yay so! Bɔt if ɛnibɔdi want bost bɔt ɛnitin, misɛf go bost; una mɛmba se a de tɔk lɛkɛ fulman naw.

²² If dɛn na Ibru, misɛf na Ibru. If dɛn na Izrɛl pipul, misɛf na Izrɛl pɔsin. If dɛn na Ebraam in grampikin pikin dɛm, misɛf na Ebraam in grampikin pikin.

²³ Dɛn na Krays in savant? I tan lɛkɛ se na kresman de tɔk, bɔt mi na bɛtɛ savant pas dɛn! A de wok pas dɛn fawe, a dɔn go jel plɛnti tɛm pas dɛn, dɛn dɔn bit mi pas dɛn, day dɔn mis mi plɛnti tɛm pas dɛn.

²⁴ Di Ju pipul dɛn dɔn flag mi fayv tɛm; ɔl dɛn fayv tɛm de dɛn kin jɛs gi mi tati-nayn, i lɛf wan fɔ mek fɔti;

²⁵ di Roman soja dɛn flag mi tri tɛm, pipul ston mi wan tɛm; bot dɔn brok dɔŋ tri tɛm pan mi; wan tɛm bin de we a de na wata wanol de ɛn wanol nɛt.

²⁶ Wɛn wi de go ɔlɔbɔt, denja kin plɛnti na rod: dɛn big agbara we de kɛr pɔsin go, tifman, mi yon kɔmpin Ju dɛn ɛn dɛn wan we nɔto Ju we mekɔp bad fɔ mi; denja bin de na dɛn tɔŋ; denja bin de na dɛn bush; denja bin de wɛn a lɛf di sho go fawe na si; denja bin de kɔmɔt to dɛn padi we bin se dɛn na mi padi bɔt dɛn na bin mi ɛnimi.

²⁷ A dɔn du traŋa wok; plɛnti tɛm sɛf a nɔba slip; a kin aŋri; a kin tɔsti; sɔntɛm it nɔba de fɔ mi; klos nɔba de fɔ wɛr; ples nɔba de fɔ tap.

²⁸ Lɛ a nɔ bɔda tɔk bɔt dɛn ɔda tin; ɛvri de mi ed kin ful we a de tink bɔt ɔl di chɔch dɛn, aw dɛn de du.

²⁹ Wɛn dɛn du pɔsin bad, i kin tan lɛkɛ se na mi dɛn du bad; wɛn pɔsin sin, i kin at mi bad.

³⁰ If a gɛt fɔ bost, a go bost bɔt dɛn tin we sho se misɛf wik.

³¹ Gɔd, we na Masta Jizɔs in Papa, no se a nɔ de lay. Mek ɔlman prez Masta Jizɔs in nem sote go!

³² Wɛn a bin de na Damaskɔs, di gɔvna we bin de ɔnda Kiŋ Aritas sɛn soja man dɛn go na Damaskɔs gɛt fɔ go ol mi.

³³ Bɔt di Kristiɛn dɛn put mi insay blay, pas di blay na wan say we opin na di wɔl, sɛn am dɔŋ; na dat mek di gɔvna nɔ kech mi.