2 Kɔrint 1 - Krio Fɔs Oli Baybul

¹ Mi, Pɔl, we bi Krays Jizɔs in apɔsul bikɔs na dat Gɔd want, ɛn wi Kristiɛn brɔda Timoti, de rayt to una ɔl we na Gɔd in pipul dɛn na Kɔrint, ɛn dɛn wan we de ɔlɔbɔt na Gris.

² Mek Gɔd we na wi Papa ɛn Masta Jizɔs Krays sho una aw i gud ɛn mek i gi una kol at.

Pɔl de Tɛl Gɔd Tɛnki

³ Lɛ wi tɛl Gɔd we na wi Masta Jizɔs in Papa, tɛnki; nain de sɔri fɔ wi we nain pikin dɛn ɛn nain de kɔrej wi ɔltɛm.

⁴ I de kɔrej wi ɔltɛm we wi de pan trɔbul, so dat di kɔrej we i de kɔrej wi kin mek wisɛf ebul fɔ kɔrej ɔda pipul ɛnitɛm we dɛn de pan trɔbul.

⁵ We wi de sɔfa lɛkɛ aw Krays bin sɔfa, Krays de kɔrej wi plɛnti tɛm.

⁶ If wi de sɔfa, na fɔ mek una gɛt kɔrej ɛn fɔ mek una go sev; if wi gɛt kɔrej na fɔ mek unasɛf gɛt kɔrej ɛn bia wɛn una de sɔfa dɛn sem tin we wisɛf de sɔfa.

⁷ Wi nɔ de wɔri bɔt una atɔl, bikɔs wi shɔ se we unasɛf de sɔfa lɛkɛ aw wi de sɔfa, Gɔd go kɔrej unasɛf lɛkɛ aw i de kɔrej wi.

⁸ Mi kɔmpin Kristiɛn dɛn, wi want mek una mɛmba di trɔbul we mit wi na Eshya. Di waala na wi ed bin so plɛnti dat wi bin mɛmba se ɔltin dɔn fɔ wi.

⁹ Wi bin mɛmba se Gɔd dɔn kɔndɛm wi se wi fɔ day. Dat bi fɔ sho wi se wi nɔ fɔ abop pan wisɛf, wi fɔ abop pan Gɔd in wangren, we de mek dɛn wan we dɔn day rayz frɔm dɛn grev.

^10-11 I pul wi kɔmɔt na day rod, ɛn i go du dat bak; wi no se we una de ɛp wi pre, Gɔd go de pul wi pan denja ɔltɛm. I go ansa dɛn pre we plɛnti pipul de pre fɔ wi, ɛn i go blɛs wi; we dat bi, plɛnti pipul go tɛl am tɛnki fɔ wetin i du fɔ wi.

Pɔl Chenj In Maynd

¹² Wetin mek wi fil prawd, na we wi no insay wi at fɔ tru se nɔto bay mɔtalman sɛns wi liv na dis wɔl, ɛn nɔto bay mɔtalman sɛns wi de du ɔl dɛn tin we wi de du fɔ una, bɔt na bikɔs Gɔd gud, mek wi rɛspɛkt una ɛn wi de waka tret wit una.

^13-14 Wi jɛs de rayt dɛn tin we una ebul rid ɛn ɔndastand. Bɔt a op se dɛn tin we una nɔ ɔndastand gud naw, una go ɔndastand dɛn gud gud wande, so di De we Masta Jizɔs go kam bak, unasɛf go gladi fɔ wi lɛkɛ aw wi go gladi fɔ una.

¹⁵ A bin shɔ bɔt ɔl dɛn tin ya we a dɔn rayt, so a bin dɔn mekɔp se a go go to una so dat una kin gɛt blɛsin tu tɛm.

¹⁶ A bin dɔn mekɔp se a go go to una wɛn a de go Masidonia ɛn wɛn a de kam bak, so dat una kin ɛp mi fɔ mek a go Judia.

¹⁷ We a bin dɔn mekɔp fɔ du so, dɔn a chenj, i nɔ bin tan lɛkɛ se mi na pɔsin we nɔ siriɔs? Wɛn a want du sɔntin, na misɛf nɔmɔ a kin mɛmba? Una tink se a go se “Yɛs” wan minit ɛn “Nɔ” di ɔda minit?

¹⁸ We Gɔd nɔ de lay, misɛf nɔ go prɔmis una wan tin, dɔn a chenj mɔt.

¹⁹ Bikɔs Jizɔs Krays, we na Gɔd in Pikin, we Saylas, Timoti ɛn misɛf bin de tɛl una bɔt, nɔto pɔsin we gɛt tu mɔt. Bɔt in na di ansa, “Yɛs,”

²⁰ bikɔs in na di ansa, “Yɛs,” fɔ ɔl dɛn prɔmis we Gɔd dɔn prɔmis wi. Na dat mek wɛn wi se “Emɛn,” na bay Jizɔs Krays wi de tɔk so, fɔ mek Gɔd gɛt di prez.

²¹ Na Gɔd insɛf mek wi ɛn unasɛf shɔ se wi layf na Krays yon; na Gɔd insɛf dɔn pik wi ɛn put wi wansay fɔ du in wok.

²² Nain dɔn put in mak pan wi fɔ sho se wi nain yon pipul, ɛn i put in Spirit insay wi at fɔ mek wi no fɔ tru se ɔl wetin i gɛt fɔ wi, de ɔltɛm.

²³ Gɔd na mi witnɛs i no wetin de na mi at! Na bikɔs a nɔ bin want fɔ mek una fil bad mek a bin mekɔp nɔ fɔ go to una na Kɔrint.

²⁴ Wi nɔ de tɛl una wetin una fɔ biliv, bikɔs una biliv pan Jizɔs traŋa wan. Wetin wi de du na fɔ ɛp una fɔ mek una gladi.