1 Samiɛl 9 - Krio Fɔs Oli Baybul

Aw Sɔl Ɛn Samiɛl Mit

¹ Wan man bin de we kɔmɔt na Bɛnjamin fambul ɛn gɛt mɔni ɛn pawa. I nem Kish ɛn na bin Abiɛl we na Zɛrɔ in bɔypikin ɛn Bɛkorat in grampikin ɛn Apfia we kɔmɔt na Bɛnjamin fambul in gret grampikin.

² In yon bɔypikin bin nem Sɔl ɛn na bin wan fayn yɔŋ man we in tu nɔ de na Izrɛl. Na so i bin laŋa pas ɔlman we i tinap.

³ Wan tɛm, Sɔl in Papa we nem Kish, in dɔŋki dɛn lɔs ɛn i tɛl Sɔl fɔ tek wan pan in bɔy dɛn mek dɛn go fɛn dɛn.

⁴ So Sɔl pas insay Ifrem we gɛt il dɛn ɛn insay Shalisha bɔt dɛn nɔ si dɛn. Dɛn go na di Shalim eria bɔt di dɔŋki dɛn nɔ de de. Dɛn luk insay Bɛnjamin land bak bɔt dɛn stil nɔ si dɛn.

⁵ Wɛn dɛn luk te dɛn rich Zuf, Sɔl tɛl in Papa in bɔy se lɛ dɛn go bak bikɔs jisnɔ in papa go lɛf fɔ tink bɔt in dɔŋki dɛn, i go bigin wɔri bɔt dɛn tu.

⁶ Di bɔy tɛl am se wan man de na da siti de we de tɔk fɔ PAPA GƆD. I se ɔlman rɛspɛkt am ɛn ɛnitin we i se go bi, mɔs bi, so lɛ dɛn go to am sɔntɛm i go tɛl dɛn usay dɛn fɔ go luk.

⁷ Sɔl tɛl di bɔy se dɛn nɔ gɛt natin fɔ go gi di man as ɔl di it we de na dɛn bag dɔn dɔn. I aks di bɔy wetin in gɛt.

⁸ Di bɔy ansa am se i gɛt smɔl mɔni we dɛn go gi di man mek i go tɛl dɛn usay fɔ go luk fɔ di dɔŋki dɛn.

⁹ Fɔstɛm na Izrɛl, we pɔsin wan no wetin PAPA GƆD se dɛn kin go to di Sia we dɛn de kɔl prɔfɛt naw.

¹⁰ Sɔl gri ɛn mek dɛn go to di Sia. So dɛn lɛf fɔ go na di siti we di man we de tɔk fɔ PAPA GƆD de.

¹¹ As dɛn de klem di il fɔ go na di siti, dɛn mit sɔm yɔŋgyal dɛn we kɔmɔt gɛt wata ɛn dɛn aks di gyal dɛn fɔ am.

¹² Dɛn ansa se i de bɔt dɛn tɛl dɛn fɔ ɔri as di Sia jɛs kam de bikɔs di pipul dɛn na di siti gɛt fɔ mek sakrifays da de de na di ples we dɛn kin go wɔship.

¹³ Di gyal dɛn tɛl dɛn se as dɛn go insay di siti, dɛn go mit am bifo i go usay di pipul dɛn de mek di sakrifays fɔ go it. Di gyal dɛn se di pipul dɛn nɔ go bigin it if i nɔ go de bikɔs i gɛt fɔ blɛs di sakrifays bifo di wan dɛn we dɛn invayt go bigin it. Di gyal dɛn se if dɛn go de da tɛm de, dɛn go mit am.

¹⁴ Sɔl ɛn in papa in bɔy waka fɔ go ɔp na di siti. As dɛn de go insay di siti so, dɛn mit Samiɛl de waka go to dɛn bɔt i bin de go usay di sakrifays fɔ de.

¹⁵ I kam bi se, di de bifo Sɔl go to Samiɛl, PAPA GƆD bin dɔn tɛl Samiɛl se

¹⁶ in go sɛn wan man we kɔmɔt na Bɛnjamin fambul go to am, di sem tɛm we i de tɔk to am so. PAPA GƆD se, fɔ anɔynt am fɔ bi di pɔsin we in pik fɔ lid Izrɛl ɛn nain go pul dɛn na di Filistin dɛn an. I se in dɔn sɔri fɔ in pipul dɛn naw.

¹⁷ As Samiɛl si Sɔl so, PAPA GƆD se, “Na di man dis we a de tɔk bɔt; nain go rul mi pipul dɛn.”

¹⁸ Sɔl brakɛt Samiɛl na di get ɛn aks am fɔ tɛl am usay di Sia in os de.

¹⁹ Samiɛl ansa am se nain na di Sia. Dɔn i tɛl am se i fɔ waka go bifo am ɛn go ɔp usay dɛn de mek di sakrifays bikɔs dɛn ɔltu gɛt fɔ it wit am, dɔn na mɔnin i go lɛf am fɔ go ɛn i go tɛl am wetin i wan no.

²⁰ I tɛl am se mek i nɔ wɔri bɔt in papa in dɔŋki dɛn bikɔs i dɔn si dɛn. I mek i no se ɔl wetin Izrɛl want de nain ɛn in papa in fambul dɛn an.

²¹ Sɔl se, “Noto di fambul we smɔl pas ɔl na Izrɛl a kɔmɔt? Wetin du yu se so?”

²² Dɛn Samiɛl kɛr Sɔl ɛn in bɔy go insay di ɔl we dɛn de it di sakrifays. I put dɛn fɔ sidɔm usay di bigman kin sidɔm na di tebul usay di pipul dɛn we i invayt de. Na bin dɛn tati ɔ so de de.

²³ Samiɛl tɛl di kuk se mek i briŋ di bif we i bin tɛl am fɔ kip wan say fɔ am.

²⁴ So di kuk kɛr di lɛg pat go ɛn ɔl wetin bin de de go put bifo Sɔl. Samiɛl tɛl Sɔl se lɛ i it bikɔs na fɔ in dɛn bin kip am fɔ da tɛm de we i se i de invayt pipul. So Sɔl it wit Samiɛl da de de.

²⁵ Afta dɛn kɔmɔt it ɛn kam dɔŋ na di siti, Samiɛl ɛn Sɔl go ɔp di ruf na Samiɛl in os usay dɛn go kip kɔmpin,

²⁶ te dɛn slip de. We do klin, dɛn grap. Samiɛl kɔl Sɔl ɛn tɛl am fɔ rɛdi bikɔs i de lɛf am fɔ go. Wɛn Sɔl rɛdi in ɛn Samiɛl go na do togɛda.

Samiɛl Anɔynt Sɔl Fɔ Bi Kiŋ

²⁷ As dɛn de rich usay os dɛn nɔ de na di siti, Samiɛl tɛl Sɔl mek i tɛl in bɔy fɔ waka go bifo am. Di bɔy du so. Samiɛl tɛl Sɔl se lɛ i wet smɔl bit, in gɛt mɛsej frɔm PAPA GƆD fɔ am.