1 Samiɛl 8 - Krio Fɔs Oli Baybul

Di Pipul Dɛn Se Dɛn Wan Kiŋ

¹ As Samiɛl bin dɔn ol, i pik in bɔypikin dɛn fɔ de lɛkɛ chif na Izrɛl.

² Di fɔs pikin nem Joɛl dɔn di sɛkɛn wan nem Abija ɛn dɛn bin de na Biashiba frɔm usay dɛn de wok.

³ Bɔt dɛn nɔ bin tan lɛkɛ am atɔl. Dɛn bin de du wetin dɛn fil fɔ du. Dɛn bin de du ɔlkayn ɔnda-an tin fɔ mek mɔni, tek brayb ɛn de pan soso kukujumuku.

⁴ So ɔl di big wan dɛn na Izrɛl, gɛda go mit Samiɛl na Rama.

⁵ Dɛn tɛl am se, we in dɔn ol so ɛn in bɔypikin dɛn nɔ tan lɛk am, lɛ i pik pɔsin we go bi dɛn kiŋ fɔ rul dɛn lɛkɛ aw i bin de bi na di ɔda kɔntri dɛn.

⁶ Bɔt we dɛn tɛl Samiɛl se lɛ i pik pɔsin fɔ bi kiŋ fɔ dɛn, Samiɛl nɔ gladi so i pre to PAPA GƆD.

⁷ PAPA GƆD tɛl am se, “Lisin to ɔl wetin di pipul dɛn de se bikɔs nɔto yu dɛn de ib oba, na mi we na dɛn Kiŋ, dɛn de ib oba.

⁸ Dɛn bin dɔn de du so frɔm di de we a pul dɛn kɔmɔt na Ijipt te naw. Aw dɛn lɛf mi go wɔship ɔda gɔd dɛn, na so dɛn wan du yu.

⁹ Lisin dɛn gud bɔt wɔn dɛn bɔt wetin i min fɔ gɛt Kiŋ fɔ rul dɛn.”

¹⁰ Samiɛl insɛf tɛl di pipul we go aks am fɔ pik kiŋ wetin PAPA GƆD se.

¹¹ I tɛl dɛn ɔl wetin di kiŋ go du. Aw i go mek dɛn bɔypikin dɛn sojaman dɛn we go de gayd in ɔs ɛn karej fɔ go batul;

¹² aw i go mek sɔm bi kɔmanda dɛn na ami fɔ de kɔmand tawzin, tawzin sojaman ɔ fifti, fifti sojaman, sɔm i go tɔn dɛn to fama fɔ de rɛdi in grɔn fɔ plant ɛn fɔ de pik di it we rɛp; sɔm i go aks dɛn fɔ mek wɛpɔn ɛn fɔ rɛdi in ɔs ɛn karej fɔ go batul;

¹³ aw i go tek dɛn gyal pikin dɛn, gi dɛn pafyum fɔ mek, ɛn sɔm go de kuk ɔ bek fɔ am;

¹⁴ aw i go tek di bɛst fam dɛn na dɛn an ɛn gi di wan dɛn we de wok fɔ am;

¹⁵ aw i go tek wan pat pan tɛn pat pan wetin dɛn plant ɛn gi am to di wan dɛn we de wok fɔ am ɛn di wan dɛn we de ɛp am;

¹⁶ aw i go tek di yɔŋ bɔy ɛn yɔŋgyal dɛn we de wok fɔ dɛn ɛn di ɔda yɔŋ man dɛn wit dɛn dɔŋki dɛn fɔ bi in yon;

¹⁷ aw i go tek wan pat pan ɛni tɛn pat pan dɛn ship ɛn got fɔ bi in yon dɔn i go mek dɛn bi in slev dɛn.

¹⁸ I tɛl dɛn se wɛn ɔl dis go bi, dɛn go kray fɔ mek PAPA GƆD pul dɛn na di kiŋ we dɛn go dɔn pik in an, bɔt PAPA GƆD nɔ go ansa dɛn.

¹⁹ Pan ɔl dat, di pipul dɛn nɔ gri fɔ yɛri Samiɛl in wɔd. Dɛn se “Nɔba! Wi want kiŋ.

²⁰ Wisɛf wan tan lɛk ɔda kɔntri we gɛt kiŋ fɔ rul dɛn so nain go lid wi fɔ go fɛt.”

²¹ Afta we Samiɛl dɔn yɛri ɔl wetin dɛn se, i tɛl PAPA GƆD ɔltin.

²² PAPA GƆD tɛl am fɔ gi dɛn di kiŋ. So Samiɛl tɛl dɛn mek ɔlman go bak nain siti.