1 Samiɛl 7 - Krio Fɔs Oli Baybul

¹ So di man dɛn na Kiriath Jiarim go na Bɛth Shɛmɛsh ɛn go tek PAPA GƆD in ak. Dɛn kɛr am go na Abinadab in os pantap di il ɛn mek Ɛlieza we nain bɔypikin oli so dat i go de gyad PAPA GƆD in ak.

Samiɛl Na Jɔj Ɛn Prɔfɛt Na Izrɛl

² Di ak bin dɔn te na Kiriath Jiarim. I bin dɔn tek twɛnti ia naw so ɔl di Izrɛlayt bin dɔn de tɔn to PAPA GƆD bak.

³ So Samiɛl tɛl di Izrɛlayt dɛn se if dɛn wan tɔn bak to PAPA GƆD wit ɔl dɛn at, dɛn fɔ trowe ɔl dɛn ɔda pipul dɛn gɔd dɛn we dɛn de wɔship ɛn di Ashtarɔt dɛn ɛn gi dɛnsɛf wit wan at to PAPA GƆD ɛn wɔship in nɔmɔ, dɔn i go pul dɛn kɔmɔt na di Filistin dɛn an.

⁴ So di Izrɛlayt dɛnsɛf trowe di Beal ɛn di Ashtarɔt dɛn we dɛn bin de wɔship ɛn gi dɛnsɛf fɔ wɔship PAPA GƆD nɔmɔ.

⁵ Dɛn Samiɛl tɛl dɛn ɔl se lɛ dɛn gɛda na Mizpa ɛn in go go pre fɔ dɛn de.

⁶ We dɛn ɔl dɔn gɛda na Mizpa, dɛn gɛt wata, trowe am na grɔn as sakrifays to PAPA GƆD. Dɛn fast fɔ da de de ɛn we dɛn de na Mizpa nain dɛn kɔnfɛs se dɛn dɔn sin to PAPA GƆD, ɛn na de dɛn mek Samiɛl lɛk chif na Izrɛl.

⁷ Wɛn di Filistin dɛn yɛri se ɔl di Izrɛlayt dɛn dɔn gɛda na Mizpa, dɛn kiŋ dɛn go ɔp de fɔ atak dɛn. We di Izrɛlayt dɛn yɛri, dɛn fred bikɔs dɛn bin de fred di Filistin dɛn.

⁸ Dɛn tɛl Samiɛl lɛ i nɔ tap fɔ pre to PAPA GƆD we na dɛn PAPA GƆD fɔ dɛn so dat i go pul dɛn na di Filistin dɛn an.

⁹ Dɛn Samiɛl tek wan yɔŋ ship we de sɔk bɔbi ɛn bɔn di wanol wan as bɔn sakrifays to PAPA GƆD. I kray to PAPA GƆD fɔseka Izrɛl ɛn PAPA GƆD ansa in prea.

¹⁰ Di tɛm we Samiɛl bin de bɔn di sakrifays, nain di Filistin dɛn bɔs fɔ ib fɛt pan di Izrɛlayt dɛn. Bɔt da de de PAPA GƆD ib kɔnfyushɔn pan di Filistin dɛn. I tɔk lawd na ɛvin wit in vɔys lɛk tɛnda we mek dɛn fred ɛn rɔnawe lɛf di Izrɛlayt dɛn.

¹¹ Di Izrɛlayt dɛnsɛf rɔnata dɛn kɔmɔt na Mizpa te rich dɔŋ na Bɛthka. Na so dɛn bin de kil dɛn as dɛn de rɔn.

¹² Dɛn Samiɛl tek wan big ston we i put na Mizpa ɛn Shɛn. I kɔl am Ibɛniza ɛn se PAPA GƆD dɔn de ɛp dɛn te da tɛm de.

¹³ Na so di Filistin dɛn tek kɔmɔt biɛn Izrɛl. Dɛn shem ɛn nɔ atak Izrɛl igen Ɔl di tɛm we Samiɛl bin de, PAPA GƆD bin de fɛt di Filistin dɛn.

¹⁴ Di Filistin dɛn gi Ɛkrɔn ɛn Gath, di tu siti we dɛn bin dɔn siz to Izrɛl bak dɔn Izrɛl in pul di siti dɛn we de rawnd Ɛkrɔn ɛn Gath na di Filistin dɛn an. Bɔt Izrɛl ɛn di Amɔrayt dɛn nɔ bin gɛt plaba. Pis bin de bitwin dɛn.

¹⁵ Samiɛl kɔntinyu as chif na Izrɛl te i day.

¹⁶ Ɛvri ia, i bin de patrol frɔm Bɛthɛl go Gilgal ɛn go Mizpa fɔ go tɔk kes dɛn de.

¹⁷ I kin go te bɔt i mɔs kam bak na Rama usay i bɔn ɛn i bin rul Izrɛl de bak. Na de i bil ɔlta fɔ PAPA GƆD.