1 Samiɛl 6 - Krio Fɔs Oli Baybul

Di Filistin Dɛn Kɛr Di Ak Go Bak Na Izrɛl

¹ We di ak ɔf di Kɔvinant dɔn tek sɛvin mɔnt na di Filistin dɛn an,

² di Filistin dɛn kɔl dɛn man dɛn we bin de mek sakrifays ɛn dɛn lukgrɔn man dɛn ɛn aks dɛn wetin dɛn fɔ du wit di ak ɛn aw dɛn fɔ sɛn am bak go usay i blant.

³ Dɛn ansa se we dɛn de sɛn di ak bak we na Izrɛl dɛn PAPA GƆD gɛt am, dɛn nɔ fɔ sɛn am go ɛmti wan. Dɛn fɔ mek shɔ se, we dɛn de sɛn am, dɛn sɛn am wit sɔntin fɔ sho se dɛn sɔri fɔ wetin dɛn du. Dɛn se dat go mek PAPA GƆD mek dɛn wɛl bak, ɛn dɛn go ebul fɔ no wetin bin mek dɛn de gɛt bɔku waala so.

⁴ Di Filistin dɛn aks di man dɛn uskayn tin dɛn fɔ sɛn fɔ sho se dɛn sɔri fɔ wetin dɛn du. Dɛn ansa se na fɔ mek fayv sɔntin wit gold we de sho bɔmp na di bɔdi ɛn mek fayv arata sɛf wit gold lɛkɛ aw na fayv Kiŋ dɛn gɛt na Filistia. Afta ɔl di sem tin we de mit di pipul dɛn, nain de mit di Kiŋ dɛn.

⁵ Dɛn se na fɔ mek dɛn tin de we de sho di bɔmp na dɛn bɔdi ɛn di arata dɛn we dɔn de kil di pipul dɛn ɛn pwɛl di kɔntri. Dɛn se dat go sho Izrɛl dɛn PAPA GƆD se dɛn biliv se in pawaful ɛn sɔntɛm dat go mek i lɛf fɔ pɔnish dɛn, dɛn land ɛn dɛn gɔd dɛn.

⁶ Di man dɛn se dɛn nɔ fɔ biev lɛk aw di Ijipshian dɛn ɛn dɛn Kiŋ biev we na pas we PAPA GƆD mek waala mit dɛn nain dɛn lɛf di Izrɛlayt dɛn fɔ kɔmɔt na Ijipt.

⁷ Di man dɛn se fɔ rɛdi nyu ɔmɔlanke wit tu kombra kaw we dɛn nɔ wande yuz fɔ drɛg lod. Dɛn fɔ put dɛn kombra kaw ya fɔ drɛg di ɔmɔlanke ɛn mek shɔ se dɛn kip di kaw pikin dɛn na fayn ples.

⁸ Dɛn tɛl di Filistin dɛn fɔ put di ak pantap di ɔmɔlanke dɔn nia am, dɛn fɔ put di bɔks we gɛt di gold tin dɛn we dɛn de sɛn fɔ sho se dɛn sɔri fɔ wetin dɛn du. Di man dɛn se dɛn fɔ jɛs lɛf am lɛ di kaw dɛn drɛg am go ɛnisay,

⁹ bɔt dɛn fɔ de wach dɛn. If dɛn go na di siti usay di ak blant, dat na Bɛth Shɛmɛsh, dat sho se na PAPA GƆD de lɛ dɛn gɛt ɔl dɛn waala ya. Bɔt if i nɔ go de dat min se wetin de bi to dɛn jɛs de bi nɔmɔ.

¹⁰ Di Filistin dɛnsɛf du wetin di man dɛn se. Dɛn fɛn di kombra kaw ɛn tay dɛn to di ɔmɔlanke. Dɛn mek shɔ se dɛn kip di kaw pikin dɛn sef wan.

¹¹ Dɛn put di ak pantap di ɔmɔlanke wit di bɔks we gɛt di gold arata dɛn ɛn di tin we dɛn mek fɔ sho di bɔmp na dɛn bɔdi.

¹² Di kaw dɛn waka tret na di rod fɔ go na Bɛth Shɛmɛsh; dɛn bin de kray fɔ dɛn pikin dɛn ɛn nɔ bɛn nɔn say. Di kiŋ dɛn fala dɛn te rich di bɔda fɔ go na Bɛth Shɛmɛsh.

¹³ Da tɛm de di pipul dɛn na Bɛth Shɛmɛsh bin de pik di wit we dɛn plant na di vali. Wande naw we dɛn es dɛn ed ɔp, dɛn si di ak. Dɛn gladi bad we dɛn si am.

¹⁴ We di ɔmɔlanke rich na wan man we nem Jɔshwa na Bɛth Shɛmɛsh in fam, i tap de, nia wan big ston. Di pipul dɛnsɛf plit di ɔmɔlanke mek wud ɛn bɔn di kaw dɛn as sakrifays to PAPA GƆD.

¹⁵ Di Livayt dɛn pul PAPA GƆD in ak na di ɔmɔlanke wit di bɔks we gɛt di gold tin dɛn, put pantap di big ston. Na da sem de de, di pipul dɛn na Bɛth Shɛmɛsh mek difrɛn kayn sakrifays dɛn to PAPA GƆD.

¹⁶ Di fayv Filistin kiŋ si ɔl wetin apin bifo dɛn tɔn bak go Ɛkrɔn, da sem de de.

¹⁷ Di tin dɛn we dɛn mek wit gold we gɛt bɔmp na dɛn bɔdi we dɛn sɛn fɔ PAPA GƆD de sho se na fayv kiŋ de. Wan na Ashdɔd, wan na Gaza, wan na Ashkɛlɔn, wan na Gath ɛn wan na Ɛkrɔn.

¹⁸ Di gold arata we dɛn mek na bay di sem nɔmba we de na di Filistin siti we di kiŋ dɛn gɛt, ayda na siti wit sikyɔriti wɔl ɔ na vilej. Di big ston we dɛn bin put di ak pantap stil de na Jɔshwa na Bɛth Shɛmɛsh in fam fɔ mak wetin bin bi.

¹⁹ Bɔt PAPA GƆD mek sɛvinti man na Bɛth Shɛmɛsh day, bikɔs dɛn wach insay PAPA GƆD in ak. Di pipul dɛn sɔri bad we PAPA GƆD trit dɛn so.

Di Ak Ɔf Di Kɔvinant Rich Kiriath Jiarim

²⁰ Di pipul dɛn na Bɛth Shɛmɛsh bigin aks dɛnsɛf udat go ebul fɔ de usay dis oli PAPA GƆD de. Dɛn bigin wɔnda usay di ak fɔ go mek dɛn nɔ gɛt mɔ prɔblɛm.

²¹ So dɛn sɛn mɛsej na Kiriath Jiarim se mek di pipul dɛn de kam fɔ di ak as di Filistin dɛn dɔn sɛn am bak.