1 Samiɛl 5 - Krio Fɔs Oli Baybul

Wetin Apin We Di Ak Lɛf To Di Filistin Dɛn

¹ Afta di Filistin dɛn dɔn siz di ak ɔf di Kɔvinant, dɛn pul am kɔmɔt na Ibɛniza kɛr am go na Ashdɔd.

² Dɛn tek am go put na di os usay dɛn yon gɔd Degɔn de. Dɛn put di ak fɔ tinap nia Degɔn.

³ We dɛn grap na mɔnin di nɛks de, dɛn mit Degɔn dɔn fɔdɔm wit in fes na grɔn bifo di ak. Dɛn pik Degɔn ɛn put am bak na di ples we i fɔ de.

⁴ Bɔt di nɛks de bak we dɛn grap na mɔnin, dɛn mit Degɔn dɔn fɔdɔm bak wit in fes na grɔn bifo di ak. In ed ɛn an ɔl bin dɔn kɔt kɔmɔt ɛn we dɛn go na Degɔn in os domɔt nain bɔdi nɔmɔ bin lɛf.

⁵ Na dat mek, ɔp to di tɛm we dɛn rayt di stori, di man dɛn we bin de mek sakrifays to Degɔn, nɔ de tinap nain os in domɔt.

⁶ PAPA GƆD mek bɔku waala de pan di pipul dɛn we bin tap na Ashdɔd ɛn di ɔda siti dɛn nia de. Dɛn bigin gɛt bɔmp bɔmp na dɛn bɔdi.

⁷ Wɛn di pipul dɛn si wetin de bi, dɛn gri se di ak nɔ fɔ de de as na dat mek Izrɛl dɛn PAPA GƆD de pɔnish dɛn ɛn dɛn gɔd we na Degɔn.

⁸ So dɛn kɔl ɔl dɛn bigman dɛn go mitin fɔ disayd wetin fɔ du wit di ak. Dɛn ɔl se na fɔ kɛr am go na Gath. Na so dɛn tek muf di ak ɔf di Kɔvinant.

⁹ Bɔt afta dɛn dɔn muf di ak go na Gath, PAPA GƆD kam ple wɔwɔ na da siti de ɛn kɔnfyushɔn fɔdɔm na di wanol ples. Ɔlman, yɔŋ ɛn ol, bigin gɛt di sem kayn bɔmp na dɛn bɔdi.

¹⁰ So dɛnsɛf sɛn di ak go na Ɛkrɔn. We dɛn rich na Ɛkrɔn wit di ak, di pipul dɛn na Ɛkrɔn se dɛn kɛr di ak go de fɔ go kil dɛn ɔl.

¹¹ So dɛn kɔl ɔl di Filistin bigman dɛn ɛn tɛl dɛn fɔ sɛn di ak usay i kɔmɔt we na to di Izrɛlayt dɛn ɔ nɔ so ɔl di pipul dɛn go day. Dɛn se di wanol siti de fred se dɛn go day, bikɔs PAPA GƆD de pɔnish dɛn bad wan.

¹² Di wan dɛn we nɔ day, gɛt bɔmp na dɛn bɔdi ɛn dɛn ɔl bigin kɔl dɛn yon gɔd fɔ ɛp dɛn.