1 Samiɛl 4 - Krio Fɔs Oli Baybul

Di Filistin Dɛn Siz Di Ak

¹ Ɛnitɛm we Samiɛl tɔk, Izrɛl de yɛri wɔd. Wan tɛm di Izrɛlayt dɛn bin gɛt fɔ go fɛt wa wit di Filistin dɛn. Di Izrɛlayt dɛn kamp na Ibɛniza, dɔn di Filistin dɛn kamp na Efɛk.

² Di Filistin dɛn skata dɛn sojaman dɛn fɔ brakɛt Izrɛl. Dis mek di wa kɔmɔt bad pan dɛn ɛn so di Filistin dɛn win di Izrɛlayt dɛn. Dɛn kil fo tawzin pan dɛn na di wɔfrɔnt.

³ Wɛn di balans Izrɛlayt sojaman dɛn go bak usay dɛn de kamp, di bigman dɛn aks dɛnsɛf wetindu PAPA GƆD mek di Filistin dɛn win dɛn bad wan so. Dɛn se dɛn fɔ go tek di ak ɔf di Kɔvinant na Shaylɔ kam de wit dɛn. Dɛn se, di ak we go sho se PAPA GƆD de wit dɛn, go ɛp dɛn fɔ win di Filistin dɛn.

⁴ So dɛn sɛn man dɛn go na Shaylɔ we go briŋ PAPA GƆD, in ak ɔf di Kɔvinant kam bak. PAPA GƆD we na PAPA GƆD na ɛvin ɛn ath, we gɛt Chɛryubim fɔ in sikyɔriti - Ilaɛl in bɔypikin dɛn we na Ofni ɛn Finɛas bin tot di ak ɔf di Kɔvinant.

⁵ We dɛn rich na di kamp wit di ak ɔf di Kɔvinant, ɔlman na di kamp da tɛm de, so ala wit gladi dat di grɔn usay dɛn bin de insɛf shek.

⁶ We di Filistin dɛn yɛri di nɔys, dɛn aks wetindu di nɔys bɔku so na di Ibru dɛn kamp. Dɛn bin gɛt fɔ no se di Izrɛlayt dɛn dɔn go briŋ di ak ɔf di Kɔvinant kam na dɛn kamp.

⁷ Dat mek dɛn fred ɛn se, “Na gɔd dɔn kam na dɛn kamp so, wi dɔn dɔn. Na trɔbul dɔn mit wi so. Dis kayn tin nɔ wande bi.”

⁸ Dɛn se, “Wi dɔn alaki. Udat go pul wi kɔmɔt na dɛn gɔd ya dɛn an? Na di sem gɔd dɛn bin ib ɔlkayn waala pan di Ijipshian dɛn na di ɛmti land we pɔsin nɔ go ebul tap.”

⁹ Dɛn kɔrej dɛnsɛf lɛ dɛn nɔ giv ɔp bɔt fɛt lɛk man dɛn ɔ nɔ so dɛn go tɔn slev to di Ibru dɛn lɛk aw di Ibru dɛn bin dɔn bi dɛn slev.

¹⁰ So di Filistin dɛn fɛt gud te dɛn bit di Izrɛlayt dɛn dɔn ɔl di Izrɛlayt dɛn we nɔ day rɔnawe go na dɛn difrɛn os dɛn. Dɛn kil bɔku. Na bin tati tawzin dɛn kil.

¹¹ Dɛn siz di ak ɔf di Kɔvinant ɛn kil Ofni ɛn Finɛas.

Aw Ilaɛl Day.

¹² Da sem de de, wan man we kɔmɔt na Bɛnjamin fambul rɔn frɔm di wɔfrɔnt go Shaylɔ. Na so in klos ɔl chɛr chɛr ɛn i put dɔti nain ed fɔ sho se in at nɔ swit.

¹³ Wɛn i rich de, i mit Ilaɛl sidɔm nain chia kɔna di rod de wach bikɔs i bin de skyad wetin go bi wit di ak ɔf di Kɔvinant. We di man tɔk wetin bi na di siti, di wanol siti bɔskray lawd lawd wan.

¹⁴ Ilaɛl yɛri ɛn aks wetin bi. So di man go to Ilaɛl,

¹⁵ we bin ol naynti-et ia ɛn nɔ bin de si bɛtɛ igen

¹⁶ Di man tɛl Ilaɛl se i jɛs kɔmɔt na wɔfrɔnt ɛn dat na da sem de de i rɔnawe. Ilaɛl kɔl am in pikin ɛn aks am wetin bi.

¹⁷ Di man ansa se di Filistin dɛn win Izrɛl we mek di Izrɛlayt dɛn rɔnawe bikɔs bɔku pan dɛn day. I tɛl am igen se in tu bɔypikin we na Ofni ɛn Finɛas sɛf day dɔn di Filistin dɛn siz di ak ɔf di Kɔvinant.

¹⁸ As i tɔk bɔt di ak ɔf di Kɔvinant, Ilaɛl jɛs fɔdɔm oba in chia kɔna di get usay i bin sidɔm. I brok in nɛk ɛn day bikɔs i bin dɔn ol ɛn i gɛt bɔdi. I bi jɔj na Izrɛl fɔ fɔti ia.

Finɛas Insɛf Yon Wɛf Day

¹⁹ Ilaɛl in dɔtɛnlɔ, we na Finɛas in wɛf bin gɛt bɛlɛ ɛn bin dɔn du fɔ bɔn. We i yɛri se dɛn dɔn siz di ak ɔf di Kɔvinant, ɛn in fadɛnlɔ ɛn in man ɔl dɔn day, pen ol am wantɛm ɛn i bɔn, bɔt i nɔ bin ebul bia di pen.

²⁰ We i de day, di uman dɛn we bin de grani am kɔrej am ɛn tɛl am se i dɔn bɔn bɔbɔ bɔt i nɔ pe atɛnshɔn to dɛnsɛf.

²¹ I gi di pikin nem Ikabɔd bikɔs i se Izrɛl nɔ gɛt rɛspɛkt igen PAPA GƆD dɔn lɛf Izrɛl to insɛf we mek dɛn siz di ak ɔf di Kɔvinant, in fadɛnlɔ day ɛn in man sɛf day.

²² I se we yu si dɛn siz di ak ɔf di Kɔvinant na PAPA GƆD dɔn kɔmɔt biɛn Izrɛl so.