1 Samiɛl 3 - Krio Fɔs Oli Baybul

PAPA GƆD Apia To Samiɛl

¹ Di bɔbɔ Samiɛl bin de sav PAPA GƆD ɛn i bin de wok ɔnda Ilaɛl. Dɛn tɛm dɛn de pɔsin nɔba yɛri we PAPA GƆD de tɔk so ɛn bɔku pipul nɔ bin de si vishɔn so.

² Ilaɛl in yay bin dɔn bad ɛn i nɔ bin de si bɛtɛ igen. Wan nɛt, i bin lidɔm nain yuzhwal ples,

³ ɛn di spɛshal lamp we kin de bɔn na PAPA GƆD in os, bin stil de bɔn. Samiɛl bin lidɔm insay PAPA GƆD in os ɛn di Ak ɔf di Kɔvinant sɛf bin de de.

⁴ Na da tɛm de PAPA GƆD kɔl Samiɛl. Samiɛl ansa se, “Luk mi, a de na ya.”

⁵ Dɔn i rɔn go to Ilaɛl as i bin min se na Ilaɛl de kɔl am. Bɔt Ilaɛl tɛl am se in nɔ kɔl am so i fɔ go lidɔm bak. So insɛf go lidɔm bak.

⁶ PAPA GƆD kɔl Samiɛl bak ɛn i rɔn go to Ilaɛl. I se “Luk mi, yu kɔl mi.” Ilaɛl se “Mi pikin, go lidɔm saful ya, a nɔ kɔl yu.”

⁷ Da tɛm de, Samiɛl nɔ bin no aw PAPA GƆD de tɔk to pɔsin as PAPA GƆD nɔ bin ɛva tɔk to am yet.

⁸ PAPA GƆD kɔl Samiɛl di tɔd tɛm, ɛn Samiɛl grap bak, rɔn go to Ilaɛl as i bin fil se na Ilaɛl de kɔl am. Na da tɛm de Ilaɛl kechɔp se na PAPA GƆD go de kɔl di bɔbɔ.

⁹ So i tɛl am mek i go lidɔm bak bɔt dat, dis tɛm we i yɛri di vɔys igen i fɔ se, “PAPA GƆD tɔk nɔmɔ, yu pikin de lisin.” So Samiɛl go bak go lidɔm.

¹⁰ So PAPA GƆD kam bak, tek pozishɔn ɛn kɔl am lɛk aw i dɔn yuz fɔ du. Samiɛl jɛs se “Tɔk, yu pikin de yɛri.”

¹¹ PAPA GƆD tɛl Samiɛl se, “Luk ya, A de kam du sɔntin na Izrɛl we ɛnibɔdi we yɛri wetin bi go fred.

¹² Na da tɛm de a go du ɔl wetin a bin dɔn se a go du to Ilaɛl ɛn in famili. A nɔ go lɛf natin.

¹³ A bin dɔn tɛl Ilaɛl se in famili go sɔfa sote go bikɔs i bin no aw in bɔypikin dɛn bin de biev to mi bɔt in nɔ du natin fɔ tap dɛn.

¹⁴ Na dat mek misɛf swɛ se ɔlman na Ilaɛl in famili go sɔfa fɔ dat ɛn nɔn sakrifays ɔ prɛzɛnt nɔ go mek a chenj mi maynd.”

¹⁵ Samiɛl lidɔm te mɔnin we i grap opin di do dɛn na PAPA GƆD in os. I bin de fred fɔ tɛl Ilaɛl bɔt di vishɔn,

¹⁶ bɔt Ilaɛl kɔl am ɛn aks am.

¹⁷ Ilaɛl se, “Wetin PAPA GƆD tɛl yu? Nɔ ayd am frɔm mi. Lɛ PAPA GƆD mek wetin fɔ mit mi, mit yu if yu ayd ɛnitin pan mi.”

¹⁸ So Samiɛl insɛf tɛl am ɔl wetin PAPA GƆD bin tɛl am. I nɔ ayd natin. We Ilaɛl yɛri wetin PAPA GƆD se, i se, “Nain na PAPA GƆD, lɛ i du wetin rayt fɔ am.”

¹⁹ PAPA GƆD bin de wit Samiɛl we i bin de gro ɔp ɛn i kin mek shɔ se i du ɔl wetin Samiɛl tɔk se go bi.

²⁰ Ɔlman na Izrɛl bin no se Samiɛl na man we bin de fala PAPA GƆD gud gud wan ɛn tɔk wetin PAPA GƆD se.

²¹ PAPA GƆD kɔntinyu fɔ apia to Samiɛl na Shaylɔ ɛn mek Samiɛl no mɔ bɔt am aw i de rid in wɔd.