1 Samiɛl 27 - Krio Fɔs Oli Baybul

Devid Go Ayd To Di Filistin Dɛn Igen

¹ Bɔt Devid tɛl insɛf se if i nɔ tek tɛm, Sɔl go dɔnawe wit am ɛnitɛm, so di bɛst tin fɔ am na fɔ rɔnawe go to di Filistin dɛn dɔn Sɔl go lɛf fɔ de fɛn am ɔlsay insay Izrɛl ɛn na so i go tek kɔmɔt nain an saful.

² Na so Devid ɛn di siks ɔndrɛd man wit am tek lɛf go to Ekish we na Maɔk in bɔypikin ɛn na kiŋ na Gath.

³ Devid ɛn in man dɛn bin tap na Gath wit Ekish. Dɛn ɔl bin de de wit ɔl dɛn fambul. Devid bin de de wit in tu wɛf dat na Ainoam we kɔmɔt Jɛzril ɛn Abigɛl we kɔmɔt Kamɛl ɛn in man na bin Nebal we bin dɔn day.

⁴ Wɛn Sɔl yɛri se Devid dɔn rɔnawe go Gath, i lɛf fɔ luk ɔlsay fɔ am.

⁵ Wande Devid tɛl Ekish se if i gladi wit am mek i gi am wan pan di siti dɛn na di kɔntri fɔ de as i nɔ fil se i fɔ tap paopa usay in di kiŋ tap na di big siti.

⁶ So da de de Ekish gi am Ziklag ɛn frɔm da tɛm de na di kiŋ dɛn na Juda gɛt am.

⁷ Devid tap na di Filistin dɛn ples fɔ wan ia ɛn fo mɔnt.

⁸ Wɛn Devid de na Ziklag in ɛn in man dɛn go ɔp go red di Gɛshɔrayt, di Gazayt ɛn di Amalɛkayt dɛn. Na dɛn pipul ya bin tap na di land we de midul Shɔ ɛn Ijipt frɔm tɛm.

⁹ Ɛnisay we Devid atak, i de kil ɔlman, man ɔ uman bɔt i kin tek dɛn ship, kaw, dɔŋki ɛn kamɛl ɛn klos dɛn tɔn bak go to Ekish.

¹⁰ Wɛn Ekish kin aks usay i red da de de, i kin se na di sawtɛn pat na Juda, ɔ di ples we dɛn pipul na Jɛramil de ɔ usay di Kɛnayt dɛn tap.

¹¹ I nɔba briŋ ɛni man ɔ uman kam bak layv wan na Gath. I kin tɛl insɛf se dɛn go tɛl ɔlman bɔt am ɛn wetin i de du. Na dis Devid bin de du ɔl di tɛm we i de na di Filistin dɛn ples.

¹² Ekish bin so trɔs Devid dat i bigin tink se di Izrɛlayt dɛn nɔ go wan si Devid igen so i go bɛtɛ lɛ i lɛf to am as in wokman te go.