1 Samiɛl 26 - Krio Fɔs Oli Baybul

Devid Nɔ Gri Fɔ Kil Sɔl Bak

¹ Di Zifayt dɛn go mit Sɔl na Gibia ɛn tɛl am se Devid de ayd pantap di Akila Il na di ɛmti land we pɔsin nɔ go ebul tap we de na Judia.

² Sɔl go dɔŋ na di ɛmti land we pɔsin nɔ go ebul tap na Zif wit tri tawzin man we i pik na Izrɛl fɔ go fɛn Devid de.

³ Sɔl kamp kɔna say na di rod we de na di Akila Il na di say we tɔn to Judia bɔt Devid in lɛf na di ɛmti land we pɔsin nɔ go ebul tap. Wɛn i si se Sɔl fala am go de,

⁴ i sɛn in yon man dɛn fɔ go fɛn di rayt say usay Sɔl de.

⁵ So Devid go na di say usay Sɔl bin de kamp. I si Sɔl ɛn Abna we na Nain bɔypikin we na di bɔs na Sɔl in ami lidɔm. Sɔl in bin lidɔm insay di kamp ɛn in sojaman dɛn bin de rawnd am.

⁶ Dɛn Devid aks Abimɛlɛk we na Itayt ɛn Abishay we na Zɛruaya in bɔypikin ɛn we na Joab in brɔda se uswan pan dɛn go fala am fɔ go dɔŋ na di kamp fɔ go mit Sɔl. Abishay se in go go wit Devid.

⁷ So da nɛt de Devid ɛn Abishay go dɔŋ na Sɔl in kamp. Insay de, dɛn mit Sɔl de slip wit in spia chuk na di grɔn oba in ed. Abna ɛn di ɔda sojaman dɛn bin lidɔm nia am.

⁸ Abishay tɛl Devid se PAPA GƆD dɔn sɛl in ɛnimi to am da de de. I se lɛ i jɛs chuk am ɛn fasin am na di grɔn de wit in yon spia. I se i nɔ go gɛt fɔ chuk am tu tɛm sɛf.

⁹ Bɔt Devid tɛl Abishay se lɛ i sɔri fɔ am, as nɔbɔdi nɔ go du bad to di pɔsin we PAPA GƆD pik ɛn go fɔ natin.

¹⁰ Devid swɛ se wans PAPA GƆD nɔ de day, Sɔl in tɛm fɔ day go kam. I se i go ayda day ɔdinari wan ɔ i go day na wɔfrɔnt.

¹¹ Bɔt mek PAPA GƆD nɔ mek i ambɔg ɛnibɔdi we PAPA GƆD insɛf dɔn pik. I tɛl Abishay fɔ tek di spia ɛn wata jɔg we de oba Sɔl in ed ɛn mek dɛn kɔmɔt de.

¹² So Devid go wit Sɔl in spia ɛn in wata jɔg we bin de oba in ed. Nɔbɔdi nɔ si dɛn ɔ no bɔt wetin apin. Ɔlman bin de slip bikɔs PAPA GƆD mek dɛn slip lɛk udat chak.

¹³ Dɛn Devid go tinap fawe na di ɔda say, pantap di il so dat big big spes bin de midul dɛn.

¹⁴ I ala kɔl di sojaman dɛn ɛn Abna we na Nain bɔypikin, ɛn aks dɛn if dɛn nɔ de ansa am. Nain Abna aks udat de kɔl di kiŋ.

¹⁵ Devid ansa am bɔt aks am se if in nɔto man. Devid se nɔbɔdi nɔ de na Izrɛl we tɔf lɛk am bɔt aks wetin mek i nɔ gyad di kiŋ gud wan. Devid tɛl am se sɔmbɔdi bin go insay di kamp fɔ dɔnawe wit di kiŋ.

¹⁶ Devid tɛl Abna se i nɔ tray atɔl. I swɛ se wans PAPA GƆD nɔ de day Abna ɛn in man dɛn fɔ day bikɔs dɛn nɔ gyad di kiŋ gud, we PAPA GƆD dɔn pik. I tɛl dɛn se mek dɛn luk rawnd dɛn if dɛn go si di kiŋ in spia ɛn wata jɔg oba in ed. I se mek dɛn tɛl am usay dɛn de.

¹⁷ Sɔl fent pan Devid in vɔys, nain i aks if nɔto in bɔypikin Devid in vɔys i de yɛri so. Devid ansa am as kiŋ se nain.

¹⁸ I aks di kiŋ wetin i de biɛn am fɔ. I se wetin na dis tin we i du we bad.

¹⁹ I aks di kiŋ fɔ lisin to wetin in we nain bɔbɔ gɛt fɔ se. I se if na PAPA GƆD de mek i de biɛn am, dɛn mek PAPA GƆD gladi we Sɔl mek sakrifays to am, bɔt, if na mɔtalman de mek i de biɛn am lɛ swɛ de biɛn dɛn wan we de lɛ dat bi. I se dɛn dɔn drɛb am pan PAPA GƆD in prɔpati ɛn tɛl am fɔ go sav ɔda gɔd dɛn.

²⁰ I se mek di kiŋ nɔ mek i day na ples we dɛn nɔ de wɔship PAPA GƆD. Devid tɛl di kiŋ se i de rɔnata anch lɛkɛ am lɛk we ɔntinman de go bush fɔ kech bif.

²¹ Da tɛm de, Sɔl mek lɛk pɛnitɛnt sina. I kɔl Devid in bɔypikin ɛn tɛl am fɔ kam bak. I se da de de, Devid dɔn sho am se in layf gɛt valyu so in nɔ go tray fɔ du Devid bad igen I se in biev lɛk fulman ɛn dɔn du bad bad tin.

²² Devid sho dɛn di kiŋ in spia we i bin tek go, ɛn tɛl dɛn fɔ sɛn wan yɔŋ man fɔ go oba go tek am usay i de.

²³ Devid se PAPA GƆD de pe ɔlman fɔ wetin i wok fɔ, dat na if i de du wetin rayt ɛn if i tru to PAPA GƆD. I se da de de, PAPA GƆD sɛl Sɔl gi am bɔt in nɔ go ambɔg ɛnibɔdi we PAPA GƆD dɔn pik.

²⁴ I se in op se lɛk aw i tek Sɔl in layf mek sɔntin, na so PAPA GƆD go tek in layf mek sɔntin ɛn pul in ed pan ɛni trɔbul.

²⁵ Sɔl pre mek PAPA GƆD blɛs Devid in bɔypikin ɛn pre mek PAPA GƆD mek ɔl wetin i put in an pan bɛtɛ. Afta dat, Devid go in we saful ɛn Sɔl go bak nain os.