1 Samiɛl 25 - Krio Fɔs Oli Baybul

Samiɛl Day

¹ Samiɛl day ɛn ɔlman na Izrɛl gɛda fɔ mek bɛrin fɔ am; dɔn dɛn bɛr am nain siti na Rama. Devid ɛn in man dɛn, muf go dɔŋ na di ɛmti land we pɔsin nɔ go ebul tap na Meɔn.

Aw Devid Ɛn Abigɛl Mit

² Wan man bin de de we gɛt prɔpati na Kamɛl. Na bin jɛntri man. I bin gɛt wan tawzin got ɛn tri tawzin ship we dɛn bin de pul dɛn wul dɛn na Kamɛl.

³ In bin nem Nebal ɛn in wɛf bin nem Abigɛl. Na bin uman we gɛt sɛns dɔn i fayn. Bɔt in man we na Kelɛgayt, rud ɛn nɔ sabi biev to pɔsin.

⁴ Di tɛm we Devid bin de na di ɛmti land we pɔsin nɔ go ebul tap, i yɛri se Nebal de pul in ship dɛn ia.

⁵ So i sɛn tɛn yɔŋman fɔ go ɔp to Nebal na Kamɛl ɛn tɛl am se nain, Devid sɛn dɛn.

⁶ I tɛl dɛn fɔ tɔk fayn to am, wish lɔŋ layf ɛn wɛl bɔdi fɔ in ɛn in fambul dɛn ɛn tɛl am se dɛn want mek PAPA GƆD blɛs ɔl wetin i de put in an pan fɔ du.

⁷ I tɛl dɛn fɔ se i yɛri se tɛm dɔn rich fɔ pul di ship dɛn ia ɛn dat we Nebal in man dɛn we de luk di ship dɛn bin de wit in yon man dɛn, in man dɛn nɔ ambɔg dɛn ɛn ɔl di tɛm we dɛn tek na Kamɛl, dɛn nɔ lɔs natin.

⁸ I se dɛn fɔ tɛl am fɔ lɛ i aks in yon man dɛn ɛn dɛn go tɛl am. I se fɔ beg am mek i mɛmba in man dɛn ɛn du gud to dɛn sins dɛn go de di tɛm we dɛn de gladi-gladi. Devid se dɛn fɔ aks am fɔ luk fɔ wetin i go fɛn fɔ in man dɛn ɛn fɔ insɛf.

⁹ Wɛn Devid in man dɛn rich, dɛn gi Nebal, Devid in mɛsej ɛn sidɔm wet.

¹⁰ Nain Nebal ansa dɛn se “Udat na Devid? Udat dis Jɛsi in bɔypikin fil se i bi?” I se bɔku slev de rɔnawe na dɛn masta dɛn an,

¹¹ so wetin fɔ mek i gi bred ɛn wata ɛn di bif we i dɔn kil fɔ in wokman dɛn to man dɛn we i nɔ no usay dɛn kɔmɔt.

¹² Devid in man dɛn tɔn bak go usay dɛn kɔmɔt saful. Wɛn dɛn rich, dɛn naret ɔl wetin apin.

¹³ Devid ɔda in man dɛn fɔ rɛdi dɛn sɔd dɛn. So dɛn rɛdi dɛn sɔd dɛn ɛn Devid insɛf rɛdi in yon. Na bɔt sɔm fo ɔndrɛd man go wit Devid, bɔt tu ɔndrɛd lɛf fɔ luk dɛn tin dɛn.

¹⁴ Wan pan Nebal in wokman dɛn go tɛl Abigɛl we na Nebal in wɛf wetin apin. I tɛl am aw Devid bin sɛn man dɛn to in masta bɔt dat i kɔs, kɔs dɛn ɔl.

¹⁵ I tɛl Abigɛl aw di man dɛn bin gud to dɛn. I se Devid in man dɛn nɔ wande ambɔg dɛn ɛn dat fɔ ɔl di tɛm we dɛn de na di fil, dɛn nɔ lɔs natin.

¹⁶ I se de ɛn nɛt Devid in man dɛn bin tan lɛk wɔl rawnd dɛn di tɛm we dɛn bin de mɛn dɛn ship nia dɛn.

¹⁷ I aks Abigɛl fɔ tink bɔt dat ɛn si wetin i go du bikɔs in fil se in masta dɔn fɛn trɔbul fɔ insɛf ɛn di wanol os. I se na man we in biznɛs traŋa ɛn i nɔ de lisin to nɔbɔdi.

¹⁸ Abigɛl insɛf nɔ westɛm. I tek tu ɔndrɛd lof bred, tu bɔtul wayn, fayv ship we dɛn dɔn kuk ɛn drɛs fayn, tu bushɛl wit, wan ɔndrɛd kɔrant fɔ put pan kek, ɛn tu ɔndrɛd bɔnch dray fig we dɛn kin kwis fɔ travul. I lod dɛn ɔl pan dɔŋki.

¹⁹ Dɛn i tɛl in wokman dɛn fɔ lid, dɔn in go fala dɛn bɔt i nɔ tɛl in man Nebal natin.

²⁰ As in ɛn in dɔŋki rich na wan say na di mawnten, dɛn mit Devid ɛn in man dɛn de kam dɔŋ nia usay i de.

²¹ Dɛn mit di tɛm we Devid jɛs se, ɔl di tɛm we i bin de wach di man in prɔpati dɛn na di ɛmti land we pɔsin nɔ go ebul tap na fɔ natin. I se di yuslɛs man dɔn tɔn in gud to bad ɛn gɛt fɔ pe fɔ dat.

²² I bin se mek PAPA GƆD dil wit am, if bay mɔnin i nɔ dɔnawe wit ɔl di man dɛn na Nebal in os.

²³ Wɛn Abigɛl si Devid, i jomp dɔŋ in dɔŋki kwik, go mit Devid ɛn baw bifo am wit in fes na grɔn.

²⁴ I ol Devid in fut ɛn beg am mek i put blem pan in nɔmɔ. I se mek Devid alaw am fɔ tɔk to am.

²⁵ I se mek Devid nɔ fala da bad man we nem Nebal bikɔs na fulman lɛk aw in nem se, ɛn na so so bigful tin i de du. I se fɔ in yon say, i nɔ bin si di man dɛn we Devid bin sɛn.

²⁶ I tɛl am se as PAPA GƆD nɔ mek i shɛd blɔd bay di we, we i go want fɔ fɛt fɔ insɛf, wans PAPA GƆD nɔ de day ɛn in di Devid nɔ day yet ɔl in ɛnimi dɛn go gɛt dɛn pe na PAPA GƆD in an lɛk aw Nebal gɛt fɔ gɛt in yon pe.

²⁷ Dɔn i se mek Devid gi di lili ɛn natin we i kɛr to in man dɛn we de fala am.

²⁸ I se duya mek Devid fɔgiv am. I se PAPA GƆD go mɔs mek i rul te go sins i de fɛt fɔ PAPA GƆD ɛn pre se natin bad nɔ go ɛva mit am wans i nɔ day yet.

²⁹ I se pan ɔl we pɔsin de fɛn Devid fɔ kil am, Devid in layf de sef wan na PAPA GƆD we nain PAPA GƆD in an. Bɔt Devid in ɛnimi dɛn layf go de lɛk saliwansay to PAPA GƆD.

³⁰ I tɛl Devid se di tɛm we PAPA GƆD go dɔn du ɔl di gud tin we i prɔmis Devid ɛn dɔn mek am fɔ bi kiŋ na Izrɛl,

³¹ Devid nɔ go gɛt kɔnshɛns we nɔ klia bikɔs i kil pɔsin fɔ fɛt fɔ insɛf, fɔ mɔna am. We i dɔn, i tɛl Devid se mek i nɔ fɔgɛt am we PAPA GƆD blɛs am.

³² So Devid tɛl Abigɛl se i fɔ tɛl PAPA GƆD we na di PAPA GƆD we Izrɛl de wɔship tɛnki fɔ we i sɛn Abigɛl to am da de de.

³³ Ɛn i de tɛl PAPA GƆD tɛnk fɔ di sɛns we i gi Abigɛl we dɔn tap am fɔ shɛd blɔd da de de se i de fɛt fɔ insɛf.

³⁴ I se if nɔto bin fɔ se i go to am kwik, natin nɔ bin fɔ tap am fɔ kil ɔl di man dɛn na Nebal in os bay do klin wans PAPA GƆD we na di PAPA GƆD we Izrɛl de wɔship nɔ de day.

³⁵ Na da tɛm de Devid tek ɔl wetin Abigɛl bin kɛr go nain an. Dɔn i tɛl am se mek i go na os wit kolat as i dɔn yɛri ɛn gri fɔ du wetin i aks fɔ.

³⁶ Wɛn Abigɛl tɔn bak, i mit Nebal de mek big big pati lɛkɛ se in na kiŋ. I bin gladi ɛn i bin dɔn tot am. So Abigɛl nɔ se natin to am te do klin.

³⁷ Wɛn i bin dɔn soba bay do klin, Abigɛl tɛl am ɔl wetin pas bitwin in ɛn Devid ɛn i gɛt strok we mek i nɔ ebul du natin. Afta tɛn de,

³⁸ PAPA GƆD tek in layf ɛn i day.

³⁹ Wɛn Devid yɛri se Nebal dɔn day, i tɛl PAPA GƆD tɛnki fɔ we i fɛt Nebal, fɔ aw i bin biev to am. I tɛl PAPA GƆD tɛnki fɔ we i mek i nɔ du bad bɔt pe Nebal fɔ di bad we in du. Dɔn Devid sɛn go aks Abigɛl fɔ mared am.

⁴⁰ In wokman dɛn go na Kamɛl ɛn tɛl Abigɛl se Devid sɛn dɛn fɔ kam tek am fɔ bi in wɛf.

⁴¹ Abigɛl butu in fes na grɔn ɛn tɛl dɛn se in rɛdi fɔ sav Devid, so i go. I bin ivin was Devid in wokman dɛn fut.

⁴² Abigɛl grap kwik ɛn gɛt in fayv nani fɔ ɛp am. I jomp pantap di dɔŋki, go wit Devid in man dɛn ɛn tɔn Devid in wɛf.

⁴³ Devid bin dɔn mared, Ainoam we kɔmɔt Jɛzril, so na dɛn ɔltu na bin in wɛf dɛn.

⁴⁴ Sɔl bin dɔn tek Mikal we na Devid in wɛf, gi Paltiɛl we na Laish in bɔypikin ɛn we kɔmɔt Galim.