1 Samiɛl 24 - Krio Fɔs Oli Baybul

Devid Nɔ Kil Sɔl

¹ Afta Sɔl dɔn tɔn bak, afta we i bin de rɔnata di Filistin dɛn, dɛn tɛl am se Devid de na di ɛmti land we pɔsin nɔ go ebul tap na Ɛngɛdi.

² So Sɔl tek tri tawzin man we i gɛda frɔm ɔlsay na Izrɛl ɛn dɛn ɔl lɛf fɔ go fɛn Devid ɛn in man dɛn nia di mawnten usay dɛn wayl got kin de.

³ We dɛn rich wan say usay dɛn de kip ship dɛn; i si wan kev, so i bɛn insay de fɔ atɛnd to nechɔ. Devid ɛn in man dɛn bin de insay insay dis sem kev.

⁴ Devid in man dɛn tɛl am se na da de de PAPA GƆD bin de tɔk bɔt we i se i go mek Devid ebul in ɛnimi ɛn du wetin i fil fɔ du wit am. So Devid insɛf krip saful wan go biɛn Sɔl ɛn kɔt af pisis kɔmɔt pan di klos we Sɔl bin wɛr.

⁵ Afta dat, Devid fil bad fɔ wetin i du.

⁶ I tɛl in man dɛn se mek PAPA GƆD nɔ gri fɔ mek i du ɛnitin to in bɔs, we PAPA GƆD dɔn pik ɔ tɔch am sɛf as na pɔsin we PAPA GƆD pik.

⁷ Na dɛn wɔd dɛn de Devid tek tɔk pan in man dɛn ɛn nɔ gri fɔ mek dɛn atak Sɔl. So Sɔl kɔmɔt insay di kev ɛn go in we.

⁸ Devid kɔmɔt insay di kev ɛn ala kɔl Sɔl. Wɛn Sɔl tɔn biɛn, Devid jɛs baw to am fɔ sho se i gɛt rɛspɛkt fɔ Sɔl.

⁹ Devid aks Sɔl wetindu i de biliv pipul dɛn we de tɛl am se in Devid de plan bad fɔ am.

¹⁰ Devid tɛl Sɔl se insɛf dɔn si korokoro wan aw PAPA GƆD sɛl am gi am da de de insay di kev. I tɛl Sɔl se sɔm pan in man dɛn se fɔ kil am, bɔt i nɔ gri. Devid tɛl am se i tɛl in man dɛn se in nɔ go tɔch in bɔs as na PAPA GƆD dɔn pik am.

¹¹ Devid kɔl Sɔl in papa ɛn aks am fɔ luk di af pisis we de nain an we i kɔt kɔmɔt na Sɔl in klos bɔt dat i nɔ kil Sɔl. Devid beg Sɔl fɔ ɔndastand ɛn biliv se in nɔ de plan fɔ du am bad. I tɛl Sɔl se in nɔ du Sɔl natin bɔt Sɔl in de biɛn am fɔ kil am.

¹² I tɔk se, mek PAPA GƆD jɔj bitwin dɛn tu ɛn fɛt fɔ am bɔt in nɔ go tɔch Sɔl.

¹³ Devid mɛmba Sɔl bɔt wetin dɛn kin se, “Ɔrinch nɔ de bia lɛm” so na udat bad nain de du bad, so in, Devid nɔ go tɔch Sɔl atɔl.

¹⁴ Devid aks di kiŋ na Izrɛl udat i de biɛn. I tɛl di kiŋ se in tan lɛk day dɔg na sanbich ɔ flay we nɔ gɛt natin fɔ du am.

¹⁵ I tɔk bak se na PAPA GƆD go bi dɛn jɔj ɛn nain go pas di sɛntɛns. I se mek PAPA GƆD si wetin de apin ɛn fɛt fɔ am ɛn pul in ed pan di trɔbul we Sɔl de fɛn fɔ am.

¹⁶ Wɛn Devid dɔn tɔk dɔn, Sɔl kɔl am in pikin ɛn aks if nain vɔys i de yɛri. Dɔn i bɔskray lawd lawd wan.

¹⁷ I tɛl Devid se Devid bɛtɛ pas am fawe bikɔs pan ɔl di bad we in de fɛt fɔ du Devid, Devid nɔ de fala am.

¹⁸ I se Devid jɛs tɛl am bɔt di gud we in di Devid du to am, tɛm we PAPA GƆD sɛl am gi Devid, bɔt Devid nɔ gri fɔ kil am.

¹⁹ I se na nɔmal tin fɔ mek we pɔsin mit in ɛnimi i dɔnawe wit am bɔt Devid nɔ du so. I aks PAPA GƆD fɔ blɛs Devid fɔ da tin de we i du.

²⁰ I se, in no se Devid go mɔs bi kiŋ ɛn dat Izrɛl go ɛnjɔy we i bi kiŋ.

²¹ I aks Devid fɔ swɛ ɛn mek PAPA GƆD bi dɛn witnɛs se i nɔ go kil ɛni in fambul ɛn dɔnawe wit in papa in pipul dɛn kpatakpata.

²² Devid insɛf swɛ. Dɔn Sɔl tɔn bak go nain os bɔt Devid ɛn in man dɛn go ɔp bak usay dɛn bin de ayd.