1 Samiɛl 23 - Krio Fɔs Oli Baybul

Devid Sev Di Pipul Dɛn Na Kiila Tu Tɛm

¹ Wɛn Devid yɛri se di Filistin dɛn de na Kiila de fɛt ɛn dat dɛn de tif ɔl dɛn sid dɛn na di os we dɛn de mil,

² i aks PAPA GƆD if i fɔ atak di Filistin dɛn. PAPA GƆD ansa am se lɛ i atak di Filistin dɛn mek dɛn go lɛf fɔ ambɔg di pipul dɛn na Kiila.

³ Bɔt Devid in man dɛn tɛl Devid se, we dɛn de de na Juda, dɛn de fred bifo dɛn se fɔ go na Kiila go fɛt di Filistin dɛn.

⁴ So Devid insɛf go to PAPA GƆD bak go aks am if dɛn fɔ atak. PAPA GƆD ansa am se, dɛn fɔ go as i go mek dɛn bit di Filistin dɛn.

⁵ So Devid ɛn in man dɛn go Kiila ɛn fɛt wit di Filistin dɛn dɔn dɛn tek ɔl dɛn animal dɛn go. Devid ɛn in man dɛn kil bɔku pan di Filistin dɛn we mek dɛn lɛf fɔ ambɔg di pipul dɛn na Kiila.

⁶ Wɛn Abiata, we na Abimɛlɛk in bɔypikin bin de rɔnawe go to Devid na Kiila, i bin tek di ifɔd go wit am.

⁷ Dɛn tɛl Sɔl se Devid dɔn go na Kiila, nain i se na PAPA GƆD dɔn sɛl Devid gi am so we mek i go insay siti we gɛt get we de lɔk.

⁸ So Sɔl kɔl in man dɛn ɛn tɛl dɛn se fɔ go fɛt na Kiila so dat dɛn go kech Devid ɛn in man dɛn na dɛn trap.

⁹ We Devid yɛri se Sɔl de plan bad fɔ am, i tɛl Abiata we na man we de mek sakrifays fɔ pipul sin fɔ kɛr di ifɔd go to am.

¹⁰ We Abiata gi am i pre to PAPA GƆD we na di PAPA GƆD we Izrɛl de wɔship. I tɛl PAPA GƆD se i yɛri se Sɔl de plan fɔ go pwɛl pwɛl tin dɛn na Kiila bikɔs ɔf am.

¹¹ I beg PAPA GƆD we na Izrɛl dɛn PAPA GƆD fɔ tɛl am if di pipul dɛn na Kiila go an am ova to Sɔl ɛn if Sɔl go riali go dɔŋ na Kiila as i dɔn yɛri. PAPA GƆD ansa am se Sɔl mɔs go.

¹² Bɔt Devid aks am bak if di pipul dɛn na Kiila go an in ɛn in man dɛn ova to Sɔl. Ɛn PAPA GƆD se dɛn go du so.

¹³ So Devid ɛn in siks ɔndrɛd man kɔmɔt na Kiila ɛn bigin muf muf ɔlɔbɔt. Wɛn Sɔl yɛri se Devid dɔn rɔnawe na Kiila, i nɔ bɔda fɔ go de igen

Devid Go Ayd Ɔp Il

¹⁴ Devid bin tap na di ɛmti land we pɔsin nɔ go ebul tap, na ples we i nɔ go izi fɔ kech am ɛn na di il dɛn na di ɛmti land we pɔsin nɔ go ebul tap, na Zif. Sɔl bin de fɛn am ɛvride lɛk tri kɔpɔ silva. Bɔt usay! PAPA GƆD nɔ mek i ebul fɛn am.

¹⁵ Devid bin de na Ɔrɛsh we de na di ɛmti land we pɔsin nɔ go ebul tap na Zif. I yɛri se Sɔl dɔn go na di eria ɛn i de luk fɔ am fɔ kil am.

¹⁶ Da sem tɛm de, Sɔl in bɔypikin we na Jonɛthan go fɛn Devid ɛn tɛl am fɔ biliv PAPA GƆD.

¹⁷ Jonɛthan tɛl Devid se lɛ i nɔ fred bikɔs in papa Sɔl nɔ gɛt natin fɔ du am. I tɛl Devid se na Devid gɛt fɔ bi kiŋ na Izrɛl ɛn in di Jonɛthan go de nɛks to am ɛn dat in papa sɛf no dat.

¹⁸ Jonɛthan ɛn Devid prɔmis fɔ de fɔ dɛnsɛf ɛn kɔl PAPA GƆD fɔ de as witnɛs. Afta dat, Jonɛthan tɔn bak go nain os, bɔt Devid in lɛf na Ɔrɛsh.

¹⁹ Di Zifayt dɛn go to Sɔl na Gibia ɛn tɛl am se Devid de ayd na ples we i nɔ izi fɔ kech am na Ɔrɛsh we de pantap di Akila il, na di sawtɛn pat frɔm di ɛmti land we pɔsin nɔ go ebul tap we de na Judia.

²⁰ Dɛn tɛl di kiŋ se mek i go dɔŋ to dɛn, ɛn dɛn go mek shɔ se dɛn an Devid ova to am.

²¹ Sɔl pre mek PAPA GƆD blɛs dɛn fɔ di gud we dɛn gud to am.

²² I se mek dɛn go plan gud aw fɔ kech Devid. I se dɛn fɔ fɛnɔt usay i kin de go ɔltɛm ɛn udat dɔn si am de, as na pɔsin we in biznɛs traŋa.

²³ I se dɛn fɔ fɛnɔt bɔt in difrɛn ayd-awt dɛn ɛn kam tɛl am di rayt tin. I se na da tɛm de i go go wit dɛn. If Devid de na di eria, i go mɔs gɛt am ivin if i min se i go gɛt fɔ sach ɔlman na Juda, wan bay, wan.

²⁴ So di Zifayt dɛnsɛf go bifo ɛn lɛf Sɔl biɛn. Da sem tɛm de, Devid ɛn in man dɛn bin de na di ɛmti land we pɔsin nɔ go ebul tap na Meɔn insay wan vali we de na di sawtɛn pat na Judia.

²⁵ Sɔl ɛn in man dɛn bigin luk fɔ Devid, ɛn wɛn dɛn tɛl Devid bɔt dat, i go insay insay usay dɛn big ston de ɛn tap na di ɛmti land we pɔsin nɔ go ebul tap na Meɔn. Wɛn Sɔl yɛri dat, insɛf go insay di ɛmti land we pɔsin nɔ go ebul tap na Meɔn fɔ go luk fɔ Devid.

²⁶ Sɔl ɛn in man dɛn bin de na wan pat na di mawnten dɛn Devid ɛn in yon man dɛn bin de na di ɔda pat de rɔn fɔ kɔmɔt na di eria. As Sɔl ɛn in man dɛn dɔn de rich nia Devid ɛn in man dɛn,

²⁷ wan mɛsenja kam kɔl Sɔl fɔ go kwik as di Filistin dɛn dɔn atak Izrɛl.

²⁸ Dat mek Sɔl lɛf fɔ rɔnata Devid ɛn tɔn bak go mit di Filistin dɛn. Na dat mek dɛn kɔl di ples Di Sɛpreshɔn Il.

²⁹ Devid insɛf kɔmɔt de go tap usay i nɔ go izi fɔ kech am na Ɛngɛdi.