1 Samiɛl 22 - Krio Fɔs Oli Baybul

Sɔl Mek Dɛn Masaka Di Man Dɛn We De Mek Sakrifays Fɔ Pipul Sin

¹ Devid lɛf Gath go tap na kev na Adulam. Wɛn in brɔda dɛn ɛn ɔl udat tap nain papa in os yɛri dat, dɛn ɔl go de go mit am.

² Ɔl dɛn wan we bin dɔn gens wit wetin bin de bi ɔ we bin gɛt dɛt fɔ pe ɔ we bin de pan trɔbul go mit Devid. Na so i tɔn dɛn lida. Na bin bɔt sɔm fo ɔndrɛd man bin de wit am de.

³ Frɔm de i go na Mizpa we de insay Moab. I aks di kiŋ na Moab fɔ mek in papa ɛn mama tap wit am te i yɛri wetin PAPA GƆD want am fɔ du.

⁴ So Devid lɛf in papa ɛn mama wit di kiŋ na Moab ɛn dɛn tap wit am ɔl di tɛm we Devid bin de na di kev.

⁵ Wan prɔfɛt we nem Gad, tɛl Devid se i fɔ kɔmɔt na di kev go na Juda. So Devid insɛf kɔmɔt de go na wan bush we nem Ɛrɛt.

⁶ I kam bi se Sɔl yɛri se dɛn dɔn si Devid ɛn in man dɛn, da tɛm de Sɔl ol in spia ɛn sidɔm ɔnda di tamarisk tik we de na di il na Gibia ɛn i gɛt ɔl in yon man dɛn rawnd am.

⁷ I kɔl dɛn “Bɛnjaminayt” as na di sem ples dɛn kɔmɔt, ɛn aks dɛn if dɛn min se Devid go gi dɛn ɔl dɛn fil ɛn vinyad dɛn I tɛl dɛn se Devid nɔ gɛt fɔ mek ɛni ɔf dɛn kɔmanda.

⁸ I se dɛn ɔl de jɔyn gɛŋ wit Devid na dat mek nɔbɔdi nɔ bin tɛl am sɛf se Devid ɛn Jonɛthan na tayt padi. I se dɛn nɔn nɔ bisin bɔt am na dat mek dɛn nɔ tel am se Devid dɔn mek bagin wit in yon pɔsin fɔ ambush am da de de.

⁹ Doɛg we na Idɔmayt bin tinap de wit Sɔl in man dɛn. I se in si Devid gud gud wan we i go to Abimɛlɛk we na Aitɔb in bɔypikin na Nɔb.

¹⁰ I tɛl dɛn se Abimɛlɛk bin ivin tray fɔ no wetin PAPA GƆD want tɛl Devid. I tɛl dɛn se Abimɛlɛk gi Devid sɔm provishɔn ɛn di sɔd we Golayath, da Filistin man bin yuz.

¹¹ Di kiŋ sɛn kɔl Abimɛlɛk we na Aitɔb in bɔypikin ɛn ɔl in papa in fambul dɛn as na dɛn na bin di man dɛn we de mek sakrifays fɔ pipul sin na Nɔb.

¹² We dɛn ɔl kam to di kiŋ, i tɛl Abimɛlɛk fɔ lisin to am. Abimɛlɛk ansa am wit rɛspɛkt ɛn lisin to wetin i de se.

¹³ Sɔl aks Abimɛlɛk wetindu i jɔyn gɛŋ fɔ fɛt am. I se Abimɛlɛk gi Devid bred ɛn sɔd ɛn ivin tɔk to PAPA GƆD fɔ am so dat lɛkɛ da de de, Devid we na Sɔl in ɛnimi, go ebul fɔ kil am.

¹⁴ Abimɛlɛk aks di kiŋ se if ɛnibɔdi de nain os we tan lɛk Devid we nɔ de mek ipokrit to am. Abimɛlɛk mɛmba di kiŋ se na Devid mared in gyal-pikin, dat na Devid de luk afta in bɔdi gad dɛn ɛn dat ɔlman nain os lɛk ɛn de rɛspɛkt am.

¹⁵ Abimɛlɛk aks di kiŋ, if na di fɔs tɛm dat i de tɔk to PAPA GƆD fɔ Devid. I beg di kiŋ mek i nɔ miks in ɔ in papa in fambul dɛn pan wetin i de pan bikɔs dɛn nɔ no natin bɔt wetin i de tɔk.

¹⁶ Bɔt di kiŋ tɛl Abimɛlɛk se in ɛn ɔl in fambul dɛn go mɔs day fɔ dat.

¹⁷ Dɛn di kiŋ gi ɔda to in man dɛn nia am fɔ kil ɔl di man dɛn we de mek sakrifays to PAPA GƆD fɔ pipul dɛn sin. I se dɛn jɔyn gɛŋ wit Devid na dat mek ivin we dɛn no se Devid de rɔnawe, dɛn nɔ tɛl am. Bɔt in man dɛn nɔ gri fɔ tɔch ɛni ɔf di man dɛn we de mek sakrifays to PAPA GƆD fɔ pipul dɛn sin.

¹⁸ Dɛn di kiŋ tɔn to Doɛg, da Idɔmayt man ɛn ɔda am fɔ kil di man dɛn we de mek sakrifays fɔ pipul sin. So Doɛg insɛf tɔn ɛn kil dɛn ɔl. Na bin eti-fayv man i kil da de de, man dɛn we bin de mek sakrifays fɔ pipul sin, man dɛn we kin wɛr di ifɔd.

¹⁹ Infakt, i kil ɔl udat de insay Nɔb, dat na bebi o, yɔŋ bɔy ɛn yɔŋgyal o, man ɛn uman o ɛn ɔl dɛn kaw, ship, got ɛn ɛni animal we de de.

²⁰ Bɔt Abiata, wan pan Abimɛlɛk, we na Aitɔb in bɔypikin, in yon bɔypikin rɔnawe go jɔyn Devid.

²¹ I tɛl Devid se Sɔl dɔn kil ɔl di man dɛn we de mek sakrifays to PAPA GƆD fɔ pipul sin.

²² Devid tɛl Abiata se wɛn i bin si. Doɛg, da Idɔmayt to in papa da de de, i bin no se i go mɔs go tɛl Sɔl. Devid se nain fɔ blem fɔ we ɔl Abiata in papa in fambul dɛn day.

²³ So i tɛl Abiata fɔ lɛf to am as dɛn ɔltu gɛt di sem ɛnimi we want fɔ kil dɛn. Devid tɛl Abiata nɔ fɔ wɔri wans i de wit am, i sef.