1 Samiɛl 21 - Krio Fɔs Oli Baybul

Devid Rɔnawe Pan Sɔl

¹ Devid go na Nɔb, usay Abimɛlɛk we na di man we bin de mek sakrifays fɔ pipul sin, de. Abimɛlɛk skyad we i si am ɛn aks am wetindu nain wan i si.

² Devid tɛl am se na di kiŋ sɛn am ɛn di kiŋ tɛl am nɔ fɔ tɛl nɔbɔdi usay i de go ɛn wetin i de go du. I tɛl Abimɛlɛk se in dɔn tɛl in man dɛn fɔ mit am sɔnsay.

³ Afta i ansa Abimɛlɛk, i aks am fɔ fayv lof bred ɔ ɛnitin we i gɛt.

⁴ Abimɛlɛk tɛl Devid se i nɔ gɛt ɔdinari bred, pas sɔm pan di bred we dɛn kin gi to PAPA GƆD as sakrifays. I tɛl Devid se in ɛn in man dɛn kin it am if Devid in man dɛn nɔ du uman biznɛs.

⁵ Devid mek i no se ɛnitɛm in ɛn in man dɛn de kɔmɔt, dɛn nɔ de gɛt tɛm fɔ uman biznɛs. Devid tɛl am se ivin we nɔto oli tin dɛn de go du, in man dɛn de kip dɛnsɛf oli ɛnitɛm we dɛn de go patrol.

⁶ So Abimɛlɛk insɛf gi am di bred we dɛn kin gi as sakrifays to PAPA GƆD as nain nɔmɔ bin de. Di wan we i gi Devid, na wan we dɛn bin dɔn pul na di tebul fɔ put frɛsh wan.

⁷ Doɛg we na di bigman fɔ dɛn man dɛn we bin de mɛn Sɔl in ship dɛn, bin de de. Na bin Idɔmayt ɛn i bin de wet na PAPA GƆD in os fɔ sɔntin.

⁸ Devid aks Abimɛlɛk fɔ gi am spia ɔ sɔd. I se as na kwik biznɛs di kiŋ sɛn am pan, i nɔ ol in sɔd ɔ ɛni ɔda wɛpɔn.

⁹ Abimɛlɛk tɛl Devid se, di sɔd we i gɛt na bin Golayath in yon. Golayath na bin wan Filistin we Devid bin kil na Ila Vali. I tɛl Devid se dɛn rap am wit pisis biɛn di ifɔd, so if i want am, i kin tek am. So Devid tɛl am fɔ gi am as dat na di bɛst sɔd fɔ yuz.

¹⁰ Na da de de, Devid rɔnawe na Sɔl in an go to Ekish, we na kiŋ na Gath.

¹¹ Ekish in man dɛn aks am if nɔto di Devid we dɛn bin de siŋ bɔt da wande. Dɛn bin dans ɔlɔbɔt ɛn siŋ se “Devid kil tɛn tawzin pipul bɔt Sɔl kil wan tawzin nɔmɔ.”

¹² We Devid yɛri wetin Ekish in man dɛn se, i bigin wɔndrin ɛn dat mek i fred Ekish we na kiŋ na Gath.

¹³ So insɛf fɔmkres. Ɛnitɛm i de usay Ekish de, i kin de rayt rayt pan di do ɛn get dɛn, dɔn i kin lɛf in mɔt mek pit de rɔn dɔŋ go nain biabia lɛkɛ se in na kresman.

¹⁴ Ekish ala pan in man dɛn ɛn aks dɛn wetin mek dɛn kɛr Devid, we na kresman go to am.

¹⁵ I tɛl dɛn se dɛn gɛt bɔku kresman so dɛn nɔ gɛt fɔ briŋ mɔ fɔ am. I drɛb dɛn ɔl kɔmɔt nain os.