1 Samiɛl 20 - Krio Fɔs Oli Baybul

Jonɛthan Ɛp Devid

¹ Devid rɔnawe kɔmɔt na Neɔth insay Rama go to Jonɛthan go aks am wetin in du in papa we mek i de biɛn in blɔd.

² Jonɛthan kɔrej am ɛn tɛl am se in nɔ gɛt fɔ day as in papa kin tɛl am wetin i want fɔ de du ɔltɛm, wɛda na big ɔ na smɔl tin. I se in papa nɔ go ayd tin lɛk dat pan am.

³ Bɔt Devid mek Jonɛthan no se in papa nɔ go tɛl am se i wan kil Devid bikɔs i no se Jonɛthan go fil bad, i tɛl Jonɛthan se in papa no gud gud wan se dɛn na tayt padi. Devid swɛ se in de tɛl Jonɛthan se wans PAPA GƆD nɔ day ɛn insɛf nɔ day yet, day nɔ de fa frɔm am.

⁴ Jonɛthan se in go du ɛnitin we Devid aks am fɔ du.

⁵ Nain Devid tɛl am se, di nɛks de we na di Nyu Mun fɛstival, i fɔ de fɔ it wit di kiŋ so in go lɛk fɔ go ayd na di fil ɛn de de te ivintɛm na di de we mek tri.

⁶ I se if Jonɛthan in papa fil am we i nɔ de fɔ it, Jonɛthan fɔ tɛl am se Devid tek pamishɔn fɔ go nain om na Bɛtliɛm kwik fɔ tek pat pan di famili sakrifays we dɛn kin gɛt ɛvri ia.

⁷ Devid se if we Jonɛthan se so, in papa jɛs se ɔrayt, dɛn i sef, bɔt if in papa in at wam fɔseka dat, dɛn Jonɛthan fɔ ɔndastand se i want fɔ du sɔntin bad to am.

⁸ Devid se dɛn ɔltu bin dɔn swɛ se dɛn go bi tayt padi so mek Jonɛthan nɔ kɔmɔt biɛn am. I se if Jonɛthan no se i nɔ de du fayn to in papa we na Sɔl, i bɛtɛ lɛ insɛf sɛf kil am bifo i mek in papa kil am.

⁹ Jonɛthan ansa se i nɔ gɛt fɔ day. I se in bin fɔ tɛl Devid if i bin no se in papa wan du bad to am.

¹⁰ Devid aks Jonɛthan aw i go no if in papa in at wam.

¹¹ Jonɛthan kɔl am mek dɛn ɔltu go na di fil.

¹² I swɛ to PAPA GƆD we na di PAPA GƆD we Izrɛl de wɔship se in go mɔs tray fɔ no wetin in papa fil di nɛks de ɔ bay di tɔd de.

¹³ I se wɛda i gladi wit Devid ɔ if i want fɔ du Devid bad, i mɔs sɛn tɛl Devid ɔ nɔ so mek PAPA GƆD lɛ i alaki if i nɔ lɛ Devid rɔnawe saful. I se mek PAPA GƆD de wit yu as I bin de wit mi papa.

¹⁴ I beg Devid se wans i nɔ day yet, Devid fɔ tan lɛkɛ PAPA GƆD to am ɛn trit am fayn wan we go mek i nɔ day ɛn

¹⁵ i fɔ trit ɔl di pipul nain famili dɛnsɛf di sem we, di tɛm we PAPA GƆD go dɔn pul in ɛnimi dɛn biɛn am.

¹⁶ So Jonɛthan ɛn Devid mek bagin ɛn i wish se PAPA GƆD go fɛt ɔl Devid in ɛnimi dɛn fɔ am.

¹⁷ Jonɛthan swɛ igen se natin nɔ go pat dɛn as in at tek Devid lɛk aw i lɛk insɛf.

¹⁸ Jonɛthan tɛl Devid se dɛn go si se i nɔ de na di Nyu Mun Fɛstival bikɔs in sit go ɛmti,

¹⁹ so we i go dɔn tek tu de, i fɔ go na di ples we i bin ayd fɔs, ivintɛm, ɛn wet fɔ am nia di Izrɛl ston.

²⁰ I se in go shut tri aro nia di ston lɛkɛ se na sɔntin i de shut,

²¹ dɔn i go sɛn in bɔbɔ fɔ go fɛn di aro dɛn. I se if in tɛl di bɔbɔ se di aro dɛn de nia am mek i briŋ dɛn kam, dɛn Devid fɔ kɔmɔt na do bikɔs wans PAPA GƆD nɔ de day, i sef, nɔbɔdi nɔ go ambɔg am.

²² I se bɔt if i tɛl di bɔbɔ se mek i go yanda usay di aro dɛn de, dɛn Devid fɔ rɔnawe bikɔs dat sho se PAPA GƆD want am fɔ kɔmɔt de.

²³ I mɛmba Devid se PAPA GƆD de fɔ dɛn witnɛs se dɛn ɔltu dɔn mek prɔmis ɛn i nɔ go ɛva kɔmɔt biɛn am.

²⁴ So Devid insɛf go ayd na fil ɛn di kiŋ sidɔm na tebul fɔ it we di Nyu Mun Fɛstival de go ɔn.

²⁵ I bin sidɔm usay i dɔn yus fɔ sidɔm, nia di wɔl ɔpozit Jonɛthan, ɛn Abna bin sidɔm nia am bɔt Devid in yon sit bin ɛmti.

²⁶ Sɔl nɔ bin ebul se ɛnitin da de de bikɔs i bin de tink se na bikɔs Devid nɔ klin na PAPA GƆD yay mek i nɔ de de.

²⁷ Bɔt di nɛks de, we na di sɛkɛn de na di mɔnt, Devid in sit bin stil ɛmti, so Sɔl aks Jonɛthan wetindu Jɛsi in bɔypikin nɔ go it wit dɛn di tu de.

²⁸ Jonɛthan se Devid did tɛl am ɛn aks pamishɔn fɔ go na Bɛtliɛm.

²⁹ I se Devid se in famili de mek sakrifays na di siti ɛn in brɔda dɛn aks am fɔ go. I se Devid se mek i trit am fayn ɛn lɛf am fɔ go si in brɔda dɛn. I tɛl in papa se na dat mek Devid nɔ de de.

³⁰ Sɔl in at wam pan Jonɛthan ɛn i kɔs am se i mama we bɔn am alaki. I se if Jonɛthan nɔ no se we i de fasin pan Devid nainsɛf i de ambɔg ɛn i de put in mama pan shem.

³¹ I tɛl Jonɛthan fɔ sɛn go briŋ Devid kam lɛ i kil am bikɔs wans Devid nɔ day, in di Jonɛthan ɔ ɛni in jɛnareshɔn dɛn nɔ go bi kiŋ.

³² Jonɛthan aks in papa wetin mek i fɔ kil Devid we i nɔ du natin.

³³ Bɔt we in papa sɛn in spia fɔ chuk am, i no gud wan se in papa riali want fɔ kil Devid.

³⁴ So Jonɛthan blez ɛn grap kɔmɔt na di tebul, i nɔ it sɛf di sɛkɛn de na di mɔnt bikɔs i bin vɛks pan in papa fɔ aw i de disgres am bikɔs ɔf Devid.

³⁵ Wɛn do klin Jonɛthan go na di fil we in ɛn Devid bin dɔn se dɛn go mit. I go wit in bɔbɔ.

³⁶ I tɛl in bɔbɔ fɔ rɔn go fɛn ɛni aro we i shut. Bɔt as di bɔbɔ de rɔn, na so i de shut di aro go fawe.

³⁷ We di bɔbɔ rich usay Jonɛthan in aro fɔdɔm, Jonɛthan ala se lɛ i go luk bifo say.

³⁸ I ala se ɔri! Go wantɛm! Nɔ westɛm! Di bɔbɔ pik di aro ɛn go bak go mit in bra.

³⁹ Di bɔbɔ nɔ no natin. Na Devid ɛn Jonɛthan nɔmɔ bin no dɛn kod.

⁴⁰ Jonɛthan gi in bɔbɔ in bo ɛn aro dɛn ɛn tɛl am mek i go bak na siti.

⁴¹ Afta di bɔbɔ dɔn go, Devid grap na di say we i bin de ayd nia di ston ɛn baw tri tɛm wit in fes na grɔn to Jonɛthan. Dɛn grip dɛnsɛf, kis gud bay ɛn kray bɔt na Devid kray pas dɛn tu.

⁴² Jonɛthan tɛl Devid mek i nɔ wɔri sins dɛn ɔltu dɔn swɛ se dɛn nɔ go kɔmɔt biɛn dɛn kɔmpin ɛn na PAPA GƆD na dɛn witnɛs ɛn nain go bi witnɛs bak fɔ dɛn pikin dɛn te go. Dɔn Devid lɛf go, ɛn Jonɛthan in tɔn bak go na siti.