1 Samiɛl 2 - Krio Fɔs Oli Baybul

Ana In Prea

¹ Ana bin pre to PAPA GƆD bak se, “Mi at go es PAPA GƆD ɔp; a gladi we PAPA GƆD gi mi trɛnk. A de laf mi ɛnimi dɛn bikɔs a de gladi we yu fri mi.

² “Nɔbɔdi nɔ de we oli lɛk PAPA GƆD: Natin nɔ de we tan lɛk am; Natin nɔ kin kɔba wi lɛk aw PAPA GƆD de kɔba wi.

³ Nɔ mek plɛnti nɔys se yu de blɔf nɔ de kak bikɔs PAPA GƆD na PAPA GƆD we no ɔltin, ɛn nain de pe ɔlman fɔ wetin i du.

⁴ I dɔn brok di tin we dɛn kin tek fɛt, bɔt dɛn wan we nɔ ebul fɛt, i dɔn gi dɛn trɛnk.

⁵ Dɛn wan, we bin gɛt bɔku fɔ it, de wok naw fɔ dɛn lili ɛn natin. Bɔt dɛn wan we nɔ bin gɛt tin fɔ it, nɔ de aŋri igen. Di uman we nɔ bin de bɔn dɔn bɔn sɛvin pikin naw, bɔt di wan we bin gɛt bɔku pikin lɛf in wan bikɔs ɔl in pikin dɛn dɔn day.

⁶ Na PAPA GƆD de gi layf, nain de tek layf; Nain de mek yu day ɛn nain de mek sik nɔ kil yu.

⁷ PAPA GƆD de mek yu po ɔ i gi yu jɛntri; nain de put yu dɔŋ ɔ es yu ɔp.

⁸ I kin pul poman kɔmɔt pan po ɛn pul am pan po layf; I mek i sidɔm wit ayɔps ɛn gɛt wetin dɛnsɛf de ɛnjɔy. Na PAPA GƆD mek di wɔl; i fiks ɔltin aw dɛn fɔ de.

⁹ “I de gayd udat de du wetin i want, bɔt i de mek di bad man day kwik. As wi nɔ de du natin bay wi pawa;

¹⁰ PAPA GƆD go skata in ɛnimi dɛn. I go trɛtin dɛn wit in vɔys lɛk tɛnda frɔm ɛvin. Na PAPA GƆD go jɔj ɔlman na wɔl. I go gi mɔ pawa to di wan we in dɔn pik fɔ bi Kiŋ fɔ in pipul dɛn.”

¹¹ Dɔn Ɛlkena ɛn Ana go bak na dɛn os na Rama bɔt Samiɛl in lɛf fɔ wok na PAPA GƆD in os na Shaylɔ wit Ilaɛl we bin de de as di man we de mek sakrifays fɔ pipul sin.

Di Stori Bɔt Ilaɛl In Bɔy Pikin Dɛn

¹² Ilaɛl in bɔypikin dɛn na bin bad baba dɛn. Dɛn nɔ bin de biev lɛk udat dɛn no PAPA GƆD.

¹³ Dɛn bin gɛt wan bad trik we dɛn kin du to di pipul dɛn. Ɛnitɛm we ɛnibɔdi go fɔ mek sakrifays, we di bif kin de bwɛl, dɛn bɔbɔ dɛn kin go de wit wan fɔk we gɛt tri tit.

¹⁴ Dɛn go chuk di bif insay di pɔt ɔ pan we dɛn put am fɔ bwɛl, dɔn di man we de mek sakrifays fɔ pipul sin go tek wetin di fɔk chuk ɛn briŋ ɔp as in yon. Na so dɛn bin de biev to ɔl di Izrɛlayt dɛn we kin go na Shaylɔ.

¹⁵ Dɛn kin so du am dat ivin we di fat nɔ bɔn yet, we nain fɔ bi di sakrifays we PAPA GƆD fɔ gɛt, di bɔbɔ dɛn kin dɔn go aks di pɔsin we de bwɛl di bif fɔ gi di man dɛn we de mek sakrifays fɔ pipul sin dɛn yon. Di bɔbɔ dɛn kin se di man dɛn we de mek sakrifays fɔ pipul sin nɔ go tek bwɛl bif as i want fɔ go ros in yon, so na rɔ bif nɔmɔ i want.

¹⁶ If di pɔsin we de bwɛl di bif se nɔto fayn tin ɛn aks di bɔbɔ fɔ wet te di fat bɔn bifo i tek wetin i want, di bɔbɔ dɛn go tɛl am se if i nɔ gi dɛn saful wan, dɛn go tek am bay fos.

¹⁷ PAPA GƆD bin dɔn gens wit wetin dɛn de du as dɛn nɔ sho se dɛn gɛt ɛni rɛspɛkt fɔ PAPA GƆD.

Wetin Apin To Samiɛl Na Shaylɔ

¹⁸ Da sem tɛm de, Samiɛl bin de wok fɔ PAPA GƆD nain os. Na bin bɔbɔ. I kin wɛr wan spɛshal klos we dɛn tek linin matirial mek.

¹⁹ We in mama kin go ɔp de wit in man fɔ go mek di sakrifays we dɛn kin mek ɛvri ia, i kin kɛr wan smɔl klos go we i kin dɔn so fɔ am.

²⁰ Ilaɛl go blɛs Ɛlkena ɛn in wɛf. I go tɛl dɛn se, lɛ PAPA GƆD gi dɛn mɔ pikin we Ana go bɔn so dat i go tek di ples ɔf di wan we i pre fɔ we i dɔn gi bak to PAPA GƆD. Afta dat, dɛn kin go na dɛn os.

²¹ PAPA GƆD bin gud to Ana; I gɛt bɛlɛ ɛn i bɔn tri bɔbɔ ɛn tu titi. Ɔl da tɛm de, Samiɛl in lɛf na PAPA GƆD in os usay i gro ɔp.

Ilaɛl Ɛn In Bɔy Pikin Dɛn

²² Ilaɛl bin dɔn tɔn olpa bɔt i bin de yɛri bɔt ɔl wetin in bɔypikin dɛn de du to di Izrɛlayt dɛn ɛn aw dɛn bin ivin de gɛt biznɛs wit di uman dɛn we bin de fɔ de wok na di Tɛnt usay dɛn kin mit PAPA GƆD in domɔt.

²³ So i aks dɛn wetin mek dɛn de biev so. I tɛl dɛn se i dɔn yɛri wetin di pipul dɛn de se bɔt di bad tin dɛn we dɛn de du.

²⁴ I tɛl dɛn nɔ fɔ de du so as di tin we i de yɛri ɔlman de tɔk, nɔ gud.

²⁵ I mek lɛ dɛn no se if pɔsin ambɔg in kɔmpin mɔtalman, PAPA GƆD kin tɔk dɛn kes bɔt if na PAPA GƆD pɔsin ambɔg, nɔbɔdi nɔ go de fɔ tɔk fɔ am. Bɔt pan ɔl dat, dɛn nɔ yɛri in wɔd, bikɔs PAPA GƆD bin dɔn plan fɔ dɔnawe wit dɛn.

²⁶ Bɔt Samiɛl in bin jɛs de rɔju, PAPA GƆD bin lɛk am ɛn ɔlman bin lɛk in biznɛs.

Wetin PAPA GƆD Se Bɔt Ilaɛl In Famili

²⁷ Wande, wan man we bin de tɔk fɔ PAPA GƆD go mit Ilaɛl. I se, PAPA GƆD tɛl am se i bin sho insɛf to Ilaɛl in fɔstɛm-papa dɛn na Ijipt.

²⁸ I se, PAPA GƆD se i bin pik in papa fɔ bi man we de mek sakrifays fɔ pipul sin pan ɔl di fambul dɛn we bin de na Izrɛl. Nain papa i pik fɔ de go nain ɔlta, fɔ bɔn insɛns ɛn fɔ wɛr spɛshal klos usay i de. I se PAPA GƆD se i mek ɔl udat kɔmɔt na Ilaɛl in papa in os fɔ de gɛt ɔl di ɔfrin we bɔn na faya we di Izrɛlayt dɛn kin de mek.

²⁹ I se PAPA GƆD se fɔ aks Ilaɛl wetin mek in ɛn in bɔypikin dɛn de trit di sakrifays we i dɔn se pipul fɔ mek, bad so. PAPA GƆD se fɔ aks bak se, wetindu Ilaɛl de gri mek in bɔypikin dɛn it wetin in fɔ gɛt as sakrifays frɔm di Izrɛlayt dɛn an.

³⁰ Di man we de tɔk fɔ PAPA GƆD se, na dat mek PAPA GƆD we na di PAPA GƆD we Izrɛl de wɔship se in bin dɔn se na Ilaɛl in famili ɛn dɛn jɛnareshɔn go bi di man dɛn we de mek sakrifays fɔ pipul sin te go, bɔt in de se i nɔ gɛt fɔ bi so igen, bikɔs na udat sho rɛspɛkt fɔ am, i go rɛspɛkt, bɔt udat de lili am, insɛf nɔ go bisin bɔt am.

³¹ I tɛl dɛn se, PAPA GƆD se, di tɛm de kam we in go dɔnawe wit ɔl di man dɛn we de nain os ɛn ɔlman nain fambul. Dɛn ɔl go kil dɛn ɔl

³² dɔn in ɛn in fambul dɛn go de kɔle pan wetin i de du. Dɛn go de fɔ si ɔl di gud we i de du na Izrɛl bɔt nɔn pan in fambul nɔ go de te i ol fɔ ɛnjɔy am.

³³ PAPA GƆD tɛl di man fɔ tɛl am se, di pɔsin dɛn we i nɔ go dɔnawe wit bɔt we go de fɔ wok nain ɔlta, go blɛn ɛn go de kray ɔltɛm bikɔs dɛn at nɔ go swit, ɛn dɛn go kil ɔl di ɔda wan dɛn.

³⁴ As fɔ in tu bɔypikin, Ofni ɛn Finɛas, PAPA GƆD se dɛn ɔltu go day di sem de ɛn na dat go mek Ilaɛl no se ɔl wetin i dɔn tɔk go bi.

³⁵ Di man se PAPA GƆD se in go mɛn wan man we go de mek sakrifays fɔ pipul sin, we go de du wetin in want fɔ mek i du we de nain at. PAPA GƆD se in go mek shɔ se bɔku pipul na dis man ya we de mek sakrifays fɔ pipul sin in os, de fɔ am ɛn na dɛn go de wok wit di Kiŋ we i go pik ɔltɛm.

³⁶ PAPA GƆD se ɔl Ilaɛl in yon fambul dɛn go go beg am fɔ fɛn wok fɔ dɛn na PAPA GƆD in os so dat dɛn go gɛt mɔni ɛn it.