1 Samiɛl 19 - Krio Fɔs Oli Baybul

¹ Sɔl tɛl in bɔypikin we na Jonɛthan ɛn ɔl in wokman dɛn, fɔ kil Devid. Bɔt Jonɛthan bin lɛk Devid in biznɛs so

² i tɛl am se in papa de fɛn we fɔ kil am. I tɛl Devid se di nɛks de mɔnin, i fɔ go ayd dɔn

³ in go go wit in papa na di fil we i de ayd ɛn tɔk to am bɔt Devid dɔn in go tɛl am ɛnitin bad we i yɛri.

⁴ Jonɛthan tɔk fayn bɔt Devid to in papa Sɔl. I tɛl Sɔl se mek i nɔ fɔ vɛks pan Devid bikɔs i nɔ du nɔn bad bɔt sɛf i dɔn prɔfit bɔku na Devid in ed.

⁵ I tɛl Sɔl se Devid risk in layf fɔ kil di Filistin ɛn bikɔs ɔf dat PAPA GƆD pul Izrɛl pan shem ɛn ɔlman si dat ɛn gladi. I aks am se wetindu i go want fɔ kil pɔsin lɛk Devid we nɔ du natin rɔŋ.

⁶ Sɔl lisin we Jonɛthan de tɔk ɛn swɛ se wans PAPA GƆD nɔ de day, in nɔ go kil Devid.

⁷ So Jonɛthan kɔl Devid ɛn tɛl am ɔl wetin dɛn tɔk. I briŋ Devid kam bak to Sɔl ɛn dɛn bin de lɛk aw dɛn bin dɔn de fɔs.

⁸ Wa fɔdɔm bak wit di Filistin dɛn ɛn Devid go fɛt. I so kil di Filistin dɛn dat dɛn gɛt fɔ rɔnawe.

⁹ Bɔt as Sɔl sidɔm nain os ɛn ol in spia, nain di ivul spirit frɔm PAPA GƆD kam pan am. As Devid bin de ple di ap,

¹⁰ Sɔl tray fɔ chuk am na di wɔl wit in spia bɔt Devid balans am ɛn di spia chuk di wɔl. Da nɛt de Devid kɔmɔt nia am saful.

¹¹ Sɔl sɛn man dɛn na Devid in os as wachman dɛn so dat we do klin dɛn go kil am. Bɔt Mikal in wɛf tɛl am se if i nɔ rɔnawe da nɛt de, dɛn go kil am di nɛks de.

¹² So Mikal mek Devid pas na wan pan di winda dɛn fɔ rɔnawe.

¹³ Afta dat Mikal tek wan dɔlbebi, le am na di bed, put got ia nain ed ɛn kɔba am wit Devid in klos.

¹⁴ Wɛn Sɔl sɛn di man dɛn fɔ go kech Devid, Mikal tɛl dɛn se i nɔ wɛl.

¹⁵ Bɔt Sɔl tɛl di man dɛn fɔ go bak fɔ Devid. I se mek dɛn briŋ am nain bed mek i go kil am.

¹⁶ Bɔt we di man dɛn go insay dɛn si se na dɔlbebi lidɔm na bed wit got ia nain ed;

¹⁷ Sɔl aks Mikal wetin mek i ple gem pan am ɛn mek in ɛnimi rɔnawe. Mikal tel am se i beg am fɔ rɔnawe ɛn trɛtin am se i go kil am.

¹⁸ Wɛn Devid dɔn rɔnawe, i go to Samiɛl na Rama ɛn tɛl am ɔl wetin Sɔl dɔn du am. So in ɛn Samiɛl go tap na Neɔth.

¹⁹ Wɔd rich Sɔl se Devid de na Neɔth insay Rama;

²⁰ So i sɛn man dɛn fɔ go kech Devid. As dɛn bin de go, dɛn mit sɔm prɔfɛt dɛn de tɔk PAPA GƆD Wɔd ɛn Samiɛl bin de de as dɛn lida. Nain PAPA GƆD in spirit fɔdɔm pan Sɔl in man dɛn ɛn dɛnsɛf bigin fɔ tɔk PAPA GƆD Wɔd.

²¹ We Sɔl yɛri dat, i sɛn mɔ man dɛn ɛn di sem tin apin to dɛn. Sɔl stil sɛn wan ɔda sɛt fɔ di tɔd tɛm ɛn stil di sem tin apin.

²² Faynali insɛf go na Rama to usay wata wɛl de na Sɛku ɛn aks fɔ Samiɛl ɛn Devid. Dɛn tɛl am se dɛn de na Neɔth.

²³ Sɔl go na Neɔth insay Rama bɔt as i bin de go PAPA GƆD in Spirit fɔdɔm pan am gud ɛn i bigin waka de tɔk PAPA GƆD Wɔd te i rich Neɔth.

²⁴ I pul in klos ɔl ɛn insɛf tɔk PAPA GƆD Wɔd usay Samiɛl de. Na so i lidɔm ɛmti bɔdi di wanol de ɛn nɛt. Na dat mek pipul kin tɔk se, “Sɔl insɛf na prɔfɛt?”