1 Samiɛl 18 - Krio Fɔs Oli Baybul

¹ Devid ɛn Sɔl dɔn di tɔk we dɛn bin de tɔk. Afta Devid dɔn tɔk dɔn, i mit Jonɛthan we na Sɔl in bɔypikin. Jonɛthan jɛs lɛk Devid in biznɛs ɛn in at tek am.

² Frɔm da de de Sɔl mek Devid tap wit am ɛn nɔ mek i go nain papa in os.

³ Jonɛthan swɛ se in go lɛk Devid lɛkɛ insɛf.

⁴ So Jonɛthan pul di klos we i bin wɛr ɛn put am pan Devid wit in trɔsis ɛn ivin in sɔd, bo fɔ ɔntin ɛn in bɛlt.

⁵ Ɛnitin we Sɔl aks Devid fɔ du, i go so du am fayn dat Sɔl gi am ay pozishɔn nain ami. Ɔlman na di ami ɛn di ɔda Izrɛlayt dɛn bin gladi fɔ dat.

Sɔl Bigin Jɛlɔs Devid

⁶ Wɛn di man dɛn bin de tɔn bak go na dɛn os afta Devid bin dɔn kil di Filistin, di uman dɛn kɔmɔt na ɔl di siti dɛn na Izrɛl wit siŋ ɛn dans fɔ go mit Kiŋ Sɔl. Na so dɛn bin de gladi we dɛn de siŋ ɛn shek tamborin ɛn ple flut.

⁷ As dɛn bin de dans, na so dɛn de siŋ se; “Sɔl kil wan tawzin pipul bɔt Devid in dɔn kil tɛn tawzin pipul.”

⁸ Dis mek Sɔl in at wam bad. I bigin tink bɔt wetin dɛn de siŋ se Devid kil tɛn tawzin pipul bɔt in kil wan tawzin nɔmɔ. I tink se natin nɔ go lɛf fɔ Devid pas fɔ bi kiŋ.

⁹ So frɔm da tɛm de Sɔl bigin jɛlɔs Devid ɛn kip am na at.

¹⁰ Di nɛks de PAPA GƆD mek ivul spirit fɔdɔm pan am at at wan. I bin de nain os de wayl, we Devid in bin de ple di ap lɛk aw i dɔn yuz fɔ du. Nain Sɔl jɛs gɛda in spia

¹¹ ɛn sɛn am pan am. I tɛl insɛf se i go jɛs yus am fɔ chuk Devid so dat i go fasin am na di wɔl. Bɔt di tu tɛm we i du am, Devid bin de balans am.

¹² Sɔl bin de skyad naw se PAPA GƆD de wit Devid bɔt i dɔn lɛf am.

¹³ Dis mek i pul Devid kɔmɔt nia am. I mek Devid kɔmanda ɛn gi am wan tawzin man fɔ de kɔmand so Devid bin gɛt fɔ de go fɛt.

¹⁴ Bɔt i bin de spak pan ɔl wetin i de du bikɔs PAPA GƆD bin de wit am.

¹⁵ Wɛn Sɔl si se i de pul nem pan ɔltin, i fred am mɔ.

¹⁶ Bɔt ɔlman na Izrɛl ɛn Juda bin lɛk Devid bikɔs nain bin de lid dɛn fɔ go fɛt.

Devid Mared Sɔl In Gyal Pikin

¹⁷ Sɔl tɛl Devid se i de gi am in fɔs gyal pikin we nem Mirab fɔ mared if nɔmɔ Devid go prɔmis am se i go wok fɔ am gud ɛn fɛt di wa dɛn we PAPA GƆD gɛt. I bin de tink nain at se na fɔ lɛf am gi di Filistin dɛn nɔmɔ. So i nɔ go bɔda wit am.

¹⁸ Devid tɛl Sɔl se in na natin ɛn in famili sɛf nɔto ɛnitin fɔ mek lɛkɛ in bi di kiŋ in Sɔnɛnlɔ.

¹⁹ Bɔt we di tɛm rich fɔ lɛ dɛn an ova Mirab we na Sɔl in gyal pikin, to Devid fɔ mared, na to wan man we nem Adriɛl we kɔmɔt na Mɛola dɛn mek i mared.

²⁰ Sɔl in ɔda gyal pikin we nem Mikal bin dɔn fɔl fɔ Devid, so we Sɔl yɛri dat i gladi.

²¹ I tɛl insɛf se na Mikal i go gi Devid so dat i go yuz am fɔ trap Devid we go mek di Filistin dɛn kil am. So Sɔl tɛl Devid se i gɛt sɛkɛn chans fɔ bi in Sɔnɛnlɔ.

²² Sɔl naw go tɔk to in wokman dɛn fɔ go koks Devid na kɔna mek i bi in Sɔnɛnlɔ as i lɛk am ɛn ɔl di wokman dɛn lɛk am.

²³ Dɛnsɛf go tɛl Devid dɛn sem tin de bɔt Devid aks dɛn if dɛn tink se fɔ bi di kiŋ in sɔnɛnlɔ na smɔl tin. I se in na po poman ɛn bɛtɛ pipul nɔ sabi am sɛf.

²⁴ Wɛn Sɔl in wokman dɛn tɛl Sɔl wetin Devid se,

²⁵ i sɛn dɛn fɔ go tɛl Devid se i want am fɔ kil wan ɔndrɛd Filistin nɔmɔ, sakɔmsayz dɛn ɛn briŋ di kanda dɛn fɔ sho am. I tɛl Devid se na dat nɔmɔ go bi di put kola fɔ di mared so dat in go ebul pe in ɛnimi dɛn bak fɔ wetin dɛn dɔn du. Sɔl in plan na fɔ lɛ di Filistin dɛn kil Devid.

²⁶ Wɛn di wokman dɛn go bak go tɛl Devid wetin Sɔl se, Devid gladi fɔ bi di kiŋ in Sɔnɛnlɔ.

²⁷ Bifo di tɛm rich we Sɔl gi Devid, Devid tek in man dɛn go fɛt ɛn dɛn kil tu ɔndrɛd Filistin, sakɔmsayz dɛn ɛn briŋ dɛn kanda dɛn, fɔ sho se nain kil dɛn ɛn dɛn kɔnt ɔl wan wan fɔ tɛl di kiŋ so i go bi di kiŋ in Sɔnɛnlɔ. So Sɔl gi in gyal pikin, Mikal, to Devid fɔ mared.

²⁸ Wɛn Sɔl fent se PAPA GƆD de wit Devid ɛn dat in gyal pikin lɛk am,

²⁹ dat mek i fred mɔ ɛn Devid bi in ɛnimi te i day.

³⁰ Di kɔmanda dɛn na di Filistin ami kɔntinyu fɔ de fɛt di Izrɛlayt dɛn bɔt ɛnitɛm we dɛn fɛt, Devid de fɛt pas Sɔl in man dɛn, so ɔlman kam no bɔt Devid.