1 Samiɛl 16 - Krio Fɔs Oli Baybul

PAPA GƆD Anɔynt Devid Fɔ Bi Kiŋ

¹ PAPA GƆD tɛl Samiɛl se i nɔ go jɛs sidɔm de sɔri fɔ Sɔl sins in di PAPA GƆD nɔ want Sɔl fɔ bi kiŋ igen. PAPA GƆD se, “Grap, tek yu ɔn, put ɔyl insay ɛn go usay a tɛl yu. Yu de go to Jɛsi na Bɛtliɛm. A dɔn pik wan pan in bɔypikin dɛn fɔ bi kiŋ.

² Bɔt Samiɛl aks se aw in go du so we if Sɔl yɛri i go kil am. PAPA GƆD tɛl am se lɛ i kɛr wan yɔŋ uman kaw we nɔ bɔn yet go ɛn se in de go mek sakrifays to PAPA GƆD

³ dɔn i fɔ invayt Jɛsi to di sakrifays ɛn in go tɛl Samiɛl wetin fɔ du. PAPA GƆD se Samiɛl fɔ anɔynt di wan we i go tɛl am fɔ am.

⁴ Samiɛl insɛf du wetin PAPA GƆD tɛl am. Wɛn i rich na Bɛtliɛm, di bigman dɛn na di siti dɛn at kɔt ɛn aks am aw dɛn si am so.

⁵ Samiɛl ansa dɛn se lɛ dɛn nɔ wɔri. I se in kam mek sakrifays to PAPA GƆD. I se lɛ dɛn mek dɛnsɛf klin bifo PAPA GƆD ɛn fala am go mek di sakrifays. Dɔn in mek Jɛsi ɛn in bɔypikin dɛn klin bifo PAPA GƆD ɛn invayt dɛn to di sakrifays.

⁶ Wɛn dɛn rich, as i si Ɛliab so i tɔk nain at se, na di wan we PAPA GƆD dɔn pik tinap bifo am so.

⁷ Bɔt PAPA GƆD tɛl Samiɛl se mek i nɔ luk in fayn ɔ in ayt bikɔs i nɔ pik am sins nɔto so PAPA GƆD in de wok. I se mɔtalman de luk wetin in de si bɔt PAPA GƆD in de luk insay pɔsin in at.

⁸ Dɛn Jɛsi kɔl Abinadab fɔ kam pas bifo Samiɛl. Bɔt Samiɛl se, “Noto dis wan insɛf PAPA GƆD pik.”

⁹ Dɛn Jɛsi mek Shama in pas, bɔt Samiɛl tɛl dɛn se PAPA GƆD nɔ pik insɛf.

¹⁰ Na so Jɛsi mek ɔl in sɛvin bɔypikin pas bifo Samiɛl bɔt Samiɛl tɛl am se PAPA GƆD nɔ pik ɛniwan pan dɛn wande.

¹¹ I aks Jɛsi if na ɔl in bɔypikin dɔn so. Na da tɛm de Jɛsi tɛl am se na di wan we smɔl pas dɛn ɔl lɛf bɔt dat in de mɛn di ship dɛn. Samiɛl se dɛn fɔ go kɔl am bikɔs dɛn nɔ gɛt fɔ sidɔm it te i kam.

¹² So Jɛsi sɛn fɔ di bɔbɔ. Na so i fayn fɔ luk. Nain PAPA GƆD se, “Grap, anɔynt am, nain na di wan.”

¹³ Samiɛl tek di ɔn we i bin put di ɔyl ɛn anɔynt am usay ɔl in brɔda dɛn de. Frɔm da de de, nain PAPA GƆD in spirit fɔdɔm gud gud wan pan Devid. Dɛn Samiɛl tɔn bak go na Rama.

Devid Go Wok To Sɔl

¹⁴ Dis tɛm ya, PAPA GƆD in Spirit bin dɔn kɔmɔt pan Sɔl ɛn i sɛn ivul spirit fɔ de tɔmɛnt am.

¹⁵ Di man dɛn we bin de ɛp Sɔl, tɛl am se, as PAPA GƆD dɔn mek ivul spirit de tɔmɛnt am,

¹⁶ dɛn fɔ fɛn sɔmbɔdi fɔ am we kin ple di ap. Dɛn se if di pɔsin de ple ɛnitɛm we di ivul spirit kam pan am, i go wɛl.

¹⁷ So Sɔl tɛl dɛn fɔ go fɛn di pɔsin ɛn briŋ am kam to am.

¹⁸ Wan pan di man dɛn tɛl am se i sabi wan pan Jɛsi na Bɛtliɛm in bɔypikin we kin ple di ap gud gud wan. I se na pɔsin we gɛt trɛnk ɛn sabi fɛt, dɔn i sabi tɔk ɛn fayn fɔ luk. I se PAPA GƆD de wit am.

¹⁹ So Sɔl sɛn in mɛsenja dɛn fɔ go tɛl Jɛsi fɔ sɛn in bɔypikin, we nem Devid, we de mɛn Jɛsi in ship dɛn go to am.

²⁰ Jɛsi insɛf lod wan dɔŋki wit bred, wan jɔg wayn ɛn wan yɔŋ got ɛn sɛn dɛn wit Devid go to Sɔl.

²¹ Na so Devid tek bigin wok fɔ Sɔl. Sɔl bin lɛk am bad so Devid bi wan pan in bɔbɔ dɛn we kin tot di tin dɛn we i de tek fɛt.

²² Dɛn Sɔl sɛn tɛl Jɛsi lɛ i lɛf Devid fɔ wok to am as i gladi wit wetin Devid de du.

²³ Ɛnitɛm we di ivul spirit kin kam pan Sɔl, Devid go tek in ap ɛn ple. Dɔn Sɔl go fil bɛtɛ ɛn di ivul spirit go lɛf am.