1 Samiɛl 15 - Krio Fɔs Oli Baybul

Wa Wit Di Amalɛkayt Dɛn

¹ Samiɛl tɛl Sɔl se nain PAPA GƆD bin sɛn fɔ anɔynt am fɔ bi kiŋ na Izrɛl, so i fɔ lisin to di mɛsej we i gɛt frɔm PAPA GƆD.

² I se na wetin PAPA GƆD Ɔlmayti se, nain i de tɛl am. I tɛl am se PAPA GƆD se in de kam pɔnish di Amalɛkayt dɛn fɔ we dɛn bin atak di Izrɛlayt dɛn, di tɛm we dɛn bin de kɔmɔt insay Ijipt.

³ So naw in di Sɔl fɔ go atak di Amalɛkayt dɛn ɛn dɔnawe wit dɛn kpatakpata. I nɔ fɔ lɛf natin, man, uman, pikin, bebi, kaw, ship, kamɛl, dɔŋki, dɛn ɔl fɔ go.

⁴ So Sɔl kɔl ɔl in sojaman dɛn fɔ mit na Tɛlem. Tu ɔndrɛd tawzin na bin nɔmal sojaman dɛn, ɛn tɛn tawzin man kɔmɔt Juda.

⁵ Sɔl go na Amalɛk ɛn le ambush na di vali.

⁶ Dɛn i tɛl di Kɛnayt dɛn fɔ muf kɔmɔt to di Amalɛkayt dɛn mek i nɔ dɔnawe wit dɛn ɛn di Amalɛkayt dɛn togɛda, as dɛn bin trit di Izrɛlayt dɛn fayn we dɛn bin de kɔmɔt na Ijipt. So di Kɛnayt dɛn kɔmɔt usay di Amalɛkayt dɛn de.

⁷ Dɛn Sɔl atak di Amalɛkayt dɛn prɔpa wan frɔm Avila te Shɔ te di ist pat nia Ijipt.

⁸ I kil ɔlman bɔt lɛf Egag we na di Amalɛkayt dɛn kiŋ.

⁹ Sɔl ɛn in sojaman dɛn nɔ lɛf Egag nɔmɔ, dɛn nɔ pwɛl natin we gud lɛkɛ di bɛst ship ɛn kaw, dɛn fat fat kaw pikin ɛn dɛn fayn yɔŋ ship dɛn. Dɛn nɔ bin gladi fɔ dɔnawe wit dɛn tin ya bɔt ɛnitin we dɛn nɔ lɛk ɔ we nɔ fayn, dɛn bin dɔnawe wit dɛn kpatakpata.

PAPA GƆD Nɔ Want Sɔl Fɔ Bi Kiŋ Igen

¹⁰ Dɛn PAPA GƆD tɔk to Samiɛl. I se

¹¹ “A fil am bad we a mek Sɔl kiŋ bikɔs i nɔ bisin fɔ du wetin a se igen” Dat mek Samiɛl in at pwɛl ɛn in nɔ slip ol nɛt, i de pre to PAPA GƆD nɔmɔ.

¹² As do klin di nɛks mɔnin, i grap fɔ go mit Sɔl bɔt dɛn tɛl am se Sɔl go na Kamɛl usay i go put tablɛt fɔ lɛ dɛn tek mɛmba am ɛn i bin dɔn go dɔŋ na Gilgal da tɛm de.

¹³ Wɛn Samiɛl ɛn Sɔl mit, Sɔl pre mek PAPA GƆD blɛs Samiɛl ɛn tɛl Samiɛl se in dɔn du wetin PAPA GƆD tɛl am fɔ du.

¹⁴ Bɔt Samiɛl aks am, wetin mek a de yɛri ship ɛn kaw de kray.

¹⁵ Sɔl ansa se na di ship ɛn kaw dɛn we in sojaman dɛn tek na di Amalɛkayt dɛn an ɛn kip as di bɛst tin dɛn, fɔ kam sakrifays to in PAPA GƆD we na PAPA GƆD. I tɛl Samiɛl se bɔt dɛn dɔnawe wit ɔl di ɔda tin dɛn kpatakpata.

¹⁶ Wantɛm, wantɛm, Samiɛl jɛs se, “Lisin, mek a tɛl yu wetin PAPA GƆD tɛl mi yɛstade nɛt.” Sɔl sɛf tɛl am lɛ i tɔk.

¹⁷ Samiɛl tɛl am se pan ɔl we i nɔ bin de luk insɛf wit bɛtɛ yay, i bi kiŋ na Izrɛl. I mɛmba am se na PAPA GƆD anɔynt am fɔ bi kiŋ na Izrɛl

¹⁸ ɛn dat na di sem PAPA GƆD sɛn am fɔ go dɔnawe wit dɛn bad bad Amalɛkayt dɛn. I tɛl am se PAPA GƆD sɛn am fɔ dɔnawe wit dɛn kpatakpata,

¹⁹ ɛn aks am wetindu i nɔ du wetin PAPA GƆD se. I aks am wetindu i mek bigyay pan di tin dɛn ɛn du wetin PAPA GƆD nɔ lɛk.

²⁰ Sɔl stil pin se in du wetin PAPA GƆD tɛl am fɔ du. I se in go usay PAPA GƆD se fɔ go, in dɔnawe wit di Amalɛkayt dɛn kpatakpata ɛn ol dɛn kiŋ we na Egag.

²¹ I se na di sojaman dɛn kip di bɛst ship ɛn kaw dɛn fɔ mek sakrifays to PAPA GƆD we na Samiɛl in PAPA GƆD na Gilgal.

²² Nain Samiɛl se “PAPA GƆD want yu fɔ bɔn sakrifays to am ɔ i want yu fɔ du wetin go mek i gladi? No se fɔ du wetin PAPA GƆD se fɔ du, bɛtɛ pas di sakrifays we yu de mek to am.

²³ Bikɔs fɔ mek lɛk rebɛl pan PAPA GƆD jɛs tan lɛk yu de lukgrɔn ɛn fɔ mek tɔf pan am jɛs tan lɛk we man de wɔship ɔda gɔd dɛn. So sins yu lɛf fɔ du wetin PAPA GƆD want, insɛf nɔ want yu fɔ bi kiŋ igen”

²⁴ Na da tɛm de Sɔl se in dɔn sin ɛn du wetin nɔ rayt to PAPA GƆD. I se, in bin de fred in pipul dɛn so i du wetin dɛn want.

²⁵ I beg Samiɛl fɔ fɔgiv am ɛn fala am go wɔship PAPA GƆD.

²⁶ Samiɛl tɛl am se i nɔ go fala am. I se sins Sɔl nɔ du wetin PAPA GƆD se i fɔ du, PAPA GƆD sɛf nɔ want am fɔ bi kiŋ igen

²⁷ As Samiɛl tɔn fɔ go so, Sɔl grip in klos in ɛm ɛn i chɛr.

²⁸ So Samiɛl tɛl am se PAPA GƆD dɔn pul Izrɛl kɔmɔt nain an da de de ɛn i dɔn gi am to in neba we na ɔda pɔsin we bɛtɛ pas am.

²⁹ Samiɛl tɛl am se PAPA GƆD we na Izrɛl dɛn waŋren PAPA GƆD, nɔ de lay ɛn i nɔ de chenj in maynd as in nɔto mɔtalman we gɛt fɔ chenj in maynd.

³⁰ Sɔl ansa se i no se i dɔn sin bɔt beg Samiɛl lɛ i go bak wit am fɔ wɔship PAPA GƆD ɔ nɔ so i go shem pan di bigman dɛn we de na Izrɛl.

³¹ So Samiɛl fala am go ɛn Sɔl go wɔship PAPA GƆD.

³² Dɛn Samiɛl se fɔ pul Egag, di Amalɛkayt dɛn kiŋ na do. Egag insɛf waka go mit am. I bin de tink se day dɔn pas oba in ed.

³³ Bɔt Samiɛl tɛl am se lɛk aw i dɔn kil bɔku pipul dɛn we mek dɛn mami nɔ gɛt pikin igen, na so insɛf yon mama nɔ go gɛt pikin igen ɛn Samiɛl kil Egag frɔnt PAPA GƆD na Gilgal.

³⁴ Dɛn Samiɛl go bak na Rama ɛn Sɔl go bak nain os na Gibia.

³⁵ Te Samiɛl day, i nɔ go fɛn Sɔl igen bɔt i bin sɔri fɔ am. PAPA GƆD fil am bad we i mek Sɔl bi kiŋ na Izrɛl.