1 Samiɛl 14 - Krio Fɔs Oli Baybul

Jonɛthan Atak Sɔm Filistin Dɛn

¹ Wande Jonɛthan we na Sɔl in bɔypikin tɛl in bɔbɔ we kin tot in tin dɛn fɔ fɛt se, mek dɛn go oba to di Filistin dɛn bes. Bɔt i nɔ tɛl in papa natin.

² Da tɛm de Sɔl in bin tap ɔnda wan pomigranet tik na Migrɔn we nɔ de tu fa frɔm Gibia. Siks ɔndrɛd man bin de wit am,

³ ɛn pan dɛn Aija bin de we wɛr Ifɔd. Na bin Ikabɔd in brɔda we na Aitɔb dat na Finɛas in bɔypikin, nain bɔn am. Finɛas, in na bin Ilaɛl, di man we bin de mek sakrifays fɔ pipul sin to PAPA GƆD na Shaylɔ in yon bɔypikin. Nɔbɔdi nɔ bin no se Jonɛthan dɔn kɔmɔt de.

⁴ Na di ples we Jonɛthan want fɔ pas fɔ go na di Filistin dɛn bes, tu ay ay rɔk bin de de. Dɛn kɔl wan Bozɛz ɛn di ɔda wan Sɛnɛ.

⁵ Wan pan dɛn bin de bay di nɔth nia Mikmash ɛn di ɔda wan bay di sawt nia Giba.

⁶ Jonɛthan tɛl in bɔbɔ we kin tot in tin dɛn fɔ fɛt se lɛ dɛn go na dɛn ithɛn dɛn bes sɔntɛm PAPA GƆD go ɛp dɛn as PAPA GƆD de yuz bɔku pipul ɔ smɔl pipul if i wan fɔ ɛp pipul.

⁷ Di bɔbɔ se lɛ i du wetin i fil fɔ du. I tɛl Jonɛthan se in de wit am wit ɔl in at.

⁸ Jonɛthan tɛl am se lɛ dɛn krɔs go oba to di man dɛn lɛ dɛn si dɛn.

⁹ I tɛl di bɔbɔ se if di man dɛn se lɛ dɛn wet ɛn si if dɛn nɔ go kam mit dɛn, dɛn fɔ tinap usay dɛn de ɛn nɔ go mit dɛn.

¹⁰ Bɔt if dɛn tɛl dɛn fɔ go mit dɛn, dɛn fɔ go bikɔs dat go sho se PAPA GƆD de ɛp dɛn fɔ bit di Filistin dɛn.

¹¹ So Jonɛthan ɛn in bɔbɔ go na di Filistin dɛn bes ɛn mek di Filistin dɛn si dɛn. As di Filistin dɛn si dɛn, dɛn ala, “Luk di Ibru dɛn de kɔmɔt na di ol we dɛn bin de ayd.”.

¹² Di wan dɛn na di bes tɛl Jonɛthan ɛn in bɔbɔ se mek dɛn go dɔŋ go mit dɛn, dɛn go sho dɛn pɛpɛ. Jonɛthan tɛl in bɔbɔ fɔ fala am bikɔs PAPA GƆD go mek dɛn win.

¹³ Jonɛthan insɛf krip go mit dɛn wit in bɔbɔ biɛn am. Jonɛthan ɛn in bɔbɔ we bin de fala am kil di Filistin dɛn.

¹⁴ Da fɔs tɛm de, Jonɛthan ɛn in bɔbɔ kil bɔt sɔm twɛnti man na wan eria we na abawt af ɔf wan eka.

¹⁵ Dɛn fred jɛs grip ɔl di amiman dɛn wɛda dɛn de na kamp ɔ na di fil; na dɛn bes ɔ wit dɛn bad man dɛn, ivin di grɔn bigin shek we sho se na PAPA GƆD mek dɛn de fred so.

Izrɛl Bit Di Filistin Dɛn

¹⁶ Di man dɛn we bin de wach fɔ Sɔl na Gibia insay Bɛnjamin si we di Filistin dɛn de rɔn ɔlɔbɔt.

¹⁷ Dɛn Sɔl tɛl di man dɛn we de wit am fɔ kɔnt ɔlman de fɔ lɛ dɛn no udat nɔ de de. We dɛn kɔnt dɛn ɔl, dɛn si se na Jonɛthan ɛn in bɔbɔ we kin tot in tin dɛn fɔ fɛt, nɔ de de.

¹⁸ Sɔl tɛl Aija fɔ briŋ di Ak as da tɛm de i bin de wit dɛn, di Izrɛlayt dɛn.

¹⁹ As Sɔl bin de tɔk to Aija, di nɔys na di Filistin dɛn kamp bin jɛs de lawd mɔ ɛn mɔ, so Sɔl tɛl Aija mek i nɔ wes in tɛm.

²⁰ Sɔl ɛn in man dɛn gɛda fɔ go fɛt. Dɛn mit di Filistin dɛn de fɛt dɛnsɛf. Di wanol ples bin kɔnfyus so.

²¹ Di Ibru dɛn we bin dɔn go to di Filistin dɛn na dɛn kamp krɔs go jɔyn di Izrɛlayt dɛn we bin de wit Sɔl ɛn Jonɛthan.

²² Wɛn di Izrɛlayt dɛn we bin ayd na Ifrem yɛri se di Filistin dɛn de rɔnawe, dɛnsɛf jɔyn fɔ rɔnata dɛn.

²³ So da de de PAPA GƆD pul di Izrɛlayt dɛn na di Filistin dɛn an, dɔn nɔto Bɛthavɛn nɔmɔ wɔfrɔnt bin de igen

Di Tin Dɛn We Bi We Di Fɛt Dɔn

²⁴ Di man dɛn na Izrɛl nɔ bin gladi da de de bikɔs Sɔl mek dɛn swɛ se te i dɔn dil wit in ɛnimi dɛn bifo dɛn it ɔ nɔ so dɛn go alaki. So nɔn sojaman nɔ tes it.

²⁵ Di wanol ami bin go na bush usay dɛn si ɔni na grɔn.

²⁶ Wɛn dɛn go insay di bush, dɛn si ɔni ɔlsay bɔt dɛn nɔn nɔ kres fɔ it am bikɔs dɛn bin de fred di swɛ we dɛn dɔn swɛ.

²⁷ Jonɛthan nɔ bin de so i nɔ yɛri bɔt di swɛ we in papa mek in pipul dɛn swɛ, so in tek di tik we bin de nain an, tɔch di ɔni ɛn lik am. Wantɛm wantɛm, di taya we i bin taya jɛs go.

²⁸ Dɛn wan pan di sojaman dɛn tɛl am bɔt di swɛ we in papa mek dɛn swɛ. Na dat mek ɔl di man dɛn taya so.

²⁹ Jonɛthan se nain papa fɛn di trɔbul we de na di kɔntri. I se in we na lili ɔni nɔmɔ i tes, dɔn gɛt mɔ trɛnk.

³⁰ I bin fɔ bɛtɛ fɔ di man dɛn if dɛn bin dɔn it sɔm pan di tin dɛn we dɛn tek na di Filistin dɛn an. I se da tɛm de dɛn bin fɔ kil mɔ Filistin dɛn.

³¹ Di Izrɛlayt dɛn taya bad di de afta dɛn kil di Filisitin dɛn we bin de rɔn kɔmɔt Mikmash te rich Aijalɔn.

³² Dɛn jomp pan di tin dɛn we dɛn bin tek na di Filistin dɛn an, lɛkɛ di ship dɛn, kaw dɛn ɛn di kaw pikin dɛnsɛf, bucha dɛn usay dɛn de na di grɔn de ɛn it dɛn wit dɛn blɔd ɔl.

³³ Sɔmbɔdi go tɛl Sɔl se in man dɛn de sin to PAPA GƆD as dɛn de it bif wit in blɔd pan am. Sɔl ala pan dɛn fɔ da bievɔ de ɛn tɛl dɛn fɔ briŋ wan big ston kam to am.

³⁴ I se mek dɛn tɛl ɔlman fɔ tek in animal, kil am de ɛn it am. I tɛl dɛn se dɛn nɔ fɔ sin to PAPA GƆD ɛn it bif wit in blɔd pan am. So ɔlman kɛr in animal go de da nɛt de ɛn kil am de.

³⁵ Dɛn Sɔl bil ɔlta fɔ PAPA GƆD; na di fɔs tɛm dis i bin du dat.

³⁶ Sɔl se dɛn fɔ go dɔŋ go mit di Filistin dɛn, atak dɛn na nɛt ɛn fɛt dɛn te do klin so dat nɔn pan dɛn no go liv. Dɛn tɛl am se mek i du wetin i wan du. Bɔt di man we de mek sakrifays fɔ pipul sin se mek dɛn aks PAPA GƆD usay dɛn de so.

³⁷ So Sɔl aks PAPA GƆD if i fɔ rɔnata di Filistin dɛn ɛn if i go win dɛn. Bɔt PAPA GƆD nɔ ansa am da de de.

³⁸ Nain Sɔl kɔl di bigman dɛn nain ami ɛn tɛl dɛn se dɛn fɔ fɛn us sin dɛn sin da de de.

³⁹ I swɛ se wans PAPA GƆD we de sev Izrɛl nɔ day, in mɔs kil di pɔsin i lɛk sɛf nain bɔypikin, Jonɛthan. Bɔt nɔbɔdi nɔ se natin.

⁴⁰ Sɔl tɛl ɔlman fɔ tinap wan say dɔn in ɛn Jonɛthan in bɔypikin go tinap ɔda say. Di man dɛn tɛl am se lɛ i du wetin i fil fɔ du.

⁴¹ Dɛn Sɔl pre to PAPA GƆD we na di PAPA GƆD we Izrɛl de wɔship se mek i ansa dɛn ɛn mek dɛn no udat sin. Ɛn di ansa na dat nain ɔ Jonɛthan, so di man dɛn fri.

⁴² Sɔl se lɛ dɛn luk if nain ɔ na Jonɛthan we nain bɔypikin, sin. Na Jonɛthan dɛn pik.

⁴³ So Sɔl aks Jonɛthan wetin i du. Jonɛthan tɛl am se na tes nɔmɔ i tek in tik tes ɔni. I tɛl am se if i fɔ day fɔ dat, mek i day.

⁴⁴ Sɔl se mek in sɔfa if in nɔ mek Jonɛthan day.

⁴⁵ Bɔt ɔl di man dɛn tɛl Sɔl se dɛn nɔ go gri fɔ mek Jonɛthan, we dɔn mek di Izrɛlayt dɛn kɔmɔt na di Filistin dɛn an, day. Dɛn swɛ se wans PAPA GƆD nɔ day natin nɔ go du Jonɛthan bikɔs na PAPA GƆD ɛp am fɔ du wetin i du da de de. So di man dɛn mek Sɔl nɔ kil Jonɛthan.

⁴⁶ Dɛn Sɔl lɛf fɔ rɔnata di Filistin dɛn ɛn ɔlman go nain yon ples.

Wetin Bi To Sɔl Ɛn In Fambul Dɛn We In Na Kiŋ

⁴⁷ Afta we Sɔl dɔn bi kiŋ na Izrɛl, i fɛt in ɛnimi dɛn we bin de ɔl rawnd am. Di ɛnimi dɛn na Moab, di Amonayt dɛn, di wan dɛn na Idɔm, di kiŋ dɛn na Zoba ɛn di Filistin dɛn. I bin de banja dɛn ɛnisay i tɔn.

⁴⁸ I fɛt soba wan wit di Amalɛkayt dɛn ɛn pul di Izrɛlayt dɛn kɔmɔt na di wan dɛn we bin de atak dɛn, dɛn an.

⁴⁹ Sɔl in bɔypikin dɛn na bin Jonɛthan, Ishvi ɛn Malkishua. In big gyal pikin bin nem Mɛrab ɛn di smɔl wan na bin Mikal.

⁵⁰ In wɛf bin nem Ainoam we na bin Aimaaz in gyal pikin. Di man we na bin di kɔmanda fɔ in ami na bin Abna we na Nain bɔypikin ɛn Na na bin Sɔl in ɔnkul.

⁵¹ Sɔl in papa, Kish ɛn Abnain papa Na na bin Abiɛl in bɔypikin dɛn.

⁵² Ɔl di tɛm we Sɔl bin de as kiŋ in ɛn di Filistin dɛn bin gɛt siriɔs fɛt we mek as i si ɛni man we luk gɛt trɛnk ɛn ebul fɛt, i fɔ put am nain ami.