1 Samiɛl 13 - Krio Fɔs Oli Baybul

Di Izrɛlayt Dɛn Fɛt Wa Wit Di Filistin Dɛn

¹ Sɔl bin ol tati ia wɛn dɛn mek am kiŋ na Izrɛl ɛn i bi kiŋ fɔ foti-tu ia.

² Sɔl pik tri tawzin man fɔ de nain ami na Izrɛl. Tu tawzin pan dɛn lɛf wit am na Mikmash we de na di kɔntri, Bɛthɛl we gɛt il, di balans wan tawzin go de wit Jonɛthan na Gibia insay Bɛnjamin. I sɛn di man dɛn we i nɔ pik, go bak na dɛn os dɛn.

³ Jonɛthan atak usay di Filistin dɛn bes de na Giba ɛn di Filistin dɛn yɛri bɔt dat. Dɛn Sɔl mek dɛn blo trɔmpɛt ɔlɔbɔt na Izrɛl fɔ kɔl atɛnshɔn mek ɔlman yɛri di nyuz.

⁴ So ɔlman yɛri se Sɔl dɔn atak di Filistin dɛn bes ɛn naw Izrɛl dɔn fɛn di Filistin dɛn plaba. Sɔl naw sɛn se mek ɔl udat kin fɛt, mit am na Gilgal.

⁵ Di Filistin dɛnsɛf gɛda fɔ fɛt Izrɛl, wit tati tawzin ɔs ɛn karej, siks tawzin man fɔ rayd di ɔs ɛn karej, tu fɔ wan, ɛn bɔku bɔku sojaman dɛn we tan lɛk sansan we yu nɔ go ebul kɔnt. Dɛn go ɔp na Mikmash we de na di ist we yu kɔmɔt Bɛthavɛn. Na de dɛn kamp.

⁶ Wɛn di Izrɛlayt dɛn si se di Filistin dɛn dɔn put dɛn na tayt kɔna ɛn di ami nɔ gɛt natin fɔ du, dɛn go ayd na ol, na dɛn big ston, insay grev yad, insay dɛn grev dɛn ɛn insay dɛn wɛl we dɔn dray,

⁷ sɔm ivin rɔnawe, krɔs Riva Jɔdan go na Gad ɛn Giliad. Sɔl lɛf na Gilgal ɛn ɔl di sojaman dɛn we bin de wit am bin de fred.

⁸ I wet fɔ di sɛvin de we Samiɛl bin se bɔt Samiɛl nɔ go kwik na Gilgal ɛn Sɔl in man dɛn bin dɔn de lɛf am to insɛf.

⁹ So Sɔl se lɛ dɛn gi am di tin dɛn we fɔ bɔn as sakrifays ɛn fɔ mek pis ɔfrin dɔn i mek di sakrifays dɛn fɔ insɛf.

¹⁰ As i dɔn so, nain Samiɛl kam ɛn Sɔl go fɔ tɛl am adu.

¹¹ Samiɛl aks am wetin i jɛs du so. Sɔl ansa se na we i si ɔl in man dɛn de lɛf am ɛn Samiɛl nɔ bin kam yet, dɔn di Filistin dɛn bin de gɛda na Mikmash,

¹² so i tɛl insɛf se if di Filistin dɛn atak am na Gilgal, in nɔ du natin fɔ PAPA GƆD yet. I se na dat mek insɛf mek di sakrifays to PAPA GƆD wantɛm.

¹³ Samiɛl ala pan am. I se, “Na bigful tin yu du so! Yu nɔ du wetin PAPA GƆD we na yu PAPA GƆD tɛl yu; if yu bin du wetin i se, yu ɛn ɔl yu jɛnareshɔn dɛn afta yu bin fɔ bi kiŋ.

¹⁴ Bɔt naw i nɔ gɛt fɔ bi so; PAPA GƆD dɔn fɛn di kayn man we go du wetin i want ɛn dɔn pik am fɔ bi kiŋ bikɔs yu nɔ du wetin PAPA GƆD se.”

¹⁵ Dɛn Samiɛl lɛf Gilgal ɛn go ɔp na Gibia insay Bɛnjamin ɛn Sɔl kɔnt ɔmɔs pan in man dɛn bin de wit am. Na bin siks ɔndrɛd.

¹⁶ Sɔl, in bɔypikin Jonɛthan ɛn in man dɛn go kamp na Gibia insay Bɛnjamin, di sem tɛm we di Filistin dɛn lɛf na Mikmash.

¹⁷ Badman dɛn kɔmɔt na di Filistin dɛn kamp na tri grup. Wan go na Ofra we de na Shual,

¹⁸ di ɔda wan go bay Bɛth Orɔn, dɔn di tɔd grup go to di bɔda oba di Zɛboim Vali ɔpozit di ɛmti land we pɔsin nɔ go ebul tap.

¹⁹ Wan blaksmith, nɔ bin de na Izrɛl as di Filistin dɛn se, mek di Ibru dɛn nɔ go ebul fɔ mek sɔd ɛn spia dɛn.

²⁰ So na to di Filistin dɛn ɔl di Izrɛlayt dɛn bin de go fɔ go mek di tin dɛn we dɛn bin de yus na fam, dɛn aks dɛn ɛn ivin fɔ shap dɛn nɛf dɛn.

²¹ Dɛn bin de pe tu tɛm mɔ fɔ shap nɛf pas wetin dɛn bin de pe fɔ mek di tin dɛn we dɛn bin de yuz na fam.

²² So di de we dɛn fɛt di Izrɛlayt dɛn, na Sɔl ɛn Jonɛthan nɔmɔ bin ol sɔd ɔ spia.

²³ Naw di Filistin dɛn lɛf sɔm dɛn man dɛn na Mikmash fɔ gyad di rod fɔ go na dɛn bes.