1 Samiɛl 12 - Krio Fɔs Oli Baybul

Di Las Tɔk We Samiɛl Tɔk To Di Pipul Dɛn

¹ Samiɛl tɔk to ɔlman na Izrɛl. I se “A dɔn lisin ɔl wetin una se ɛn a dɔn mek una gɛt kiŋ.

² Naw una dɔn gɛt una kiŋ. Mi dɔn ol, mi ia ɔl dɔn wet ɛn mi bɔypikin dɛn de ya wit una. Frɔm we a smɔl nain a dɔn bi una lida.

³ Na mi tinap so frɔnt PAPA GƆD ɛn di wan we i dɔn mek kiŋ. Udat in kaw ɔ dɔŋki a dɔn tek? Udat a dɔn rog ɔ buli wande ɔ udat a dɔn tek brayb nain an fɔ twis di lɔ? If ɛnibɔdi de we go se a du so, a go pe am bak.”

⁴ Di pipul dɛn ansa am se, i nɔ ambɔg nɔbɔdi wande ɛn i nɔ tek natin na pɔsin in an.

⁵ Samiɛl tɔk bak se, “PAPA GƆD de yɛri wetin una de tɔk o! Ɛn di kiŋ de fɔ mi witnɛs we una se a nɔ tek natin na una an.” Dɛn ansa se yɛs, na witnɛs.

⁶ Samiɛl tɛl di pipul dɛn se na PAPA GƆD bin pik Mozis ɛn Erɔn we pul dɛn grampa dɛn kɔmɔt na Ijipt.

⁷ I se mek dɛn rɛdi bikɔs i de kam tɛl dɛn ɔl wetin PAPA GƆD du fɔ dɛn ɛn dɛn fɔstɛm pipul dɛn.

⁸ I tɛl dɛn aw Jekɔb ɛn in famili bin go de na Ijipt we di Ijipshian dɛn bin de du dɛn bad, dɛn beg PAPA GƆD fɔ ɛp dɛn dɔn in sɛn Mozis ɛn Erɔn we go pul dɛn grampa dɛn na Ijipt ɛn lɛf dɛn fɔ sɛtul usay dɛn de so.

⁹ I tɛl dɛn bɔt aw dɛn fɔgɛt bɔt PAPA GƆD we na dɛn PAPA GƆD, so i lɛ Sisɛra we na di ami kɔmanda na Ezɔ, di Filistin dɛn ɛn di kiŋ na Moab we dɛn fɛt wit, gi dɛn gud bit.

¹⁰ Dɛn kray to PAPA GƆD ɛn tɛl am se dɛn dɔn sin we dɛn lɛf am go wɔship Beal ɛn dɛn Ashtarɔt dɛn. Dɛn beg am mek i nɔ lɛf dɛn gi dɛn ɛnimi dɛn ɛn tɛl am se if i pul dɛn ɛnimi kɔmɔt biɛn dɛn, dɛn go wɔship am.

¹¹ Dat bin mek PAPA GƆD sɛn Gidiɔn, Berak, Jɛftha ɛn Samiɛl fɔ pul dɛn na dɛn ɛnimi dɛn we bin sɔrawnd dɛn, dɛn an, we mek dɛn gɛt pis.

¹² Bɔt wɛn dɛn si Neash we na di Amonayt dɛn kiŋ kam fɔ fɛt dɛn, dɛn se dɛnsɛf want kiŋ pan ɔl we na PAPA GƆD we na dɛn PAPA GƆD na bin dɛn Kiŋ.

¹³ Samiɛl se, “Una luk di kiŋ we una want, di wan we una bin de aks fɔ. PAPA GƆD dɔn gi una di kiŋ o!

¹⁴ If una de fred PAPA GƆD ɛn wan sav am ɛn obe am, una fɔ du wetin PAPA GƆD se ɛn mɔ so, if una ɛn di kiŋ we de oba una du wetin PAPA GƆD se, i go fayn fɔ una.

¹⁵ Bɔt if una nɔ obe PAPA GƆD ɛn du wetin i se, na di sem we aw i trit una grampa dɛn, na so i go trit una.

¹⁶ Una jɛs sidɔm luk we PAPA GƆD de kam ple wɔndaz bifo una fes.

¹⁷ Na dray sizin dis, nɔto so? Naw a de kam aks PAPA GƆD lɛ i mek tɛnda rol ɛn big big ren fɔdɔm. Da tɛm de una go si se na bad bad tin una du to PAPA GƆD we una se una want kiŋ.”

¹⁸ So Samiɛl pre to PAPA GƆD ɛn da sem de de, tɛnda rol, dɔn big big ren fɔdɔm. Na so ɔl di pipul lɛf mɔt de wɔnda pan PAPA GƆD ɛn pan Samiɛl.

¹⁹ Di pipul dɛn tɛl Samiɛl fɔ pre to PAPA GƆD we nain PAPA GƆD fɔ dɛn mek dɛn nɔ day as dɛn dɔn ad pan dɛn ɔda sin dɛn we dɛn aks fɔ kiŋ.

²⁰ Samiɛl se lɛ dɛn nɔ fred. I se, “Pan ɔl di bad we una dɔn du, una nɔ fɔ ɛva lɛf PAPA GƆD fɔ go wɔship ɔda gɔd dɛn bɔt una fɔ wɔship PAPA GƆD wit ɔl una at.

²¹ Una nɔ fala dɛn ɔda gɔd dɛn de. Dɛn nɔ ebul du natin.

²² Bikɔs ɔf in nem, PAPA GƆD nɔ go ib una oba as nain dɔn se una nain yon.

²³ As fɔ mi, mek PAPA GƆD nɔ gri mek a lɛf fɔ pre fɔ una. A go tɛl una wetin gud ɛn rayt.

²⁴ I lɛf to una fɔ rɛspɛkt PAPA GƆD ɛn sav am wit ɔl una at. Tink bɔt ɔl wetin i dɔn du fɔ una.

²⁵ If una fasin fɔ du am bad, PAPA GƆD go jɛs swip una ɛn una kiŋ.”