1 Samiɛl 10 - Krio Fɔs Oli Baybul

¹ Dɛn Samiɛl tek wan smɔl jɔg we i bin dɔn put ɔyl pan ɛn tɔn sɔm pan di ɔyl na Sɔl in ed dɔn i kis am ɛn tɛl am se PAPA GƆD dɔn pik am fɔ bi lida fɔ in pipul dɛn.

² Samiɛl tɛl Sɔl se we i de lɛf am go so, i go mit tu man nia usay dɛn bin bɛr Rechɛl na Zɛlza we de na di bɔda na Bɛnjamin. Dɛn man ya go tɛl am se dɛn dɔn fɛn di dɔŋki dɛn we i bin go luk fɔ. So in papa nɔ de tink bɔt di dɔŋki dɛn igen, nain i de wɔri bɔt ɛn de aks ɔlman wetin i fɔ du fɔ mek i ebul fɛn in bɔypikin.

³ Samiɛl se i go pas dɛn go te i rich wan big tik na Tabor. I se tri man we de go ɔp na Bɛthɛl fɔ go wɔship PAPA GƆD go mit am to di tik. I se wan pan dɛn go tot tri yɔŋ got, wan go ol tri lof bred dɛn wan go ol wan jɔg wayn.

⁴ I tɛl am se dɛn go tɛl am adu ɛn gi am tu pan di lof bred dɛn we i fɔ tek na dɛn an.

⁵ I se we i lɛf dɛn, i fɔ go na Gibia na PAPA GƆD in il usay di Filistin bes de. I se as Sɔl de rich na di siti, i go mit wan grup we na soso prɔfɛt dɛn, de pas, dɛn go de dans kam dɔŋ usay dɛn kɔmɔt mek sakrifays wit tamborin, flut ɛn ɔda myuzikal instrumɛnt dɛn we go de ple as dɛn go de tɔk PAPA GƆD wɔd.

⁶ Samiɛl tɛl Sɔl se PAPA GƆD in Spirit go go pan insɛf ɛn i go jɔyn dɛn fɔ tɔk PAPA GƆD wɔd so dat go mek i chenj ɔltogɛda.

⁷ Samiɛl se we ɔl dɛn tin ya we i tɔk bɔt dɔn bi to Sɔl, Sɔl naw fɔ du ɛnitin we i fil fɔ du bikɔs PAPA GƆD de wit am.

⁸ Samiɛl tɛl Sɔl fɔ waka go bifo am na Gilgal. I se in go mɔs go mit am so dɛn go bɔn animal as bɔn sakrifays ɛn mek pis ɔfrin to PAPA GƆD, bɔt dat i go gɛt fɔ wet fɔ sɛvin de bifo in go kam ɛn tɛl Sɔl wetin fɔ du.

⁹ As Sɔl tɔn fɔ lɛf Samiɛl so, PAPA GƆD chenj in at wantɛm ɛn ɔl wetin Samiɛl se go bi, bi da de de.

¹⁰ Wɛn Sɔl ɛn in bɔy rich Gibia, dɛn mit wan grup prɔfɛt dɛn de pas ɛn PAPA GƆD in Spirit kam pan Sɔl ɛn i jɔyn di prɔfɛt dɛn ɛn bigin tɔk PAPA GƆD wɔd.

¹¹ Wɛn ɔl udat bin no am si am de tɔk PAPA GƆD wɔd wit di prɔfɛt dɛn, dɛn bigin aks dɛnsɛf se, “Wetin dis dɔn apin to Kish in bɔypikin? Insɛf na prɔfɛt naw?”

¹² Wan man na di siti se nɔto udat na dɛn papa impɔtant. Ɛnibɔdi kin bi prɔfɛt. Naw, na wan tɔk we ɔlman kin de tɔk se, “Sɔl insɛf na prɔfɛt?”

¹³ Afta Sɔl dɔn lɛf fɔ tɔk PAPA GƆD wɔd, i go na di ples we dɛn de mek sakrifays.

¹⁴ Sɔl in ɔnkul aks in ɛn in bɔy usay dɛn bin de. Sɔl ansa am se dɛn bin de luk fɔ di dɔŋki dɛn bɔt we dɛn nɔ ebul fɛn dɛn, dɛn go to Samiɛl fɔ aks am usay dɛn de.

¹⁵ Di ɔnkul aks dɛn wetin Samiɛl tɛl dɛn se.

¹⁶ Sɔl ansa se i tɛl dɛn se dɛn dɔn fɛn di dɔŋki dɛn. Bɔt i nɔ tɛl in ɔnkul wetin Samiɛl se bɔt in kiŋ wan.

Dɛn Gri Fɔ Mek Sɔl Bi Kiŋ

¹⁷ Samiɛl kɔl ɔlman na Izrɛl fɔ go Mizpa fɔ mit wit PAPA GƆD.

¹⁸ I tɛl dɛn se na wetin PAPA GƆD we na di PAPA GƆD we Izrɛl de wɔship se i de kam tɛl dɛn so. I se, PAPA GƆD se in pul dɛn kɔmɔt na di Ijipshian dɛn na Ijipt dɛn an usay dɛn bin de pas am pan dɛn ɛn dɛn ɔda kiŋ dɛn an.

¹⁹ Bɔt dat naw dɛn dɔn lɛf in dɛn PAPA GƆD we pul dɛn pan ɔl dɛn trɔbul ɛn brokat de, bɔt dɛn se dɛn want kiŋ. So dɛn fɔ rɛdi fɔ go mit PAPA GƆD ɛn dɛn fɔ de bay dɛn twɛlv fambul ɛn dɛn fɔ de na dɛn grup dɛn bay famili.

²⁰ Wɛn Samiɛl dɔn mek ɔl di fambul dɛn kam togɛda dɛn pik di Bɛnjamin fambul.

²¹ Dɔn i kɔl ɔlman na Bɛnjamin fambul fɔ kam bifo na dɛn smɔl grup dɛn dɔn na Matri in yon grup i pik. Faynali na Sɔl we na Kish in bɔypikin nain dɛn pik. Bɔt we dɛn luk fɔ am, dɛn nɔ si am.

²² So dɛn aks PAPA GƆD if i nɔ go de yet. PAPA GƆD tɛl dɛn se i de de bɔt i ayd usay sɔm lod dɛn de.

²³ So dɛn rɔn go fɛn Sɔl usay i de ɛn pul am na do, ɛn we i tinap in ed ay pas ɔl udat de de.

²⁴ Samiɛl kɔl ɔlman fɔ luk Sɔl we na di man we PAPA GƆD pik. I se nɔbɔdi nɔ tan lɛkɛ am. Dɛn di pipul dɛn ala se “Lɛ di kiŋ gɛt lɔŋ layf!”

²⁵ Samiɛl ɛksplen tɛl di pipul dɛn ɔl wetin i min, dat na, wetin ɛn wetin dɛn ɛn di kiŋ fɔ du. I rayt ɔl dɔŋ na pepa ɛn lɛf am na PAPA GƆD in os. Dɛn Samiɛl lɛf ɔlman fɔ go na dɛn os.

²⁶ Sɔl insɛf go nain os na Gibia bɔt tɔf tɔf man dɛn we PAPA GƆD dɔn tɔk to fala am go.

²⁷ Sɔm ɔda wan dɛn luk dawn ɔn Sɔl. Dɛn nɔ gi am prɛzɛnt sɛf bifo dat dɛn se, “Aw dis kayn man go fɛt fɔ wi?” Bɔt Sɔl nɔ se natin.