1 Samiɛl 1 - Krio Fɔs Oli Baybul

Wetin Apin To Ɛlkena Ɛn In Famili Na Shaylɔ

¹ Wan man bin de we bin nem Ɛlkena. Na bin wan pan di Ifrem fambul ɛn i bin tap na Rama na di ɔplayn pat na Ifrem. Jɛroam nain papa ɛn na Ilaɛlu in grampikin. Dɛn kɔmɔt na Tou in famili layn ɛn na bin wan pan di Zuf pipul dɛn.

² I bin gɛt tu wɛf wan na Ana dɔn di ɔda wan na Pɛnina. Pɛnina bin gɛt pikin dɛn bɔt Ana nɔ bin gɛt.

³ Ɛvri ia dis man kin kɔmɔt usay i tap na Rama, i kin go ɔp na Shaylɔ fɔ go wɔship PAPA GƆD Ɔlmayti de ɛn mek sakrifays to am. Na de Ofni ɛn Finɛas we na Ilaɛl in bɔypikin dɛn bin de as man dɛn we de mek sakrifays fɔ pipul sin to PAPA GƆD.

⁴ Wɛn di de kin rich fɔ mek Ɛlkena mek in sakrifays; i kin gi Pɛnina we na wan pan in wɛf, wit ɔl in bɔy ɛn gyal pikin dɛn sɔm pan di bif.

⁵ Bɔt i kin gi Ana, wan big af nɔmɔ bikɔs pan ɔl we i lɛk am, PAPA GƆD nɔ bin mek i bɔn.

⁶ Ɛn bikɔs PAPA GƆD nɔ mek i bɔn, in met kin de trowe int pan am fɔ mek i go vɛks.

⁷ Ɔltɛm, ɔltɛm na so bin de apin. Ɛnitɛm we Ana kin go ɔp na PAPA GƆD in os, in met kin de trowe int pan am we go mek i de kray ɛn nɔ gri it.

⁸ In man, Ɛlkena kin aks am wetin mek i de kray. I kin koks am ɛn tɛl am se i kin du pas wetin tɛn bɔypikin kin du.

Wetin Bi Bitwin Ana Ɛn Ilaɛl

⁹ Wande we dɛn bin de na Shaylɔ, afta we ɔlman dɔn it ɛn drink, Ana grap. Ilaɛl we na bin di man we de mek sakrifays fɔ pipul sin bin sidɔm na wan chia we bin de na di domɔt fɔ go na PAPA GƆD in os.

¹⁰ Aw Ana tinap wit in at we nɔ swit, na de i bigin kray ɛn pre to PAPA GƆD.

¹¹ I swɛ to PAPA GƆD Ɔlmayti se if i kin sɔri fɔ am nɔmɔ ɛn gi am wan bɔypikin, i go gi am bak to PAPA GƆD fɔ wok fɔ am te i day ɛn i nɔ go kɔt in ia.

¹² As i bin de pre to PAPA GƆD, na so Ilaɛl bin de wach in mɔt.

¹³ Ana bin de pre nain at bɔt i mɔt bin de shek bɔt pɔsin nɔ bin de yɛri wetin i de se. Ilaɛl bin tink se na drɔnk i drɔnk

¹⁴ so i tɔk pan am mek i lɛf fɔ drink ɛn biev lɛk drɔnkɔman.

¹⁵ Ana tɛl am se i nɔ drɔnk. I ɛksplen se in na uman we tin de mɔna. I se i nɔ drink wayn ɔ bia bɔt dat i de tɛl PAPA GƆD wetin de mɔna am.

¹⁶ I tɛl Ilaɛl nɔ fɔ luk am lo bɔt dat i gɛt siriɔs tin we de mɔna am we mek i de pre so.

¹⁷ Ilaɛl blɛs am ɛn tɛl am mek i nɔ wɔri ɛn pre se di PAPA GƆD we Izrɛl de wɔship go ansa in prea.

¹⁸ Ana se i wish Ilaɛl go trit am fayn ɔltɛm. I kɔmɔt de go it ɛn nɔ twis in fes igen

Samiɛl Bɔn Ɛn Dɛn Dɛdiket Am

¹⁹ We do klin di nɛks de, dɛn grap ɛn go bak na Rama afta dɛn wɔship PAPA GƆD dɔn. Ɛlkena lidɔm wit in wɛf Ana, ɛn PAPA GƆD ansa Anain prea.

²⁰ Na so Ana tek gɛt bɛlɛ dɔn we di tɛm rich i bɔn bɔypikin. I gi di pikin nem Samiɛl as i se bikɔs a aks PAPA GƆD fɔ am.

²¹ Wɛn in man Ɛlkena ɛn di ɔda pipul dɛn nain os go ɔp na Shaylɔ fɔ go mek sakrifays as dɛn kin du ɛvri ia ɛn fɔ kip in prɔmis to PAPA GƆD,

²² Ana nɔ go wit dɛn. I tɛl in man se we i dɔn win di pikin, i go kɛr am go gi PAPA GƆD ɛn di pikin go tap na PAPA GƆD in os, te i day.

²³ In man we na Ɛlkena, tɛl am se, lɛ i du wetin i lɛk. I se Ana kin wet te i win in pikin wans nɔmɔ i du wetin i dɔn tɛl PAPA GƆD se i go du. So Anainsɛf sidɔm na os ɛn gi in pikin bɔbi te di tɛm rich we i win am.

²⁴ Wɛn i dɔn win di pikin dɔn, i tek di pikin smɔl wan so, wit wan tri-ia ol man kaw, wan bushɛl flawa ɛn wan jɔg wayn, ɛn kɛr di pikin go na PAPA GƆD in os na Shaylɔ.

²⁵ Afta dɛn dɔn kil di man kaw dɔn, dɛn kɛr di bɔbɔ go to Ilaɛl, dɛn

²⁶ Ana tɛl Ilaɛl se nain na di uman we lɔntɛm bin tinap nia am de pre to PAPA GƆD.

²⁷ I tɛl Ilaɛl se na di pikin we i pre fɔ de wit am so as PAPA GƆD gi am wetin i bin aks fɔ.

²⁸ I se so insɛf dɔn briŋ di pikin fɔ gi am bak fɔ de to PAPA GƆD te i day. Na de di pikin lɛf fɔ de sav PAPA GƆD. Ɛn dɛn wɔship PAPA GƆD de.