1 Kronikuls 23 - Krio Fɔs Oli Baybul

¹ We Devid dɔn ol ɛn dɔn te na wɔl, i mek Sɔlɔmɔn we nain bɔypikin, kiŋ na Izrɛl.

Di Livayt Dɛn Wok

² Devid gɛda ɔl di bigman dɛn na Izrɛl ɛn di man dɛn we de mek sakrifays fɔ pipul sin ɛn di Livayt dɛn.

³ Dɛn kɔnt ɔl di Livayt dɛn we ol frɔm tati ia go ɔp, ɛn ɔl ɛn ɔl, na bin tati-et tawzin man.

⁴ Devid se, “Twɛnti fo tawzin pan dɛn wan dɛn de, fɔ si dat di wok na PAPA GƆD du, siks tawzin go bi klak ɛn jɔj dɛn,

⁵ fo tawzin getman, ɛn fo tawzin go de prez PAPA GƆD wit di instrumɛnt dɛm we a dɔn mek fɔ prez PAPA GƆD.’

⁶ So Devid sheb dɛn ɛn put dɛn bay dɛn papa dɛn os we na Gashɔm, Koat ɛn Mɛrari, dat na Livay in bɔypikin dɛn.

⁷ Gashɔm in bɔypikin dɛn na Ledan ɛn Shimɛi.

⁸ Ledan in bɔypikin dɛn na Jeayɛl we na bin di big wan, Zitam ɛn Joɛl. Na bin dɛn tri.

⁹ Shimɛi in bɔypikin dɛm na Shelomɔt, Aziɛl ɛn Ɛrari. Na dɛn tri. Na dɛn na bin di big wan dɛn na dɛn papa dɛn os dɛn na Ledan in fɔstɛm-papa dɛn os.

¹⁰ Shimɛi in bɔypikin dɛm na Jeat, Zina, Jeush ɛn Bɛraya. Na dɛn fo ya na Shimɛi in bɔypikin dɛm.

¹¹ Jeat na di big wan ɛn Zina di sɛkɛn wan; bɔt Jeush ɛn Bɛraya nɔ bin gɛt bɔku bɔypikin dɛm, so wɛn dɛm de kɔnt, dɛn kin kɔnt dɛn tu os as wan papa os.

¹² Koat in bɔypikin dɛm na Amram, Iza, Ɛbrɔn ɛn Uziɛl. Na bin dɛn fo.

¹³ Amram in bɔypikin dɛm na bin Earɔn ɛn Mozis. PAPA GƆD bin pik Erɔn fɔ de kɔnsikret di tin dɛn we oli pas ɔl, ɛn in ɛn in bɔypikin dɛn fɔ de bɔn insɛns ɛn minista to PAPA GƆD ɛn tek in nem de blɛs sote go.

¹⁴ Bɔt dɛn bin put Mozis we na Man ɔf Gɔd, in bɔypikin dɛm dɛn nem wit di Livay fambul.

¹⁵ Mozis in bɔypikin dɛm na Gashɔm ɛn Ɛlieza.

¹⁶ Gashɔm in yon bɔypikin dɛn na Shɛbuɛl we na di big wan.

¹⁷ Ɛlieza in bɔypikin dɛm na Riabaya we na di big wan; Ɛlieza nɔ bin gɛt ɛni ɔda bɔypikin, bɔt Riabaya in bin bɔn bɔku bɔku bɔypikin dɛm!

¹⁸ Iza in bɔypikin dɛn na Shelomit we na di big wan.

¹⁹ Ɛbrɔn in bɔypikin dɛm na Jɛraya we na di big wan, Amaraya we na di sɛkɛn wan, Jaeziɛl we na di tɔd wan ɛn Jɛkamiam we na di nɔmba fo.

²⁰ Uziɛl in bɔypikin dɛm na Mayka we na di big wan ɛn Ishaya we na di sɛkɛn wan.

²¹ Merari in bɔypikin dɛm na Mali ɛn Mushi. Mali in yon bɔypikin dɛm na Ɛlieza ɛn Kish.

²² Ɛlieza day i nɔ bɔn bɔypikin, pas gyal pikin dɛm; na dɛn fambul dɛm we na Kish in bɔypikin dɛn, mared dɛm.

²³ Mushi in bɔypikin dɛm na Mali, Ɛda ɛn Jɛrimɔt. Na bin dɛn tri.

²⁴ Na Livay in bɔypikin dɛn, dɛn wan ya bay dɛn papa dɛn os dɛn, ɛn bay di big wan dɛn na dɛn fɔstɛmpapa dɛn os dɛn, na dɛn dɛn bin rɛjista bay dɛn nem ɛn bay dɛn ɔmɔs we de na di famili, frɔm twɛnti ia go ɔp, we bin ebul du PAPA GƆD in wok nain os.

²⁵ Bikɔs Devid bin se, “PAPA GƆD we na Izrɛl dɛn PAPA GƆD dɔn gi in pipul dɛn pis; ɛn i tap na Jerusɛlɛm sote go.

²⁶ So, di Livayt dɛm nɔ go gɛt fɔ de tot di tabanakul igen ɔ ɛni pan di tin dɛm we dɛn de yuz de”-

²⁷ bay wetin Devid bin se bifo i day, na bin ɔl di Livayt dɛn dɛn wan ya we bin ol twɛnti ia go ɔp-

²⁸ “dɛn yon wok na fɔ ɛp Earɔn in bɔypikin dɛm fɔ wok fɔ PAPA GƆD nain Os, fɔ de tek kia ɔf insay ɛn na do, fɔ de klin ɔl di oli tin dɛm we dɛn de yuz, ɛn ɛni ɔda wok we de na PAPA GƆD in os fɔ du;

²⁹ fɔ ɛp fɔ de mek di oli bred, fɔ ɛp bit di flawa fɔ di sid ɔfrin, fɔ ɛp mek di bred we nɔ gɛt yist, di ɔfrin we dɛn de bek ɛn di ɔfrin dɛn we miks wit, ɛn fɔ de mɛnshɔ tin dɛn bay dɛn kwantiti, wet ɛn sayz.

³⁰ Dɛn go tinap ɛvri mɔnin de tɛl PAPA GƆD tɛnki ɛn de prez am, semweso ivintɛm,

³¹ ɛn ɛnitɛm we dɛn de ɔfa bɔn sakrifays to PAPA GƆD, di oli de we dɛn kɔl de fɔ blo ɛn rɛst, dɛn nyu mun fɛstival ɛn di de dɛn we dɛn kin mek dɛn fist dɛn, bay ɔmɔs pipul dɛn go want, ɔltɛm bifo PAPA GƆD.

³² Na so dɛn fɔ tek kia ɔf di tɛnt we dɛn de mit wit PAPA GƆD, ɛn di oli ples, ɛn dɛn go de ɛp Erɔn in bɔypikin dɛn fɔ du di wok na PAPA GƆD in os.