1 Kronikuls 22 - Krio Fɔs Oli Baybul

¹ Nain Devid se, “Na ya Papa Gɔd we na Gɔd in os go de ɛn na ya di ɔlta go de fɔ bɔn Izrɛl dɛn ɔfrin dɛm to PAPA GƆD.”

Dɛn De Pripia Fɔ Bil Di Tɛmpul

² So Devid gi ɔda mek dɛn gɛda ɔl di fɔrina dɛn we bin de na di Izrɛl, ɛn i put pipul dɛn we sabi shep ston fɔ shep di ston dɛn fayn fɔ bil PAPA GƆD in os.

³ Pantap dat dat, Devid bin rɛdi bɔku bɔku ayɛn fɔ mek nel fɔ di do fɔ di get dɛm ɛn fɔ mek di klamp dɛn, ɛn sɛf bɔku bɔku bras we dɛn nɔ ebul we,

⁴ ɛn nɔto kɔmɔn sida bod bin de de; bikɔs di Sidonian ɛn di Tayrian dɛn briŋ bɔku bɔku sida bod fɔ Devid.

⁵ Bikɔs Devid bin se, “Sɔlɔmɔn we na mi bɔypikin yɔŋ ɛn nɔ gɛt ɛkspiriɛns, ɛn di os we fɔ bil fɔ PAPA GƆD fɔ fayn bad bad wan, ɛn dɛn fɔ de tɔk bɔt aw i fayn ɔlsay na di wɔl; so a go pripia fɔ bil am. So Devid rɛdi di tin dɛn fɔ bil di tɛmpul bɔku bɔku wan fɔ bil PAPA GƆD in os bifo i day.

⁶ Dɛn i sɛn kɔl Sɔlɔmɔn we nain bɔypikin, ɛn put am pan am se na im fɔ bil PAPA GƆD we na Izrɛl dɛn Gɔd.

⁷ Devid tɛl Sɔlɔmɔn se, “Mi bɔypikin a bin gɛt am na mi at fɔ bil os fɔ PAPA GƆD we na mi Gɔd fɔ ɔnain nem.

⁸ Bɔt PAPA GƆD in wɔd kam to mi, se “Yu dɔn shɛd plɛnti blɔd ɛn yu dɔn fɛt big big wa dɛm; yu nɔ fo bil os fɔ ɔna mi nem, bikɔs yu dɔn shɛd bɔku blɔd bifo mi na dis wɔl.

⁹ Wande, dɛn go bɔn bɔypikin fɔ yu; I go bi man we lɛk pis. A go gi am alafia to ɔl in ɛnimi we de rawnd am; i go nem Sɔlɔmɔn, ɛn ɔl di tɛm we i bi kiŋ, a go Izrɛl alafia.

¹⁰ I go bil os fɔ ɔna mi nem. I go bi mi bɔypikin, ɛn a go bi in papa, ɛn a go mek in kiŋ ɔfis tinap traŋa wan na Izrɛl sote go.

¹¹ So, mi pikin, lɛ PAPA GƆD de wit yu, so dat yu go ebul fɔ bil PAPA GƆD we na yu Gɔd in os jɛs lɛk aw i dɔn tɔk bɔt yu.

¹² Di wantin we a de pre fɔ, na fɔ mek i gi yu sɛns fɔ disayd ɛn ɔndastandin so wɛn i gi yu pawa oba Izrɛl, yu go ebul du wetin PAPA GƆD we na yu Gɔd se yu fɔ de du.

¹³ Datɛnde bɛtɛ go fala yu if yu tek tɛm du ɔl wetin PAPA GƆD we na yu Gɔd bin tɛl Mozis se Izrɛl fɔ de du. Tinap lɛk man ɛn nɔ fred. Nɔ fred natin; nɔ mek natin pwɛl yu at.

¹⁴ A dɔn swɛt fɔ gɛda tin dɛn fɔ bin PAPA GƆD in os: 3,400 mɛtrik tɔn gold, 34,000 mɛtrik tɔn silva, ɛn bras ɛn ayɛn we dɛn nɔ ebul we bikɔs i bɔku tumɔs; a dɔn rɛdi bod ɛn ston. Yu go ad to dɛn wande de.

¹⁵ Yu gɛt bɔku bɔku wokman dɛm; man dɛn we sabi shep ston, mesna, kapinta ɛn bɔku bɔku wokman we sabi mek difrɛn difrɛn tin dɛn wit dɛn an, lɛk di wan dɛn we sabi wok wit,

¹⁶ gold, silva, bras, ɛn ayɛn. Grap go lɛ yu go du di wok! PAPA GƆD go ɛp yu!”

¹⁷ Igen, Devid tɛl ɔl di bigman dɛn na Izrɛl traŋa wan fɔ ɛp in bɔypikin Sɔlɔmɔn we i se,

¹⁸ “PAPA GƆD we na una Gɔd nɔ de wit una? I nɔ dɔn gi una pis ɔl say? I dɔn put di wan dɛn we tap na di land ɔnda mi; ɛn di land de na PAPA GƆD ɛn in pipul dɛm an.

¹⁹ Naw una mekɔp una at ɛn maynd fɔ de wit PAPA GƆD we na una Gɔd ɔltɛm. Una grap ɛn bil os fɔ PAPA GƆD we na una Gɔd so dat dɛn go kɛr PAPA GƆD in Ak ɔf di Kɔvinant ɛn di oli tin dɛn we dɛn kin yuz fɔ wɔship PAPA GƆD, go insay os we dɛn bil fɔ Ɔna PAPA GƆD in nem.