1 Kronikuls 21 - Krio Fɔs Oli Baybul

Devid Kɔnt Di Pipul Dɛn

¹ Setan tinap fɔ fɛt Izrɛl ɛn tɛmt Devid fɔ kɔnt di pipul dɛn na Izrɛl.

² So Devid tɛl Joab ɛn di kɔmanda dɛm na di ami se, “Una go kɔnt di pipul dɛn na Izrɛl, frɔm Biashiba to Dan, ɛn kam gi mi di ripɔt, so a go no ɔmɔs pipul de na Izrɛl”

³ Bɔt Joab tɛl am se, “Mek PAPA GƆD mek in pipul dɛn plɛnti ɔndrɛd tɛm mɔ! Mi kiŋ ɛn mi masta, dɛn ɔl nɔto mi masta in wokman dɛm? Wetin mek mi masta want fɔ du dat? Wetindu i wan mek Izrɛl fil gilti?”

⁴ Bɔt di kiŋ in wɔd tinap pas Joab yon. So Joab lɛf ɛn go ɔlsay na Izrɛl ɛn kam bak na Jerusɛlɛm.

⁵ Ɛn Joab gi Devid di total nɔmba we i kɔnt di pipul dɛm. Insay di wanol Izrɛl, na wan miliɔn wan ɔndrɛd tawzin man we de fɛt wit sɔd, ɛn insay Juda, fo ɔndrɛd ɛn sɛvinti tawzin we de fɛt wit sɔd.

⁶ Bɔt Joab nɔ miks di Livay ɛn Bɛnjamin fambul pan di kɔnt bikɔs i et di kiŋ in kɔmand.

⁷ Bɔt PAPA GƆD bin vɛks fɔ dat ɛn i pɔnish Izrɛl.

⁸ So Devid tɛl PAPA GƆD se,” A dɔn sin bad bad wan we a du dis tin. Bɔt du yu, a de beg yu, mek di bad tin we yu wokman dɔn du, kɔmɔt nain ed; bɔkɔs a dɔn du fulish tin.”

⁹ So PAPA GƆD tɔk to Gad we na Devid in prɔfɛt se,

¹⁰ “Go tɛl Devid se, “PAPA GƆD se, a de gi yu tri tin; pik wan pan dɛm we a go du yu.”

¹¹ So Gad kam mit Devid ɛn tɛl am se, “Na dis PAPA GƆD se, ‘Tek us wan yu want,

¹² ayda lɛ aŋri fɔdɔm na di land fɔ tri ia, ɔ lɛ i mek Devid in ɛnimi dɛn de biɛn am wit sɔd fɔ tri mɔnt ɔ tri de we PAPA GƆD in sɔd go kil pipul, ɛn bad bad siknɛs we de kil pipul kwik kwik wan, ɛn PAPA GƆD in enjɛl de pas ɛn pipul ɔlsay na Izrɛl.’ So, mek ɔp yu maynd us ansa a go kɛr go gi di wan we sɛn mi”

¹³ Nain Devid tɛl Gad se, “Dis tin ya mɔna mi; mek a fɔdɔm na PAPA GƆD an, bikɔs i gɛt ebi ebi sɔri at; bɔt mek a nɔ fɔdɔm na mɔtalman an.

¹⁴ So PAPA GƆD sɛn bad bad siknɛs we de kil pipul kwik kwik pan Izrɛl, ɛn na sɛvinti tawzin pipul day.

¹⁵ Ɛn PAPA GƆD sɛn di enjɛl go Jerusɛlɛm fɔ go pwɛl pwɛl am, bɔt as i wan pwɛl am so, nain PAPA GƆD fil sɔri ɛn i chenj in maynd fɔ di bad we i dɔn mek ɔp; nain i tɛl di enjɛl we de pwɛl se “I du so; tap wetin yu de du.” PAPA GƆD in enjɛl bin tinap nia wan Jɛbu sayt we nem Araunain ples we dɛn de mas mas ɛn pul rɛs.

¹⁶ Devid es in yay ɛn in i si PAPA GƆD in enjɛl tinap midul di skay, ɛn i bin ol wan sɔd nain an we i tret oba Jerusɛlɛm. Nain Devid ɛn di bigman dɛn we bin wɛr saklɔth ɛn butu dɛn fes na grɔn.

¹⁷ So Devid tɛl PAPA GƆD se, “Nɔ to mi gi ɔda fɔ kɔnt di pipul dɛm? Na mi dɔn sin ɛn dɔn du di bad bad tin. Bɔt dɛn ship ya, wetin dɛn du? Du ya PAPA GƆD we na mi mi Gɔd, a de beg yu, pɔnish mi ɛn mi papa in os, bɔt nɔ mek dis sik kam pan yu pipul dɛn.”

¹⁸ Nain PAPA GƆD in enjɛl tɛl Gad traŋa wan fɔ tɛl Devid se mek Devid go ɔp go bil wan ɔlta to PAPA GƆD na Arauna we na Jɛbyusayt in ples we dɛn de mas mas ɛn pul rɛs.

¹⁹ So Devid go ɔp lɛk aw Gad tɛl am, we i bin tɔk insay PAPA GƆD in nem.

²⁰ Arauna bin de bit bɔlgɔ; i tɔn ɛn si di enjɛl; in fo bɔypikin dɛn we bin de wit am ayd dɛnsɛf.

²¹ We Devid de kam to Arauna, Arauna luk ɛn i si Devid, so i kɔmɔt usay i bin de bit bɔlgɔ, go mit Devid ɛn i tɛl am adu.

²² Devid tɛl Arauna se, “Gi mi dis ples we yu de mas mas ɛn pul rɛs so dat a go bil PAPA GƆD in ɔlta de - go mi fɔ di ful prayz – so dat di siknɛs go kɔmɔt pan di pipul dɛm.”

²³ Nain Arauna tɛl Devid “Tek am; ɛn mek mi masta we na di kiŋ du wetin i fil se gud; luk am, a de gi di man kaw dɛn fɔ bɔn sakrifays, ɛn di bɔd dɛn we dɛm de man mas mas rɛs pan fɔ di wud ɛn di bɔlgɔ fɔ di sid ɔfrin. A gi yu ɔltin”

²⁴ Bɔt kiŋ Devid tɛl Arauna se,” Nɔ o, a go pe di ful prayz; A nɔ go tek wetin na yu yon gi PAPA GƆD, ɛn a nɔ go mek bɔn sakrifays we a nɔ pe natin fɔ.”

²⁵ So Devid pe Arauna siks pɔynt et kilogram gold fɔ di wanol ples.

²⁶ So Devid bil wan ɔlta de fɔ PAPA GƆD ɛn mek bɔn sakrifays ɛn pis ɔfrin dɛm ɛn pre to PAPA GƆD, ɛn I ansa am wit faya we kɔmɔt ɛvin pan di ɔlta we gɛt di bɔn sakrifays.

²⁷ Nain PAPA GƆD gi di enjɛl ɔda, nain di enjɛn put di sɔd bak nain kes.

²⁸ Da tɛm de, we Devid si se PAPA GƆD dɔn ansa am na Arauna we na Jebyusayt in grɔn fɔ mas mas ɛn pul rɛs, i mek in sakrifays dɛm de.

²⁹ Bikɔs PAPA GƆD in tabanakul we Mozis bin mek na di dray ples we pipul nɔ tap, ɛn di ɔlta fɔ bɔn ɔfrin datɛnde bin de di ay ples na Gibɛɔn;

³⁰ bɔt Devid nɔ bin ebul do go de fɔ go aks PAPA GƆD ɛnitin, bikɔs i de fred PAPA GƆD in enjɛl in sɔd.