1 Kronikuls 20 - Krio Fɔs Oli Baybul

Devid Kapchɔ Raba

¹ Insay di tɛm we plant dɛn kin bɔs we dɛn kɔl spriŋ, di tɛm we dɛn kiŋ dɛn kin go fɛt wa, Joab lid di ami ɛn dɛn go wutuwutu di Amonayt dɛn kɔntri ɛn kam le ambush Raba. Bɔt Devid in bin lɛf na Jerusɛlɛm. Joab kil ɔl di pipul dɛn na Raba ɛn kapchɔ am.

² So Devid tek dɛn kiŋ in krawn kɔmɔt na i ed; dɛn fɛnɔt se i we bɔt sɔm tati fo kilogram ɛn wan dayamɔn insay am; so dɛn put am na Devid in ed. Dɛn pul bɔku bɔku tin dɛn kɔmɔt na di siti we dɛn briŋ kam.

³ Igen i briŋ di pipul we bin de na di siti kam ɛn mek dɛn de wok lɛk lebra fɔ am wit sɔ, pik aks ɛn aks. Na di sem tin i du na ɔl di Amonayt dɛn siti dɛn. Dɔn Devid ɛn ɔl di pipul dɛn tɔn bak go na Jerusɛlɛm.

Dɛn Fɛt Di Filistin Jayant Dɛn

⁴ Afta dat, wa fɔdɔm bak wit di Filistin dɛm na Geza; nain Sibɛkay we na Ushatayt kil Sipay we na wan pan di gayant dɛn granpikin; dat mek di Filistin dɛn fɛda kan dɔŋ.

⁵ Wa fɔdɔm bak wit di Filistin dɛm; so Ɛlanan we na Jair in bɔypikin kil Lami we na Golayat we na Gitayt, in brɔda, di lɔŋ pat pan in spia bin tan lɛk mata pɛnsul

⁶ Wa bin fɔdɔm bak na Gat, usay wan man bin de we gɛt ayt ɛn bɔdi, we gɛt siks finga nain an dɛm, ɛn siks to nain fut dɛn, we ɔl bi twɛnti fo; ɛn insɛf na bin gayant dɛn sid.

⁷ We i provok Izrɛl, Jonɛthan we na Shimea we na Devid in brɔda, in bɔypikin, bin kil am.

⁸ Dɛn wan ya na dɛn gayant dɛn na Gat dɛn jɛnareshɔn dɛm; na Devid ɛn in wokman dɛn kil dɛn.