1 Kronikuls 16 - Krio Fɔs Oli Baybul

¹ So dɛn kɛr PAPA GƆD in Ak ɛn put am insay di tɛnt we Devid bin dɔn pich fɔ am; ɛn dɛn mek sakrifays we de bɔn na faya ɛn pis ɔfrin to PAPA GƆD.

² Wɛn Devid mek di sakrifays we de bɔn ɔfrin ɛn di pis ɔfrin dɔn, i blɛs di pipul dɛm insay PAPA GƆD in nem,

³ ɛn sheb wan lof bred, smɔl bif ɛn wan kek dray greps gi ɔl uman ɛn man na Izrɛl.

⁴ Pantap dat, i pik sɔm pan di Livayt dɛm fɔ bi PAPA GƆD in wokman bifo PAPA GƆD in Ak, fɔ kɔl am, tɛl am tɛnki ɛn fɔ prez PAPA GƆD we na Izrɛl dɛn Gɔd.

⁵ Esaf na di lida, ɛn nɛks to am na bin Zɛkaraya, Jeayɛl, Shɛmiramɔt, Jɛiɛl, Matitaya, Ɛliab, Bɛnaya, Obɛd Idɔm, ɛn Jeayɛl, we fɔ ple apɛn gita; na Esaf fɔ nak di simbɔl,

⁶ ɛn na Bɛnaya ɛn Jaeziɛl we na di man we de mek sakrifays fɔ pipul sin fɔ jɛs de blo di trɔmpɛt dɛm bifo PAPA GƆD in Ak ɔf di Kɔvinant.

⁷ Na di de dat Devid fɔs mak am lɔ se Esaf ɛn in brɔda dɛm fɔ siŋ tanksgivin to PAPA GƆD.

Prez Siŋ

⁸ Tɛl PAPA GƆD tɛnki, kɔl in nem mek di pipul dɛn no wetin i de du;

⁹ Siŋ to am, siŋ bɔku prez to am tɔk bɔt ɔl in wɔndaful wok.

¹⁰ Gi in Oli nem gud nem; lɛ dɛn wan dɛm we dɛn at det o PAPA GƆD gladi.

¹¹ Fɛn PAPA GƆD ɛn in trɛnk, Fɛn usay i de ɔltɛm.

¹² Mɛmba di wɔndaful wok dɛm we i dɔn du, di wɔnda dɛm we dɔn wok, di jɔjmɛnt dɛm we i dɔn pul nain mɔt.

¹³ Una we na Ebraam PAPA GƆD in wokman, in bɛlɛ bɔn dɛm Jekob in bɔypikin dɛm, di wandɛn we i dɔn pik!

¹⁴ Naim na PAPA GƆD we na wi Gɔd; In jɔjmɛnt dɛn de ɔl say na wɔl.

¹⁵ I de mɛmba in Kɔvinant sote go, di tin dɛn we i dɔn tɔk traŋa wan se dɛn fɔ du, fɔ wan tawzin jɛnareshɔn.

¹⁶ Di Kɔvinant we i mek wit Ebraam; di swɛ we i swɛ to Ayzak,

¹⁷ i gri se na lɔ to Jekɔb we go bi wan wɔd wit Izrɛl sote go

¹⁸ we i se “A go gi una kenan land nain go bi una yon prɔpati.”

¹⁹ We dɛn nɔ bin plɛnti yet, ɛn dɛn nɔ du natin bɛtɛ yet, ɛn dɛn na trenja na di land,

²⁰ Dɛn de waka frɔm neshɔn to neshɔn, frɔm wan kindɔm to to ɔdawan,

²¹ I nɔ gri nɔbɔdi tɔmɛnt dɛn layf, i tɛlɔf kiŋ dɛn fɔ seka dɛn

²² se, “Nɔ tɔch di wan dɛm we a dɔn anɔynt, nɔ du mi prɔfɛt bad!”

²³ Lɛ ɔlman na wɔl siŋ to PAPA GƆD! Tɛl ɔlman ɛvri de bɔt aw i de fri mɔtalman sol!

²⁴ Tɔk bɔt in gud nem to di neshɔn dɛm, tɔk bɔt di pawaful tin dɛn we i dɔn du we pipul dɛn kɔle!

²⁵ Bikɔs PAPA GƆD na gret Gɔd, ɛn nɔto bebi prez fɔ prez am, ɛn dɛn fɔ fred am pas ɔl dɛn ɔda gɔd dɛm.

²⁶ Bikɔs ɔl di pipul dɛn gɔd dɛm na laylay gɔd; bɔt na PAPA GƆD mek di skay ɛn ɔl wetin de ɔp

²⁷ Nain gɛt ɔl ɔna ɛn pawa; trɛnk ɛn gladi de usay i de.

²⁸ Una gri se na PAPA GƆD, una dɛn difrɛn difrɛn famili dɛn, una gri se na PAPA GƆD gɛt ɔna we nɔbɔdi nɔ ɛva gɛt, ɛn trɛnk.

²⁹ Una gri se na PAPA GƆD in nem fɔ gɛt di ɔna we nɔbɔdi nɔ ɛva gɛt; nɔ kam bifo am ɛmti am! Wɔship PAPA GƆD wit oli klos;

³⁰ lɛ di wanol wɔl trimbul bifo am; yɛs, di wɔl tinap traŋa wan, di wɔl nɔ go ɛva muf.

³¹ Lɛ ɛvin gladi, ɛn lɛ dis wɔl sɛf gladi, ɛn mek dɛn tɛl dɛnsɛf na di neshɔn dɛm se, “Na PAPA GƆD de na pawa”

³² Mek di si ɛn ɔl wetin ful am ala, mek di fam ɛn ɔl de de wetin es in nem ɔp!

³³ Da tɛm de di tik dɛm we de na bush go siŋ wit gladi, bifo PAPA GƆD, bikɔs i de kam fɔ jɔj dis wɔl.

³⁴ Tɛl PAPA GƆD tɛnki, bikɔs i gud; bikɔs in lɔv we nɔ de shek go de sote go.

³⁵ Tɔk igen se “Pul wi pan trɔbul, duya, PAPA GƆD we sev wi, ɛn gɛda wi ɛn pul wi kɔmɔt na di neshɔn dɛn na; so dat we go tɛl yu oli nem tɛnki; tɔk bɔt6 in gud nem we yu de prez am.

³⁶ Lɛ wi blɛs PAPA GƆD we na Izrɛl dɛn Gɔd, sote go to sote go!” Dɔn ɔl di pipul dɛn se, “Emɛn! Ɛn prez PAPA GƆD.

Wɔship Na Jerusɛlɛm Ɛn Gibiɔn

³⁷ So Devid lɛf Esaf ɛn in brɔda dɛm bifo PAPA GƆD in Ak ɛvride de du wetin dɛn sɔpoz fɔ du,

³⁸ wit Obɛd Idɔm ɛn in siksti-et brɔda dɛm; da tɛm de, Obɛd Idɔm we na Jɛdutum in bɔypikin, ɛn Osa fɔ bi di getman dɛn..

³⁹ Ɛn i lɛf Zedɔk ɛn in brɔda dɛn we dɛn na man dɛn we de mek sakrifays fɔ pipul sin, bifo PAPA GƆD in Oli tɛnt na di ay ples we bin de Gibiɔn,

⁴⁰ fɔ de mek sakrifays we de bɔn na faya to PAPA GƆD ɔltɛm, mɔnin ɛn ivin, bay wetin rayt na di lɔ we PAPA GƆD dɔn tɛl Izrɛl traŋa wan se, dɛn fɔ du.

⁴¹ Iman ɛn Jɛdutun bin de wit dɛm, ɛn di balans pan di wan dɛm we dɛn bin pik ɛn bin kɔl dɛn nem fɔ de tɛl PAPA GƆD tɛnki, fɔ in lɔv we nɔ de chenj ɛn de sote go.

⁴² Iman ɛn Jɛdutun bin gɛt trɔmpɛt dɛn ɛn simbɔl dɛm fɔ ple di myuzik, ɛn bin instrumɛnt dɛm fɔ siŋ oli siŋ. Dɛn pik Jɛdutun in bɔypikin dɛm fɔ gyad di get.

⁴³ So ɔl di pipul dɛn go, lman go nain yon os, ɛn Devid sɛf go om go blɛs in yon pipul dɛn nain os.