1 Kronikuls 15 - Krio Fɔs Oli Baybul

Dɛn De Rɛdi Fɔ Muf Di Ak Ɔf Di Kɔvinant

¹ Devid bil os dɛn fɔ insɛf na di siti ɔf Devid; dɔn i rɛdi ples fɔ PAPA GƆD in Ak ɛn pich tɛnt fɔ am.

² Dɔn Devid tɔk se “Nɔbɔdi nɔ fɔ tot di Ak pas di Livayt dɛm, bikɔs na PAPA GƆD dɔn pik dɛm fɔ tot PAPA GƆD in Ak ɛn fɔ wok fɔ am sote go.

³ So Devid gɛda di wanol Izrɛl na Jerusɛlɛm fɔ kɛr PAPA GƆD in Ak go nain ples we i dɔn mek fɔ am.

⁴ So Devid gɛda Earɔn in bɔypikin dɛn ɛn di Livayt dɛn:

⁵ pan Koat in bɔypikin dɛn, yu gɛt Yuriɛl we na di lida, wit ɔndrɛd ɛn twɛnti pan in brɔda dɛm;

⁶ pan Mɛrari in bɔypikin dɛn, yu gɛt Asaya we na di lida, wit tu ɔndrɛd ɛn twɛnti pan in brɔda dɛn;

⁷ an Gashɔm in bɔypikin dɛm, yu gɛt Joɛl we3 na di lida wit ɔndrɛd ɛn tati pan in brɔda dɛm;

⁸ pan Elizafan in bɔypikin dɛm, yu gɛt Shɛmaya we na di lida, wit tu ɔndrɛd pan in brɔda dɛm;

⁹ pan Ɛbrɔn in bɔypikin dɛm yu gɛt Ilaɛl we na di lida, wit eti pan in brɔda dɛm;

¹⁰ pan Uziɛl in yon bɔypikin dɛm, yu gɛt Aminadab we na di lida, wit ɔndrɛd ɛn twɛlv pan in brɔda dɛm.

¹¹ So Devid sɛn kɔl di man dɛn we de mek sakrifays fɔ pipul sin, dat na Zedɔk ɛn Abiata, ɛn di Livayt dɛm, we na Yuriɛl, Asaya, Joɛl, Shɛmaya, Ilaɛl ɛn Aminadab,

¹² ɛn tɛl dɛn se, “na una na na edman dɛn fɔ di Livayt dɛn papa os dɛm; una ɛn una brɔda dɛn fɔ mek unasɛf klin na PAPA GƆD in yay, so dat una kin ebul briŋ PAPA GƆD we na Izrɛl dɛn Gɔd, in Ak kam na di ples we a dɔn mek fɔ am.

¹³ Bikɔs una nɔ bin tot am di fɔs tɛm, PAPA GƆD we na wi Gɔd bin vɛks kil pɔsin, bikɔs wi nɔ bin bisin fɔ du am di we we PAPA GƆD in lɔ se wi fɔ du am.”

¹⁴ So di man dɛn we de mek sakrifays fɔ pipul sin ɛn di Livayt dɛn mek dɛnsɛf klin na PAPA GƆD yay fɔ go briŋ PAPA GƆD we na Izrɛl dɛn Gɔd, in Ak kam.

¹⁵ So di Livayt dɛn tot PAPA GƆD in Ak na dɛn sholda wit di pol dɛn, lɛk aw Mozis bin tɛl dɛn traŋa se PAPA GƆD in lɔ se dɛn fɔ du.

¹⁶ Devid bin tɛl di Livayt lida dɛm traŋa wan dɛn fɔ pik dɛn brɔda dɛm fɔ bi di man dɛn we de siŋ, we go ple muzik instrumɛnt, lɛk gita, flut ɛn simbɔl lawd lawd wan fɔ mek gladi gladi.

¹⁷ So di Livayt dɛn pik Iman we na Joɛl in bɔypikin; pan in brɔda dɛn yu gɛt Esaf, we na Bɛrɛkaya in bɔypikin, ɛn pan Merari in bɔypikin dɛm, dɛn brɔda Ɛtan we na Kushaya in bɔypikin;

¹⁸ togɛda wit dɛm, dɛn brɔda dɛn we fɔ ɛp dɛn, we na Zɛkaraya, Jaeziɛl, Shemiramɔt, Jeayɛl, Uni, Ɛliab, Benaya, Maasɛya, Matitaya, Ɛlifɛlɛu ɛn Miknɛia, ɛn di getman dɛn na di get we na Obɛd Idɔm ɛn Jɛiɛl.

¹⁹ Di man dɛn we de siŋ na Iman, Esaf ɛn Ɛtan, fɔ ple di bras simbɔl dɛm;

²⁰ Zɛkaraya, Eziɛl, Shɛmiramɔt, Jeayɛl, Uni, Eliab, Maasɛia ɛn Benaaya fɔ ple di ap bay aw Alamɔt dayrɛkt;

²¹ Bɔt Matitaya, Ɛlifɛlɛu, Mikneia, Obɛd Idɔm, Jeayɛl, ɛn Azazaya fɔ lid wit gita bay aw Sheminit dayrɛkt.

²² Na Chɛnanaya, we na di myuzik lida fɔ di Livayt dɛn, fɔ dayrɛkt di muzik bikɔs nain ɔndastand.

²³ Na Bɛrɛkaya ɛn Ɛlkena fɔ bi getman dɛm fɔ di Ak.

²⁴ Shɛbanaya, Joshafat, Netanɛl, Amasay, Zɛkaraya, Bɛnaya ɛn Ɛlieza, di man dɛn we de mek sakrifays fɔ pipul sin, fɔ blo di trɔmpɛt dɛm bifo PAPA GƆD in Ak. Obɛdidɔm ɛn Jɛia sɛf fɔ bi getman dɛn fɔ di Ak.

Aw Dɛn Muf Di Ak Ɔf Di Kɔvinant

²⁵ So Devid ɛn di bigman dɛn na Izrɛl, ɛn di lida dɛn we de oba tawzin tawzin, bin siŋ ɛn dans go briŋ PAPA GƆD in Ak ɔf di Kɔvinant kɔmɔt na Obɛd Idɔm in os.

²⁶ Bikɔs PAPA GƆD ɛp di Livayt dɛn we bin tot di PAPA GƆD in Ak ɔf di Kɔvinant, dɛn sakrifays sɛvin man kaw ɛn ɛn sɛvin man ship.

²⁷ Devid bin wɛr wan fayn fayn linin gawn, ɛn na so ɔl di Livayt dɛm we bin tot di Ak ɔf di Kɔvinant, di man dɛn we de siŋ, ɛn Chɛnanaya we na di lida pan man dɛn we de siŋ, bin drɛs. Devid bin wɛr linin Ifɔd.

²⁸ So di wanol Izrɛl kɛr PAPA GƆD in Ak ɔf di Kɔvinant go wit lawd gladi nɔys, we di ɔn, di trɔmpɛt ɛn di simbɔl dɛn de ple, ɛn dɛn bin de ple di apɛn gita lawd lawd wan.

²⁹ PAPA GƆD in Ak ɔf di Kɔvinant bin rich na di siti ɔf Devid. Mikal we na Sɔl in gyal, bɔks de kam na Devid in siti, Maykalwe na Sɔl in gyal pikin bin luk oba di winda ɛn bin si kiŋ Devid de dans ɛn mek gladi gladi; dat mek i lɔs rɛspɛkt fɔ am.