1 Kronikuls 13 - Krio Fɔs Oli Baybul

Dɛn Muf Di Ak Ɔf Di Kɔvinant Kɔmɔt Kiriat Jearim

¹ Devid ɛŋed wit di kɔmanda dɛm fɔ dɛn wan dɛn we de oba tawzin man ɛn ɔndrɛd man wit ɔl di ɔda lida dɛm.

² Devid tɛl ɔl di Izrɛlayt we gɛda se ‘If una tink se dis na gud tin fɔ du, ɛn if na wetin PAPA GƆD we na wi Gɔd want, lɛ we sɛn to wi brɔda dɛn we lɛf ɔlsay na Izrɛl, ɛn to di man dɛn we de mek sakrifays fɔ pipul sin ɛn di Livayt dɛn na di siti dɛn we gɛt land we plɛnti gras de gro fɔ fid animal so dat dɛn go kam tap wit wi na ya.

³ Dɔn mek we briŋ wi PAPA GƆD in Ak ɔf di Kɔvinant kam bak; bikɔs Sɔl in tɛm, we nɔ bin bisin bɔt am.”

⁴ Dɛn ɔl we gɛda bin gri fɔ dat, bikɔs dɛn ɔl si se dat na di rayt tin.

⁵ Devid gɛda di wanol Izrɛl frɔm Shiɔ na Ijipt te rich di ples fɔ pas go insay Amat, fɔ briŋ PAPA GƆD in Ak ɔf di Kɔvinant kɔmɔt Kiriat Jearim, kam bak.

⁶ Ɛn Devid ɛn ɔl di Izrɛlayt dɛn go Beala, dat na Kiriat Jearim we blant Juda fɔ go tek di Ak ɔf di Kɔvinant kɔmɔt de, we na PAPA GƆD we sidɔm nain tron oba di Chɛryubim

⁷ Dɛn put di Ak ɔf di Kɔvinant pan nyu ɔmɔlanke, kɔmɔt na Abinadab in os. Na Uza ɛn Aio bin de kɔntrol di ɔmɔlanke.

⁸ Devid ɛn ɔl di Izrɛlayt dɛn bin de mek gladi gladi bifo PAPA GƆD wit ɔl dɛn trɛnk, de siŋ ɛn de ple gita, tamborin, simbɔl ɛn blo gita ɛn trɔmpɛt.

⁹ Ɛn we dɛn rich da say de mas rɛs ɛn klin am na Chidɔn, Uza tret in an fɔ kech di Ak ɔf di Kɔvinant bikɔs di kaw dɛn we bin de drɔ di ɔmɔlanke fɔdɔm.

¹⁰ Nain PAPA GƆD vɛks pan Uza; I kil am, bikɔs in put in an fɔ kech di Ak ɔf di Kɔvinant; i day de bifo PAPA GƆD.

¹¹ Devid bin vɛks bikɔs PAPA GƆD vɛks kil Uza, ɛn kɛn kɔl da ples de Pɛrɛz Uaz te tide.

¹² Dat mek Devid fred PAPA GƆD da de de; ɛn i se “Aw a go manej briŋ PAPA GƆD in Ak ɔf di Kɔvinant kam om to mi?

¹³ So Devid nɔ tek di Ak ɔf di Kɔvinant go om na Devid in siti o! Bɔt bɛn kɛr am go na Obɛd Idɔm we na Gitayt, in os.

¹⁴ PAPA GƆD in Ak ɔf di Kɔvinant de wit Obɛd Idɔm ɛn in pipul dɛn nain os, fɔ tri mɔnt; lɛf wit Obɛdidɔm in famili nain os tri mɔnt; PAPA GƆD blɛs Obɛd Idɔm ɛn ɔl udat de nain os, ɛn ɔl wetin i gɛt.