1 Kronikuls 12 - Krio Fɔs Oli Baybul

Di fɔs Pipul Dɛn we Bin De Wit Devid We Kɔmɔt Na Di Bɛnjamin Fambul

¹ Na di man dɛn dɛn wan ya we bin go to Devid na Ziklag we i nɔ bin ebul waka fri wan bikɔs i bin de fred Sɔl we na Kish in bɔypikin; dɛn bin de pan di pawaful sojaman dɛn we bin ɛp am fɛt wa.

² Na man dɛn we kin faya bo ɛn aro ɛn kin sɛn sliŋ wit raytan ɛn lɛf an; dɛn na Bɛnjaminayt dɛm we na Sɔl in fambul dɛm.

³ Di lida na bin Aiɛza dɛn, nɛks tɛm na Joash. Dɛn tu na bin Shimaa we kɔmɔt Gibia in bɔypikin dɛm. Dɔn yu gɛt Jeziɛl ɛn Pɛlɛt we na Azmavɛt in bɔypikin dɛn; Bɛraka, Jeu we kɔmɔt Anatɔt.

⁴ Ishmaya we kɔmɔt Gibɛɔn we3 na pawaful sojaman pan di di tati, ɛn na lida fɔ di tati; Jɛrimaya, Jaeziɛl, Joanan. Jozabad we kɔmɔt Gɛdɛra,

⁵ Ɛluzay, Jɛrimɔt, Bealia, Shɛmaraya, Shefataya we na Arufayt.

⁶ Ɛlkena, Isaya, Azarɛl, Joɛza ɛn Jashobem we dɛn na Koraayt;

⁷ ɛn Joɛla ɛn Zɛbadaya we na Jeroam we kɔmɔt Gɛdɔ, in bɔypikin dɛn.

Di Wan Dɛm We Bin De Wit Devid We Kɔmɔt Na Di Gad Fambul

⁸ Insay di Gadayt fambul, pawaful sojaman dɛm we dɔn fɛt fɔ lɔŋ, man dɛn we sabi fɛt wit big shild ɛn spia bad bad wan, kɔmɔt go mit Devid na di barik na di ɛmti ples we pɔsin nɔ go ebul tap. Dɛn fes dɛn bin tan lɛk layɔn fes dɛn ɛn dɛn gɛt spid lɛk dɛn fritambo na dɛn mawnten.

⁹ Ɛza di lida, Obidaya di nɔmba tu man, Eliab di nɔmba tri,

¹⁰ Mishmana fo, Jɛrimaya fayv,

¹¹ Atay siks, Ilaɛl sɛvin,

¹² Joenan et, Ɛlzabad nayn,

¹³ Jɛrimaya tɛn ɛn Machbanay, nɔmba Ilɛvin.

¹⁴ Dɛn Gadayt ya na ofisa dɛm na di ami. Di juniɔ ɔfisa dɛn bi gɛt wan ɔndrɛd man ɔnda dɛn, ɛn di sinyɔ wan dɛn bin gɛt wan tawzin

¹⁵ Na di man dɛn dɛn wan ya we krɔs Riva Jɔdan insay di fɔs mɔnt we i bin rɔn oba kam na land, ɛn mek ɔl di wan dɛn we de na di ist ɛn wɛst say na di vali dɛn, rɔnawe.

Di Wan Dɛn We Kɔmɔt Na Di Bɛnjamin Ɛn Juda Fambul

¹⁶ Sɔm pan di man dɛn na di Bɛnjamin ɛn Juda Fambul bin kam na di barik to Devid.

¹⁷ Dɛvid kɔmɔt go mit dɛm ɛn tɛl dɛn se, “If una kam to mi wit gud at fɔ ɛp mi, misɛf go gladi fɔ una; bɔt if una kam fɔ sɛl mi gi mi ɛnimi dɛm, ɔl we mi an klin, mek wi Papa dɛn Gɔd si ɛn pɔnish una.”

¹⁸ Nain di Spirit kam pan Amasay we na lida fɔ di tati fɛtman, ɛn i tɔk se: Devid, wi na yu yon; Jɛsi in bɔypikin, wi de wit yu, gɛt kol at, mek Gɔd gi yu kol at, ɛn mek Gɔd gi di wan dɛn we de ɛp yu kol at! Bikɔs yu Gɔd de ɛp yu. Nain Devid gri fɔ mek dɛn wok wit am, ɛn i mek dɛn ofisa nain ami.

Di Wan Dɛn We Kɔmɔt Na Di Manasɛ Fambul.

¹⁹ Sɔm pan di man dɛn na di Manasɛ fambul lɛf kan jɔyn Devid we i bin kam wit di Filistin dɛm fɔ kan fɛt Sɔl (Bɔt in nɔ bin ɛp dɛm bikɔs, di Filistin rula dɛm ɛŋ ed ed ɛn drɛb am, se “I go sɛl wi ed chenj kamp go bak to in masta Sɔl.”)

²⁰ We i bin de go Ziklag, dɛn man ya na di Manasɛ fambul chenj kamp go to am: Adna, Jɔzabad, Jɛdiaɛl, Maykɛl, Jɔzabad, Ilaɛlu, ɛn Zilɛtay, lida dɛn fɔ tawzin tawzin dɛm na di Manasɛ fambul.

²¹ Dɛn ɛp Devid fɔ fɛt di pipul we kam red am bikɔs dɛn ɔl na pawaful sojaman dɛn ɛn dɛn na kɔmanda dɛm na di ami.

²² Frɔm da de de, man dɛn jɔs de kam to Devid fɔ ɛp an, sote i tɔn bi bi big ami lɛk PAPA GƆD in ami.

Di List Fɔ Devid In Ami

²³ Na di nɔmba dɛn dis fɔ di difrɛn difrɛn grup na di ami we go to Devid na Ɛbrɔn fɔ tek Sɔl in kindɔm gi am bay aw PAPA GƆD in wɔd se.

²⁴ Di man dɛn na di Juda fambul we bin de fɛt wit big shild ɛn spia na siks tawzin et ɔndrɛd man dɛm wit wɛpɔn.

²⁵ Pan di Simiɔnayt fambul dɛm pawaful sojaman dɛm we gɛt maynd fɔ fɛt wa, na bin sɛvin tawzin wan ɔndrɛd.

²⁶ Pan di Livayt fambul, na fo tawzin siks ɔndrɛd

²⁷ Prins Jɛoiada we kɔmɔt na Earɔn in os bin gɛt tri tawzin sɛvin ɔndrɛd man.

²⁸ Zedɔk, wan yɔŋ pawaful sojaman ɛn twɛnti tu kɔmanda we kɔmɔt nain yon Papa os.

²⁹ Pan di Bɛnjamin fambul we na Sɔl in kɔntri man dɛn, na bin tri tawzin, we plɛnti pan dɛn bin stil de fɔ Sɔl.

³⁰ Pan di Ifrem fambul, na bin twɛnti tawzin et ɔndrɛd pawaful sojaman dɛm we gɛt maynd fɔ fɛt we kɔmɔt na dɛn papa dɛn os.

³¹ Pan di af trayb pan di Manasɛ fambul na etin tawzin, we na dɛn dɛn pik fɔ kam mek Devid kiŋ.

³² Pan di Isaka fambul, man dɛn we no wetin gɛt fɔ bi we dɛn luk di wɛda, we bin no wetin Izrɛl sɔpoz fɔ du, na bin tu ɔndrɛd edman, ɛn ɔl dɛn fambul dɛm we de ɔnda dɛm.

³³ Pan Zɛbyulɔn fambul, na bgin fifti tawzin soba sojaman dɛm we rɛdi fɔ fɛt wit ɔl di wɛpɔn dɛm fɔ wa fɔ ɛp Devid wit wan at ɛn wan maynd.

³⁴ Pan Naftali fambul, na bin wan tawzin kɔmanda ɛn tati sɛvin tawzin sojaman dɛm de fɛt wit big shild ɛn spia.

³⁵ Pan di Dan fambul na bin twɛnti et tawzin siks ɔndrɛd sojaman dɛm wit ɔlkayn wɛpɔn fɔ fɛt.

³⁶ Pan di Asha fambul, na bin fɔti tawzin soba soja dɛm rɛdi fɔ fɛt.

³⁷ Pan di Rubɛn ɛn Gadayt Fambul, ɛn haf di Manasɛ Fambul we de Oba di ɔda say na Jɔdan, na bin wan ɔndrɛd ɛn twɛnti tawzin man wit ɔl kayn wɛpɔn fɔ fɛt wa.

³⁸ Ɔl dɛn sojaman dɛm ya bin layn ɔp bay aw dɛn kin tinap fɔ fɛt go na Ɛbrɔn we dɛn bin dɔn mek ɔp dɛn maynd fɔ mek Devid kiŋ oba Izrɛl; semweso, ɔl di pipul dɛn na Izrɛl bin gɛt wan wɔd fɔ mek Devid kiŋ.

³⁹ Ɛn dɛn bin de wit Devid tri de, de it ɛn drink bikɔs dɛn brɔda dɛm bin dɔn rɛdi ɔltin fɔ dɛn fɔ dɛm.

⁴⁰ Ɛn dɛn neba dɛnsɛf, sote go Isaka, Zɛbyulɔn ɛn Naftali, briŋ it kam pantap dɔŋki, kamɛl, yɔŋ dɔŋki ɛn kaw; bɔku bɔku tin fɔ it lɛk kek, dray grɛps ɛn wayn ɛn ɔyl, ɛn kaw ɛn ship, bikɔs gladi gladi bin de na Izrɛl.