1 Kronikuls 11 - Krio Fɔs Oli Baybul

Devid Bi kiŋ na Izrɛl ɛn Juda

¹ Ɔl di Izrɛlayt dɛn gɛda to Devid na Ɛbrɔn, ɛn tɛl am se, mɛmba se wi na yu flɛsh ɛn blɔd.

² Fɔstɛm, ɔl we na Sɔl na bin kiŋ, na yu bin tinap bifo Izrɛl fɔ go fɛt ɛn kam bak; ɛn PAPA GƆD bin tɛl yu se, na yu go lid mi pipul dɛn ɛn yu go bi dɛn kiŋ.”

³ So ɔl di bigman dɛm na Izrɛl go to di kiŋ na Ɛbrɔn; Devid mek wan wɔd wit dɛm bifo PAPA GƆD ɛn dɛn anɔynt Devid ɛn mek Devid fɔ bi kiŋ na Izrɛl, bay wetin Samiɛl se tɔk PAPA GƆD se.

⁴ So Devid ɛn ɔl di Izrɛlayt dɛn go na Jerusɛlɛm, dat na Jebus, usay di Jɛbyusayt dɛn bin tap na di land.

⁵ Di pipul dɛn we tap na Jebus tɛl Devid se “yu nɔ go kam na ya” pan ɔl dat Devid, kapchɔ di say we dɛn abop pan na Zayɔn; dat na Devid in Siti.

⁶ Devid se, “di fɔs pɔsin we go kil wan pan di Jebyusayt dɛn, go bi chif ɛn kɔmanda. Na Joab we na Zɛruaya in bɔypikin, nain fɔs kil, so dɛn mek am kɔmanda.

⁷ Ɛn Devid tap na di say we dɛn abop pan; na da mek dɛn kɔl am Devid in siti.

⁸ Ɛn i bil di siti rawnd am frɔm usay dɛn kɔl Milo te go rawnd; so Joab mek di balans say na di siti we bin dɔn pwɛl.

⁹ Devid kam bi pawaful mɔ ɛn mɔ bikɔs PAPA GƆD Ɔlmayti bin de wit am.

Devid In Femɔs Fɛtman Dɛn

¹⁰ Na dɛn wan ya na di kɔmanda dɛn pan Devid in pawaful sojaman dɛm we sɔpɔt am traŋa traŋa wan nain kindɔm, togɛda wit di Izrɛlayt dɛn, fɔ mek am kiŋ, bay wetin PAPA GƆD bin dɔn tɔk se go bi na Izrɛl.

¹¹ Dis na wetin dɛn rayt bɔt Devid in pawaful fɛtman dɛm. Jashobiam we na Amonayt na bin di edman pan dɛn tri; In fɛt wit in spia na wan batul nɔmɔ ɛn kil tri ɔndrɛd man.

¹² Di wan we bin de nɛks to am pan dɛn tri mayti man dɛn ya, na Ɛlieza we na Dodo, da Aoayt, in bɔypikin.

¹³ I bin de wit Devid na, Pas Damim di tɛm we di Filistin dɛn bin gɛda de fɔ fɛt wa. Wan plɔt bin de de we ful ɔp wit bɔlgɔ, ɛn di man dɛn rɔnawe pan di Filistin dɛm.

¹⁴ Bɔt in tinap traŋa wan lɛk man midul di plɔt, fɛt ɛn kil di Filistin dɛm; PAPA GƆD sev dɛm ɛn mek dɛn win we ɔlman gladi bad bad wan.

¹⁵ Tri pan di tati bigman dɛm go dɔŋ na di bi big ston go mit Devid na di kev na Adulam di tɛm we di Filistin ami bin kamp na Refaim vali.

¹⁶ Devid bin de na di barik ɛn di Filistin dɛn bin de na dɛn yon barik na Bɛtliɛm.

¹⁷ Nain Devid tɔk se “e ya, a wish sɔmbɔdi kin gi mi wata fɔ drink we kɔmɔt na di wɛl we de nia di get na Bɛtliɛm.”

¹⁸ So, di tri pawaful sojaman dɛn, go insay di Filistin dɛn kamp, drɔ di wata na di wɛl na Bɛtliɛm we de nia di get, ɛn kɛr am go to Devid. Bɔt Devid nɔ gri drink; i tɔn am na grɔn gi PAPA GƆD,

¹⁹ ɛn tɔk se “mek Gɔd nɔ gri lɛ mi du dis kayn tin. Mi fɔ drink dɛn man dɛn blɔd? Na dɛn layf dɛn risk we dɛn briŋ am.” Fɔseka dat i nɔ gri drink am. Na dɛn kayn tin ya di tri pawaful sojaman dɛm du.

²⁰ Abishay we na Joab in brɔda, na bin di lida pan tati man dɛn. In swiŋ in spia rawnd ɛn kil tri ɔndrɛd man wantɛm ɛn mek nem lɛk di Tri pawaful sojaman dɛn.

²¹ Naim bin femɔs pas femɔs pas ɔl di tati man dɛn ɛn i bi dɛn kɔmanda, bɔt i nɔ bin femɔs rich di tri pawaful sojaman dɛn.

²² Bɛnaya we na Jɛoiada in bɔypikin we kɔmɔt Kabzil, na bin man we nɔ de fred natin ɛn i bin de du pawaful tin; i kil tu pawaful Moabayt sojaman dɛn. Pantap dat, i kil wan layɔn insay ol ɛn na de we sno bin dɔn fɔdɔm.

²³ Ɛn i kil wan big ay Ijipshian we in ayt na bin sɛvin ɛn af fut. Di Ijipshian in spia we i bin ol bin tik lɛk mata pɛnsul; bɔt Bɛnaya go dɔŋ go mit am wit tik we tan lɛk fufu tik ɛn jɔg di spia kɔmɔt na di Ijipshian in an, ɛn kil am wit in yon spia.

²⁴ Na dɛn tin ya Benaya, we na Jeoayda in bɔypikin bin du we i mek nem lɛk di tri pawaful sojaman dɛn.

²⁵ Insɛf mek nem insay di tati, bɔt in ɔ bin rich di tri. Devid mek am kɔmanda fɔ in bɔdi gad dɛm.

²⁶ Di pawaful sojaman dɛn na di ami dɛn na bin Asaɛl we na Joab in brɔda, Ɛlanan we na Dodo we kɔmɔt Bɛtliɛm in bɔypikin,

²⁷ Shamɔt we kɔmɔt Arɔd, Ɛlɛz we na Pɛlonayt,

²⁸ Ira we na Ikɛsh we kɔmɔt Tɛkoa in bɔypikin, Abieza we kɔmɔt Anatɔt,

²⁹ Sibɛkay we na Ushatayt, Ilaɛl we na Aoayt.

³⁰ Maaray we kɔmɔt Nɛtofa, Ɛlɛd we na Beana we kɔmɔt Netofa in bɔypikin.

³¹ Itay we na Ribay we kɔmɔt Gibɛa we blant di Bɛnjamin fambul, in bɔypikin. Benaya we kɔmɔt Piratɔn,

³² Uray we kɔmɔt usay na Gaash watasay dɛn de, Abiɛl we na Abatayt.

³³ Azmavɛt we kɔmɔt Baurɔm, Ɛliaza we kɔmɔt Shaalbɔn

³⁴ Ashɛm we na Gizonayt, Jonɛthan we na Shagi we na Ararayt in bɔypikin.

³⁵ Aiam we na Saka we na Ararayt in bɔypikin, Elifal we na Ɔ in bɔypikin,

³⁶ Efa we na Mekeratayt, Aayja we na pɛlonayt.

³⁷ Ezro we kɔmɔt kamɛl, Naaray we na Ezibay in bɔypikin,

³⁸ Joɛl we na Netan in brɔda, Miba we na Gri in bɔypikin,

³⁹ Zilɛk we na Amonayt, Naaray we kɔmɔt Biarɔt, we na di man we de tot Joab, we na Zɛruaya in bɔypikin, in ayɛn klos fɔ fɛt

⁴⁰ Ira we na Itrayt, Garɛb we na Itrayt,

⁴¹ Yuraya we na Itayt, Zebad we na Alay in bɔypikin,

⁴² Adina we na Shiza we na Rubɛnayt, ɛn lida fɔ di Rubɛnayt we gɛt tati fɛt man wit am, in bɔypikin,

⁴³ Anan we na Maaka ɛn Joshafat we na Mitnayt.

⁴⁴ Uzaya we na Ashtɛratayt, Shema ɛn Jɛiɛl we na Otam we na Aroɛrayt in bɔypikin dɛn

⁴⁵ Jediaɛl we na Shimri in bɔypikin, ɛn Joa ɛn Joa we na Tizayt, in brɔda.

⁴⁶ Ilaɛl we na Meavayt, ɛn Jɛribay ɛn Joshavia we na Ɛlnaam in bɔypikin dɛn, ɛn Itma we na Moabayt,

⁴⁷ Ilaɛl ɛn Obɛd ɛn Jeasiɛl we kɔmɔt Zobab.