1 Kiŋ 9 - Krio Fɔs Oli Baybul

PAPA GƆD Apia Bak To Sɔlɔmɔn

¹ Wɛn Sɔlɔmɔn dɔn bil di os fɔ PAPA GƆD ɛn in kiŋ os dɔn ɛn dɔn gɛt ɔl wetin i want,

² PAPA GƆD apia to am di sɛkɛn tɛm lɛkɛ aw i bin apia to am na Gibiɔn.

³ I se, “A dɔn yɛri yu prea ɛn ɔl wetin yu dɔn tɛl mi; a dɔn kɔnsikret di os we yu bil ɛn na de una go de wɔship mi. Mi at de de ɛn a go de wach am.

⁴ As fɔ yu yon say, if yu waka tret wit mi ɛn du wetin rayt lɛkɛ yu papa Devid, ɛn du ɔl wetin a tɛl yu ɛn kip mi kɔmandmɛnt,

⁵ a go mek yu ɛn yu jɛnareshɔn bi kiŋ na Izrɛl sote go, lɛkɛ aw nɔmɔ a bin prɔmis yu papa Devid we a se nain sid go de rul na Izrɛl sote go.

⁶ “Bɔt if yu ɔ yu bɔypikin dɛn tɔn una bak pan mi, dɔn una nɔ obe mi kɔmandmɛnt ɛn de fala ɔda gɔd dɛn ɛn wɔship dɛn,

⁷ a go pul ɔl di Izrɛlayt dɛn na di land we a dɔn gi dɛn, dɔn a go lɛf di os we a dɔn kɔnsikret fɔ de wɔship mi. Izrɛl go tɔn to rederaun ɛn nɔbɔdi nɔ go luk una wit bɛtɛ yay.

⁸ Dis os go tɔn to ɔdinari dɔti. Ɛnibɔdi we si am go sɔprayz ɛn sɔktit: dɛn go de wɔnda wetindu PAPA GƆD du dis kanaba tin to di kɔntri ɛn di os.

⁹ Pipul dɛn go de tɔk se na we una tɔn pan PAPA GƆD we na una PAPA GƆD we pul una papa dɛn kɔmɔt na Ijipt, dɔn una bigin wɔship ɔda gɔd dɛn, na ɔl dat mek i put disgres ɛn trɔbul pan una.”

Sɔlɔmɔn Tay Bagin Wit Iram

¹⁰ Sɔlɔmɔn tek twɛnti ia fɔ bil os fɔ PAPA GƆD ɛn kiŋ os fɔ insɛf.

¹¹ Na kiŋ Iram na Taya gi am ɔl di sida ɛn payn timba ɛn gold fɔ mek i bil. Wɛn di wok dɔn dɔn, Sɔlɔmɔn gi Iram twɛnti siti dɛn na Galili as di pe.

¹² Wɛn Iram go luk di siti dɛn we Sɔlɔmɔn gi am, i nɔ bin lɛk dɛn.

¹³ So i aks am if na dɛn Kanaba siti de i de gi am; Iram gi di ples nem Kabul, ɛn na dis nem di ples gɛt te tide.

¹⁴ Ɛn na fo tawzin kilo gold Iram bin dɔn gi Sɔlɔmɔn.

Di Ɔda Tin Dɛn We Sɔlɔmɔn Du

¹⁵ Kiŋ Sɔlɔmɔn bin yuz wokman dɛn bay fos fɔ bil PAPA GƆD in os ɛn in kiŋ os, dɛn ful-ɔp di land na di ist pat na di siti ɛn bil di wɔl rawnd Jerusɛlɛm. Ɛn i bin bil Ezɔ, Mɛgido ɛn Gɛza siti dɛn bak.

¹⁶ Gɛza na di siti we di kiŋ na Ijipt bin atak ɛn kapchɔ, bɔn am ɛn kil ɔlman we de de. Wɛn in gyal pikin mared to Sɔlɔmɔn, i gi in pikin dis siti as mared prɛzɛnt.

¹⁷ Sɔlɔmɔn insɛf bil dis siti ya bak wit dɛn wokman dɛn we bin de wok bay fos. I bil di dɔŋ pat na Bɛth Orɔn,

¹⁸ wit Baalath ɛn Tadmɔl we de na di ples we pɔsin nɔ go ebul tap.

¹⁹ Sɔlɔmɔn bil siti dɛn fɔ de kip in ɔs ɛn karej dɛn ɛn siti dɛn fɔ in sɔplay dɛn. Sɔlɔmɔn bil ɔl wetin i want na Jerusɛlɛm, Libanɔn ɛn ɔlsay nain kindɔm.

²⁰ Ɔl di pipul dɛn we bin lɛf pan dɛn Amɔrayt, dɛn Itayt, dɛn Pɛrizayt, dɛn Ivayt ɛn dɛn Jɛbyusayt we nɔto bin Izrɛlayt,

²¹ dat na di wan dɛn we bin lɛf na Kenan we di Izrɛlayt dɛn nɔ bin kil. Na dɛn Sɔlɔmɔn gɛda fɔ de wok fɔ am bay fos, ɛn te tide dɛn de wok.

²² Bɔt i nɔ mek nɔn Izrɛlayt bi slev fɔ am fɔ wok; bifo dat na dɛn i mek de nain ami, in gɔvmɛnt, sɔm na bigman na ɔfis, sɔm na kapten fɔ in ami, sɔm na kɔmanda fɔ in ɔs ɛn karej dɛn ɛn sɔm bin de rayd di ɔs dɛn.

²³ Sɔm pan di Izrɛlayt dɛn na bin edman pan in projɛkt dɛn. Na fayv ɔndrɛd ɛn fifti Izrɛlayt dɛn bin de supavays di man dɛn we de wok.

²⁴ We Sɔlɔmɔn in wɛf we na di kiŋ na Ijipt in gyal pikin, lɛf Devid in siti go na di kiŋ os we Sɔlɔmɔn bil fɔ am, Sɔlɔmɔn ful-ɔp di land na di ist pat na di siti.

²⁵ Sɔlɔmɔn bin de ɔfa bɔn sakrifays ɛn pis sakrifays tri tɛm insay di ia na di ɔlta we i bil fɔ PAPA GƆD, ɛn na so i kin de bɔn insɛns de bak. I mek shɔ se i de du ɔl wetin i fɔ de du na PAPA GƆD in os.

²⁶ Kiŋ Sɔlɔmɔn bil ship dɛn na Iziɔn Gɛba, we de nia to Ilath na Idɔm bay di Akaba Gɔlf.

²⁷ Iram sɛn in man dɛn we sabi bɔt bot ɛn wata biznɛs gud gud wan fɔ wok na di ship wit Sɔlɔmɔn in yon man dɛn.

²⁸ Di ship bin de go na Ofir; na fɔtin tawzin kilo gold dɛn briŋ kam to Sɔlɔmɔn.