1 Kiŋ 7 - Krio Fɔs Oli Baybul

Sɔlɔmɔn Bil Os Fɔ Insɛf

¹ Sɔlɔmɔn tek tɔtin ia fɔ bil ples we i fɔ tap as kiŋ.

² I bil di ɔl we dɛn de kɔl ‘Libanɔn Fɔrɛst’ insay in kɔmpawnd. Di ɔl in mɛzhɔmɛnt na wan ɔndrɛd ɛn fifti fut lɔŋ, sɛvinti-fayv fut wayd ɛn fɔti-fayv fut ay.

³ In ruf rɛst pantap fɔti-fayv sida pila dɛn, wit fiftin pila na wan ro.

⁴ Di tu men wɔl dɛn gɛt tri, tri winda bay ro. Winda de ɔpozit in kɔmpin.

⁵ Na tri domɔt i put na di frɔnt pat ɛn dɛn ɔl bin gɛt rɛktaŋul shep.

⁶ I mek ston pila dɛn fɔ sɔpɔt di ruf na di viranda. Di viranda in mɛnzhɔmɛnt na sɛvinti fayv fut lɔŋ ɛn fɔti-fayv fut wayd, ɛn di ruf lɔŋ te i kɔba di wanol viranda wit pila dɛn ɔl rawnd am.

⁷ I bil di ɔl usay di chia de we na usay i go sidɔm fɔ jɔj kes ɛn kɔba di wanol ples wit sida bod frɔm di grɔn te rich ɔp di silin.

⁸ Lɛkɛ aw Sɔlɔmɔn bil di ples we i de sidɔm fɔ jɔj kes na so i bil di kwata we na de in fɔ tap, ɛn na biɛn di say we i de sidɔm fɔ jɔj kes i bil am. Sɔlɔmɔn bil dis sem kayn os fɔ in wɛf, dat na di kiŋ na Ijipt in pikin.

⁹ Dɛn tek gud ston blɔk dɛn mek di bildin dɛn insay di kɔmpawnd, frɔm di fawndeshɔn te go ɔp di ruf; dɛn tek tɛm chisul di blɔk dɛn lɛ ɔl di sayd dɛn smut.

¹⁰ Na gud kwaliti ston dɛn yuz le di fawndeshɔn, sɔm na twɛlv fut lɔŋ, sɔm na fiftin.

¹¹ Dɛn le ɔda ay kwaliti blɔk dɛn pantap dɛn wan ya ɛn put sida bod midul dɛn.

¹² Dɛn dizayn di wɔl na di kɔmpawnd wit tri ston blɔk, wan sida bod; tri ston blɔk, wan sida bod te go rawnd am so dat insay am fiba jɛs lɛk di wɔl dɛn na PAPA GƆD in os ɛn di frɔnt pɔch nain os.

Di Wok We Uram Du

¹³ Kiŋ Sɔlɔmɔn sɛn kɔl wan man we nem Uram na Taya.

¹⁴ In mama kɔmɔt na Naftali fambul bɔt in man bin dɔn day, ɛn in papa in kɔmɔt Taya, ɛn na man we bin sabi mek tin dɛn wit bras. Uram sɛf bin gɛt di sɛns ɛn skil fɔ mek ɔlkayn tin wit bras. Nain du ɔl di bras wok fɔ Kiŋ Sɔlɔmɔn.

Di Tu Brɔnz Pila

¹⁵ Uram mek tu bras pila ɛn put dɛn na di men domɔt fɔ pas go insay PAPA GƆD in os. Dɛn ayt na twɛnti-sɛvin fut, dɔn rawnd na etin fut.

¹⁶ I kav tu fayn fayn dizayn pantap di ston pila dɛn. Wan in ayt na sɛvin ɛn af fut.

¹⁷ I mek fotin chen ɛn rap dɛn sɛvin, sɛvin rawnd di pila dɛn pan di tin dɛn we i kav.

¹⁸ I tek bras mek tu ro pomigranet shep ɛn yuz dɛn fɔ dɛkɔret rawnd di tin dɛn we i kav. I mek am pan di tu pila.

¹⁹ Di tin dɛn we i mek pantap di pila dɛn shep lɛkɛ da Lili flawa ɛn dɛn ayt na siks fut.

²⁰ I mek tu tu ɔndrɛd pomigranet shep tin dɛn ɛn arenj dɛn bay ro pantap di pila dɛn. Wan pila gɛt tu ɔndrɛd ɛn i put dɛn to di say we shep lɛk bol nia to di chen dɛn.

²¹ Wɛn i dɔn mek ɔltin dɔn, i put di pila dɛn na di frɔnt viranda na PAPA GƆD in os. Di pila we i put na di sawt pat i gi am nem Jakin dɔn di wan na di nɔth i gi am nem Boaz

²² Di tin dɛn ɔl bin shep lɛkɛ da flawa we nem Lili. Na so i tek dɔn da wok de.

Di Brɔnz Tank

²³ Uram mek rawnd wata tank wit bras. Di insay dip sɛvin ɛn af fut, rawnd na fɔti-fayv fut, dɔn pantap na fiftin fut. Dɛn bin de kɔl am di si.

²⁴ I dizayn kalbas rayt rawnd di tank. Dɛn bin de na tu ro ɛn di sem tɛm we i mek di tank, nain i mek dɛn.

²⁵ I mek twɛlv bras kaw we na pan dɛn di tank sidɔm. Di kaw dɛn tinap tri, tri; tri tɔn dɛn fes to di nɔth; tri to di sawt, tri to di ist ɛn tri to di wɛst; dɔn dɛn ɔl wes tɔn insay ɔnda di tank.

²⁶ Di tank in bɔdi tri inchis tik. In rim rawnd lɛkɛ kɔp ɛn ɛŋ ɛn kɔv lɛk da Lili flawa. I nɔ gɛt shap ɛj, ɛn na tɛn tawzin galɔn wata i de tek.

Di Brɔnz Ɔmɔlanke Dɛn

²⁷ Uram mek tɛn bras ɔmɔlanke: wan lɔŋ siks fut, di ayt na fo ɛn af fut, dɔn i wayd siks fut.

²⁸ Di ayɛn dɛn we i yuz gɛt skwaya frem.

²⁹ I put layɔn, kaw ɛn chɛryubim dɛn midul di ayɛn dɛn, dɔn i mek flawa dɛn pantap ɛn ɔnda di layɔn ɛn kaw dɛn.

³⁰ Di ɔmɔlanke dɛn ɔl gɛt bras wil dɛn ɛn bras ayɛn dɛn fɔ ol dɛn wil. I put stand dɛn na di fo kɔna fɔ de ol bol; i mek flawa dɛn pan di stand dɛn.

³¹ Di stand dɛn ɔl gɛt rawnd frem pantap fɔ ol di bol dɛn; wɛn dɛn sidɔm pan dɛn frem, dɛn ayt na etin inchis ɔp dɔn i wayd twɛnti-sɛvin inchis na di ɔmɔlanke. I kav tin dɛn rawnd di bol dɛn. Di ayɛn dɛn ɔl na skwaya shep dɛn gɛt, dɛn nɔ rawnd.

³² Di ɔmɔlanke in wil dɛn na twɛnti-sɛvin inchis. Di ayɛn we ol di wil fasin pan di ɔda ayɛn dɛn.

³³ Di wil dɛn tan lɛkɛ karej wil. Na ayɛn dɛn tek mek di wil, in rim, in spoks ɛn di ɔb dɛn.

³⁴ Di ɔmɔlanke dɛn ɔl gɛt fo fo andul na dɛn fo kɔna fɔ ol dɛn. Na di sem ayɛn dɛn tek mek dɛn.

³⁵ Dɛn ɔl gɛt nayn inchis rop pan dɛn. Ɔl di ayɛn dɛn pan di ɔmɔlanke dɛn ɔl jɔyn pan dɛn kɔmpin. Nɔn bolt ɛn nɔt nɔ de pan dɛn.

³⁶ Uram kav chɛryubim, layɔn ɛn pamtri dɛn pan di fut ɛn di sayd dɛn pan di ɔmɔlanke dɛn, ɛn mek flawa ɔl rawnd. Ɛnisay we i si spes i de kav sɔntin de.

³⁷ Na so i mek ɔl tɛn di ɔmɔlanke ɛn dɛn ɔl na bin wankayn.

³⁸ Uram mek tɛn bras baf pan fɔ di tɛn ɔmɔlanke. Wan baf pan wayd siks fut ɛn na tu ɔndrɛd galɔn wata i de tek.

³⁹ I put fayv ɔmɔlanke na di Sawt pat na PAPA GƆD in os, dɔn di ɔda fayv i put dɛn na di Nɔt pat; i put di big tank midul di Sawt-Ist pat na PAPA GƆD in os.

Di Tiŋs Dɛn We De Na PAPA GƆD In Os

⁴⁰ Uram mek pɔt, shɔbul ɛn pan dɛn. I mek shɔ se i dɔn ɔl di wok fɔ Kiŋ Sɔlɔmɔn na PAPA GƆD in os. Na di tin dɛn dis we i mek:

⁴¹ di tu pila; di tu fayn fayn dizayn we shep lɛk bolpantap di pila dɛn; di tu chen we de pan di fayn fayn dizayn dɛn;

⁴² di fo ɔndrɛd pomigranet shep dizayn fɔ di chen dɛn, di pomigranet shep dɛn de na tu ro we ɛŋ pan di fayn fayn dizayn dɛn pantap di pila dɛn;

⁴³ di tɛn ɔmɔlanke wit dɛn tɛn baf pan;

⁴⁴ di wata tank wit di twɛlv kaw ɔnda am;

⁴⁵ di pɔt, shɔbul ɛn pan dɛn. Na bras Uram yuz fɔ mek ɔl dɛn tiŋs ya fɔ Kiŋ Sɔlɔmɔn fɔ de na PAPA GƆD in os.

⁴⁶ Di kiŋ mek i mek ɔl dɛn tiŋs ya na di say we dɛn blaksmith de wok na Jɔdan Vali bitwin Sɔkɔt ɛn Zarɛthan.

⁴⁷ Bikɔs di tiŋs dɛn bin tu bɔku, Sɔlɔmɔn nɔ we dɛn. I nɔ ivin we di bras.

⁴⁸ Sɔlɔmɔn mek ɔl di fɔnichɔ fɔ di tɛmpul: di gold ɔlta, di gold tebul we na de dɛn de put di bred we dɛn de ɔfa to PAPA GƆD;

⁴⁹ di piɔ gold stand dɛn fɔ di lamp dɛn, fayv na di raytan ɛn fayv na di lɛfan bifo di rum we oli pas ɔl; di flawa dɛn, di lamp dɛn ɛn di fɔk fɔ pul ɔt kol na faya;

⁵⁰ di piɔ gold bol dɛn, di sizɔs fɔ trim lamp wik, kɔp, insɛns pɔt, di gold inchis fɔ di do dɛn we de na di rum we oli pas ɔl ɛn fɔ di ɔda do dɛn. Na gold i tek mek ɔl dɛn tiŋs ya.

⁵¹ Wɛn Kiŋ Sɔlɔmɔn dɔn du ɔl di wok we i fɔ du na PAPA GƆD in os, i kɛr di tiŋs dɛn we in Papa Devid bin dɔn gi fɔ de de, dat na di silva; gold ɛn ɔda fɔnichɔ dɛn, ɛn put ɔl insay de.